李佳芯對已婚視帝有感覺：佢未婚真係會中 女神3招瘦身法保持身段
編輯：東方新地、Sunday Kiss｜原文刊於：新假期
李佳芯認對陳豪有感覺：佢未結婚真係會中
李佳芯於網上節目《#絲打圍爐》訪問，指演員很容易愛上對手：「演員投入角色，嗰段時間會當真咁做，因為對得太耐，日對夜對，其實演員真係容易撻着，我慶幸自己咁遲開始拍戲，因為有時心諗，完咗之後大家依然繼續，真係會容易…甚至乎鍾意咗對方，會懷疑自己係咪鍾意咗佢，有時真係會迷失咗…唔知係咪演員底，演員啲感情好容易流出去，細個唔識控制，流出去收唔返。而家大個咗，就識得控制情緒，嗰啲假嘅、表面表面，識得區分。」
她坦言拍《跨世代》時開始與陳豪熟絡，對這位人夫讚不絕口：「阿Mo（陳豪）囉，真係阿Mo，我好多套劇同佢一齊，《潮流教主》嗰時係敵對，加上我好慢熱，好少同藝人好快熟絡，嗰時同佢好唔熟。直至《誇世代》開始熟，我哋喺戲裏面係一對，開始真係投入，阿Mo真係好友善，無論戲內戲外都好照顧，係好爸爸、好老公。我作為後輩有時會問佢意見，佢好樂意解答後輩問題。去到《誇世代》同《殺手》之間，真係覺得呢個男人，如果我早幾年入行，如果佢未結婚，真係會中，因為佢真係一個太好嘅男人。」她指陳豪很愛老婆陳茵媺：「晚晚同佢開劇，佢會同Aimee(陳茵媺)視像通話，好甜蜜，呢個男人好到做老公一流，你會有呢種感覺。」連詩雅再問她：「有少少幻想？」Ali坦言：「係，會有種『去邊度搵呢種男人』嘅感覺囉。」
《誇世代》劇照：
她去年跟舊愛陳炳銓分手，斷七年情，在節目中她指自己打從心底是渴望被愛，但拍拖時甚麼都會靠自己，有困難時不會主動求救，令前度覺得她很獨立，沒有被需要的感覺：「我好需要照顧嘅感覺，佢成日覺得我可以自己搞掂，我會覺得唔好煩，自己做到就做，其實好蝕底。撒嬌可以當係情趣，用一啲方法令對方覺得，原來我係需要關心、需要你。」
視后李佳芯 未紅前舊照大曬冷
李佳芯自2012年由收費電視轉到TVB後，從姣精演到人母，非常好戲，到2016年已在TVB《萬千星輝頒獎典禮2016》取得飛躍進步女藝員，2017年更憑《與諜同謀》和《踩過界》兩部劇集打低胡定欣和宣萱取得大馬視后「我最愛TVB女主角」獎，成為首名奪得「飛躍進步女藝員」僅兩年就獲封視后的女藝人。原來未紅前的她在旅遊記者界已經頗出名，出名肯捱肯摶好相與，大約十多年前已多次同《新假期》上山下海，由台灣、日本，去到意大利、澳洲、斐濟，最勁仲去埋南極！以下的封面同內容，眼利網民又記唔記得先？
01｜走勻全台灣影婚照（2005年）
12年前的李佳芯剛投身Model界，還未做有線主持，第一次同《新假期》出Trip，人生第一次的婚紗相就要走勻全台灣影。當年的妝髮造形今日睇起上來當然娘味十足，不過當年唔興過份的Photoshop、唔興假眼睫毛和大眼仔，Ali 靚樣同今時今日差唔多，證明靚樣真材實料啦！
攀山涉水擺甫士
影過婚紗相的人就知，靚相一般在兩日內瘋狂影晒；李佳芯在拍攝期間要著住婚紗攀山涉水、公路狂奔：爬上台南的七股鹽山、在青青農場拍攝薰衣草和野花遍地的場景，忍受38度高溫及長期暴曬的拆磨。
