打工仔Last Day訂散水餅訂到收律師信？力數3宗罪 用快遞公司地址假扮實鋪

1. 餅店只用emoji回覆 仲反指控網民製造混亂會封鎖其帳號

事源呢位網民就係連登討論區訴苦並po出多張與餅店嘅對話圖，表示自己喺一間專門賣散水餅嘅IG餅店訂購30件餅乾兼希望可以自取，而該餅店其後回覆該網民要求對方填寫網上表格，但表格內容全部都是關於送貨問題，並無自取選項，所以佢再問多次餅店，但餅店就不斷用emoji回覆要網民填寫表格，網民問佢個emoji即係咩意思，結果都係再收到emoji，所以無奈妥協填form。最後事主都係忍唔住再問餅店，「覆一個要字係咪好難」，餅店終於用文字回覆指該團隊已「多次回應」該事主，接著反指事主不信任而拒絕配合製造混亂，仲話如果再繼續會封鎖其帳號。

事主收到餅店呢個答覆就嬲爆就回覆該餅店「如果唔想做呢單生意，你可以退錢。」餅店再回覆就表示公司不設退回機制，並再「提醒」該網民再製造混亂就會封鎖其帳號，並附上消委會、海關同赤柱警署電話。

2. 留負評就公開客人資料！餅店揚言對方等收律師信！

而網民係網上討論區訴苦後同樣收到其他網民留言，表示過去係該餅店訂購都遇到同樣情況，係openrice留下評價後則收到餅店親自回覆，更擅自公開該客人訂購嘅所有資料，甚至更指出該客人係無法律根據下對公司作出失實指控，並按法律團隊發出律師信。仲試過因為有網民留言俾負評，就被公開收貨地址，雖然有稍為打格，但網民都認為店主行為太過份。

3. 真店面Google搵唔到？！搵快遞公司地址扮實鋪！

由於今次呢位網民係網上訴苦後，該餅店就火速刪除原址，目前更搵快遞公司地址扮實鋪地址。但俗語話「凡走過必留下痕跡」，有網民已經公開其地址並留下最新評語，幾乎都係負評。