日本親子掃貨全攻略

而家好多媽媽都鍾意買日本尿片同奶粉，都係貪日本貨有質素保證，不過其實啱媽媽同BB使嘅產品仲有好多！趁住臨近年尾，亦係去日本掃貨嘅好時機，一於plan定假期，入定啲Yen，飛過去大手入貨啦！

大減價

日本嘅大減價期，分別喺冬夏兩季。冬季就由12月尾到1月，夏季7月中去到8月尾。呢兩段期間，好多商舖都會大幅度減價，基本由七折起，向4折進軍！

福袋

1月大減價嗰陣，好多商家都會推出福袋，雖然唔知入面啲「餡」係乜嘢，不過日本人好均真，一般入面啲「餡」嘅總值，都會高於福袋嘅定價，所以一定夠抵，擔心搶唔搶到好過啦！

筍貨推介

Gladee媽媽袋

媽媽袋有兩個要點，一係功能設計要合理，二係要輕便，如果有齊兩樣，咁就fit哂喇！如果加埋「靚仔」，就更錦上添花啦！Gladee係日本當地好受歡迎嘅媽媽袋，設計經典，花款又多；質地又防水隔熱，又夠輕身，好拎又易洗。喺日本買嘅話，最平70蚊港紙左右就有交易，係咪抵先？

獅王坐月牙刷

坐月嗰陣如果唔做口腔清潔，好易會導致妊娠性牙齦炎，同牙周病。呢隻牙刷其實係為牙齦有問題嘅人而設計，比普通牙刷柔軟好多，因為刷頭角度設計獨特，刷牙受力均勻，清潔之餘可以同時按摩牙齦。

Betta奶樽

係奶樽之中嘅LV！所有奶樽都係採用人工製作完成，100%日本製造獨特嘅弧形設計，可以令奶樽入面嘅氣泡順住曲線上升，有效減少BB喺食奶嗰吸入過多空氣搞到嘔奶！仲可以減輕吸吮嘅時候承受嘅耳壓。個奶嘴仲fit哂下顎嘅閉合，可以培養BB嘅咀嚼能力。

濕疹膏、止痕膏

好多治療濕疹嘅藥物都含有類固醇，喺日本有兩隻不含類固醇嘅藥膏好受歡迎。一隻係佐藤製藥嬰兒軟膏，另一隻就係無比滴嬰幼兒止癢膏，專針對BB因為用尿濕而引起嘅紅腫、濕疹、炎症、爛眼、痕癢、凍瘡、蟲咬等各種皮膚症狀。佐藤製藥係膏狀嘅，無比滴就係水狀，前者適合一個月以上嘅BB使用，後者就適合三個月以上嘅BB。

Gino超方便輔食剪

其實佢算係一個加工夾，既可用嚟夾斷蔬菜、魚、肉、麵等食物，又可作為研磨器搗碎南瓜、 紅蘿蔔、薯仔呢啲塊狀食物。造型輕巧，好揸手，唔阻地方。仲配有一個專用盒，帶出街都好方便。

(圖片及部分文字摘自網絡)