當年的記者憶述，拍攝當日台北天氣驟晴驟雨，拍攝團隊只好躲在車內，待雨停時李佳芯立刻跑出車影，影不到兩三張又下雨了，又要躲起來。如是者，跟天公玩足一整天躲貓貓。李佳芯都以專業態度面對，第一次出Trip，其實好難得！
翻閱2005年的陳年舊雜誌，當年記者好鍾意寫詩，而影相的攝影師亦好鍾意Model頭戴一大朵花（利申那位是台灣婚攝公司的攝影師）。
02｜天寒地凍沖繩追櫻（2007年1月）
為了向廣大的讀者報導日本的櫻花情報，《新假期》記者往往要帶同Model 提早出發。去完台南的1年半後，李佳芯跟《新假期》記者2007年1月出發到沖繩，在短短5日拍攝時間內要影櫻花、又要影海邊Resort。當年的記者指，那時候李佳芯已經是模特兒界的女神，但過程雖然辛苦捱凍，一樣好影無架子有交帶。
春寒扮初夏 背心短裙頂硬上
1月的沖繩還是冬天，只有10度的低溫，但為了畫面好看，拍攝時全程要穿上春裝，背心短裙，女神一樣拍心口頂硬上，抵讚！
白滑背脊第一露！
要知道旅遊記者去一個Trip唔只返一隻稿，當年1月已經要去影Resort，你估下呢間無人曬太陽嘅Resort，當時有幾咁凍？就係咁，李佳芯首次露出了白滑背脊畀《新假期》同廣大讀者。
Follow Ali to…
去到海邊resort，蔚藍海岸耍脾氣，時晴時雨，大風，陰陰涼，女神毫不扭擰，要著bikini落水永不say no。最正係去到海邊，攝影師為滿足親近女神欲望，情不自禁，影了一大堆拖住著得性感嘅Ali女神隻手踏浪呀，咦，拖手相，咪仲早過instagram手拖手遊世界的 #FollowMeTo情侶Murad Osmann！
03｜勇闖南極不怕辛苦（07年11-12月）
翻查資料，當時的李佳芯未做主持，但當時在Model 界她都多見報，算搶手貨。原來女神仲早過洪永城兩年去南極拍攝（編按：洪永城在NowTV年代曾以幕後身份，與黃貫中前往南極拍攝《一個地球》），係咪威先！
咪以為去極地就好爽皮，其實要坐足兩日半的飛機，由香港飛荷蘭落阿根廷，幾乎環遊全球，然後再捱30個鐘的船程⋯⋯聽到都想準備嘔吐袋。坐郵輪入南極，大浪到有如坐足兩日海盜船，而且南極天氣變幻莫測，能否如期登岸也需聽天由命。所以，女神每日就像飛虎隊般，隨時候命。
去南極當然想睇企鵝，但為保護牠們，規矩講明必須跟企鵝保持最少五米距離，以免影響企鵝的生活。唔知係咪女神太靚（定手上的企鵝公仔？），對人類已沒有戒心的企鵝們也會自動走近，又或乖乖站在附近任影唔嬲。
揭返當年本雜誌，今次南極之旅李佳芯出場位主要在封面，文中幾乎只有冰山大相同企鵝相，當同船嘅大陸客都有full page赤祼照一大張，李佳芯只獲得細碎行行企企食飯典床版面，好在呢輯相出土了，否則政府圖書館都睇唔返！
04｜斐濟罕有比堅尼look終極一脫（09年）
雖然李佳芯沒有好似一般模特兒出寫真集，平日出席大台活動都鮮有走性感路線，不過09年女神其實一向不介意健康性感，和《新假期》去斐濟時，就大曬Bikini ＋長腿。
又到揭雜誌時間，斐濟出名陽光海灘，配上李佳芯同樣燦爛的笑容，你估下呢張拋花球青春少艾相出咗幾大版？
05｜跟紀曉華遊澳洲（09年7月）
