拍戲傷腰 影響陀B 岑麗香 停工小休 返加國造人
撰文：Sunday Kiss
圖片來源：新傳媒圖片庫、岑麗香Instagram
岑麗香停工小休 返加國造人
今個月是岑麗香成為人妻一周年，因為婚前已接落兩套劇《溏心風暴3 》及《果欄中的江湖大嫂》，香香劇接劇忙足成年，強強默默守候住香香，不時做司機返工放工管接送，冷落為她移居香港的老公強強，為此她曾表示未盡妻子本份愧對老公，所以最好的彌補方法，就是為恨做老竇的強強生個可愛的BB！
外遊慶祝紙婚
早前無綫新劇《 BB來了》試造型，據知原本女一屬意香香，但最後由李佳芯頂上，監製廖晉碩直認不諱：「香香係其中一個考慮人選，但香香話婚後第一年希望同家人過年，但冇提及係咪有BB。」香香因推劇被傳有咗，但她多次出來澄清未有餡，而推劇真正的原因 就是為了強強。知情者透露：「香香同強強呢一對真係人前人後都好sweet，強強知道香香拍劇辛苦，所以錫到佢燶，雖然佢好恨做老竇，但香香一直有工作喺身唔可以有住，佢都好有耐性咁等，等香香拍晒兩套劇，兩公婆終於有機會計劃吓，因為香香周身傷患，之前拍戲整到條腰都未好，又整親隻手，醫生同佢講女人要陀B 腰骨好重要，所以香香趁呢排一有時間 就去搵脊醫做治療，同時亦有睇中醫調理好身體。強強肉都 赤,亦知道香香拍劇壓力大，所以想同佢外遊慶祝結婚一周 年，然後返加拿大探親，乘機可以休息吓造人，好彩香香嫁人之後對事業野心冇咁大，一切以老公行先，所以當監製搵佢拍《BB來了》，佢諗都唔諗就推咗。」
撻歪腰骨
雖然野心不大，但每次演出香香都全力以赴，去年拍錢國偉執導的電影《辣警霸王花》，香香在大馬拍外景時，要赤腳追賊，又要在5層樓高游繩、跳急流，公主變打女唔易做，搞到日日腰痠背痛兼扭親，一次在沙灘拍攝時更撞石跌倒要入院照X光，拍戲辛苦之餘仲傷及腰骨舊患，香香認真手尾長。
收工急搵神醫
返加拿大展開不設防造人計劃前，香香想醫好條腰骨，所以一有時間就去搵脊醫。11月26日香香出席新劇《溏心風暴3 》宣傳活動，完場後由女助手陪同下 到達九龍城啟德道，見她上了一幢似是普通民居的唐樓，本刊記者望勻全幢大廈都找不到任何醫館的招牌，個小時後香香離開，她表示上去搵醫師整腰，還用手勢示範醫師怎樣用手肘去為她治療，連招牌都欠奉的醫館，看來是隱世的神醫。
香香：我真係想抖吓！
記：本刊記者 香：岑麗香
記：係咪之前整傷咗腰？依家傷勢點樣？
香：其實個背脊有少少歪咗，所以趁依家拍完劇有少少時間可以調理吓身體，都好嘅！啱啱拍完另一套劇又整親隻手，都要做啲物理治療，所以趁得有休息整好啲個身體。
記：日前影到你去神醫度治療，係咪有人介紹畀你？
香：係呀！係藝人同事介紹，專係for骨醫嘅，去咗幾次覺得身體舒服咗！
記：之前係咪推咗套新劇，最後個角色由李佳芯頂上？
香：哦！因為其實對我自己嚟講，唔係好似普通人咁一睇到劇本就識睇，我今年2月拍到10月冇停過拍劇，除咗工作時間，我返到屋企仲要花多幾鍾去翻譯，所以對我嚟講拍劇壓力實在太大。連續兩部40集同30集，我都處理到，但再接多部呢！我真係想抖吓！
記：調理身體都係想生BB？
香：唔係！我覺得身體點都要調理吓，因為我哋好辛苦，工作都比較長時間，都係想整番好條腰骨，等我企得靚啲。
記：老公見你拍劇受傷咁肉赤，有冇叫你唔好做佢養你呀？
香：其實佢冇所謂，佢好尊重我。無論我想繼續拍或者以後照顧我，佢都有畀我揀，我都好珍惜佢呢個大方。
記：有冇諗過返加拿大長住？
香：老公依家已經嚟咗香港喇！
記：聖誕新年係咪會返加拿大過？
香：希望可以啦！
記：同無綫份約仲有幾耐？
香：呢啲我唔答得架！公司吩咐咗唔講得架！
強強 拖香香去街街
香香與強強經常合體現，即使拍劇揀比堅尼，香香都帶埋強強去揀泳衣，要過到老公關先可以。上周一(11月20日)晚上7時許，香香唔使開工，翹實強強到將軍澳中心商場撐枱腳，食飽飽離開食 店巧遇本刊記者，戴住黑超的香香難掩幸福強光，甜笑冇停過，強強亦已習慣面對鏡頭，雖然對記者提問不發一言，但 他全程笑得燦爛，拖實靚靚老婆出巡，非常風騷！強強娶到肯為佢推劇生B的香香公主，令唔少宅男羨慕又妒忌，又的確抵佢威威嘅！
跟得老公
據知強強留港近一年都不急於找工作，原來他想多留時間與香香獨處，因為二人婚前都過了很多年獨居生活，難得找對了人共同生活，強強很想慢活，若不是香香與無綫仍有長約，分分鐘是香香跟他返加拿 大長住。今年7月香香前往葡萄牙為《溏心風暴3 》拍外景，強強做跟得老公飛埋過去陪拍，之後就留低繼續玩多一個星期先返香港，有廿四孝老公貼身陪實，亦難怪香香無心戀戰。
為妻留港 視像傳情
香香與強強拍拖年半分隔兩地，只靠視像對話談情，去年12月結婚後，強強決定放棄在加拿大的生活與事業，跟隨香香移居香港生活。閒時強強會與香香周圍去搵好嘢食，或者等香香唔使開工就外遊享受二人世界。