2009年的李佳芯已經成為有線主持，主持《體育王》，被網友追捧為「體育女王」，知名度已大大提升；《新假期》難得就到檔期邀請李佳芯去斐濟，同一個Trip順便Part埋飲食達人紀曉華Walter Kei，去埋澳洲塔斯曼尼亞歎世界食好西。
當時去採訪的旅遊記者回憶，話說採訪塔斯曼尼亞東岸蠔場時，位處南半球的塔斯曼尼亞正入冬，到訪之時白天只有8-10℃，天寒地凍，Ali 和紀曉華都要著上「賣漁勝」裝束落水。咁嘅情況下正常人都會嗌凍，但當時人氣已不俗的李佳芯毫無嗌辛苦怕凍的，震住都快手開工。
06｜意大利坐老爺車（08年5月）
跟住《新假期》出Trip，真係為女神帶來好多難忘的時刻，好似08年的意大利都靈、五漁村之旅，女神就連續兩星期登上《新假期》封面。
今次意大利之旅，李佳芯跟著記者採訪拍攝Alfa Romeo的四天古董車托斯卡納豪華自駕遊，當年都索價2千歐羅！不過坐在經典的Alfa Romeo Spider 1600老爺車，駛過一片片鮮黃油菜花田，穿梭於一字排開的柏樹之間，享受頭髮被風吹起的感覺⋯⋯好屈機呀！
意大利的五漁村（Cinque Terre）近年成為亞洲人的熱門之選，女神當年去到，除了學習地中海人悠閒步伐，在漁村影靚相，仲有機會大嚼當地海鮮同松露。
女神育成之路 3招極速瘦身法
李佳芯由做主持做到視后，精湛演技令觀眾留下深刻印象。李佳芯女神形象深入民心，雖說上天給了她天使面孔，但做得幕前必須經常保持苗條身材。她經常於節目上大晒惹人羨慕的纖瘦身材，但其實她的魔鬼身材得來不易，必須勤力做運動，即看她以下3招極速瘦身法！
第1招：踩單車瘦身法
李佳芯瘦身第1招，是以中等速度踩單車，需要連續不間斷騎行40分鐘以上，同時要注意規律呼吸，對減脂很有效果，也可以鍛鍊下肢力量，令肌肉更firm。運動前20到30分鐘，人體消耗的是由食物轉化成的糖原。而運動30分鐘后，身體才開始分解體內的脂肪。這也是有氧運動達到效果的法則，時間必須滿足30分鐘。對於踩單車來說，踩少過40分鐘雖然能對心肺起到一定的鍛煉效果，但並不能消耗更多脂肪。
第2招：慢跑瘦身法
李佳芯瘦身第2招，是以超慢速度來跑步。很多人認為跑步會跑出蘿蔔腿，其實不然。大部份跑步的人，小腿並不會變粗，如果會變粗，都是有再另外加做重量訓練，若在運動前先熱身、伸展，肌肉有了柔軟度，就不會因跑步而使小腿變粗。
透過慢跑瘦身法，能使身體發熱，運動結束後也能維持高體溫，因此基礎代謝率就會升高，消耗的熱量也會增加。此外，超慢跑更能鍛鍊肌肉，當人體的肌肉量愈高，基礎代謝率也愈高，即使靜止不動，也會消耗熱量。
第3招：行山減肥法
不少明星就如發哥也是靠行山每日90分鐘勁減30磅，每天行山一次，就能消耗500至700卡路里（千卡），而且行路不傷膝關節。行山屬於中等強度的有氧活動，增強心肺功能、促進血液循環。對於修身中的女士來說，遠足更有助消耗熱量，維持健康體重。
營養師建議行山之前，可以吃一頓輕盈而含豐富碳水化合物的早餐，亦須避免進食產生氣體的食物，避免飲食酒精飲料及含咖啡因飲品。行斜路需要用較多能量，所燃燒的脂肪也較行平坦大道多。
