70歲李龍基將7層樓送細40年大陸嫩妻 老婆背景曝光 揭兩日賺1棟樓搵錢大法

原文刊於：東方新地

李龍基唱兩日賺一層樓 揸法拉利登台

70歲的李龍基娛樂圈打滾幾十年，有「御用皇帝」之稱，演得皇帝多。肥媽曾於TVB綜藝節目《代溝關注組》大爆李龍基以前做歌手最賺到錢，肥媽說：「佢做一個月就夠買一層樓啦！係都要我拆穿你！」肥媽繼續說：「離譜，唱夜店嘅歌王就係基哥，一夜九場真係唔係講笑。佢住利物浦隔離，『離晒譜』呀！你知唔知佢外號係咩？墳場姑爺，『溝死女』呀！」而李龍基也沒有否認，只謙虛說：「時勢造英雄，咁啱有需要，我咪焗住做囉。4,000蚊一個月，一晚唱四個鐘。」而主持張秀文就好奇問：「嗰時一層樓幾錢？」肥媽：「萬幾啦。」一班年輕後生仔即嘩然「唱兩日賺一層樓」的威水史：「唱兩日就買到層樓！」

娶30歲嫩妻相差40年名下7物業全歸老婆名下

早前有傳40歲李龍基第二任妻子ChrisWong細他28年，即42歲，早前李太贈畫給女藝人楊柳青，令其「真面目」意外曝光，原來她只年約30歲，與李龍基相差40年。雖然年紀相差一大截，但無阻二人相戀，拍拖四、五年後決定結婚。

李龍基與第一任太太育有兩女一子，孫都有兩個，不過Chris比起李龍基與前妻所生的40歲女兒，還要年輕十幾歲，實在是「爺孫戀」。李龍基為了嫩妻，刻意打扮年輕顯活力，近年拍劇開工都帶住Chris在身邊，Chris不時化身「跟得夫人」陪李龍基到電視城拍劇，又曾與胡鴻鈞、何依婷及羅天宇等合照，愛得愈來愈高調。

提到去年Chris小產，李龍基說一切隨緣：「我都咁嘅年紀，唔知仲有幾多日子，我依家嘅心態係順其自然，唔強求，我都成日同太太講我會『走』先過佢，佢傻到話到時會同我一齊『走』，正傻女。」李龍基更將名下7個物業全歸老婆名下。談及何時與前妻離婚及再婚，李龍基不願多談，只說一紙婚書，唔代表一世，若時機到，緣份就會出現。他只透露太太在美國長大，考獲飛機師牌，亦喜歡他在台上唱歌，曾經花逾1,600元港幣買下其唱片《豹子膽》轉贈他，令他非常開心。

嫩妻細前妻女十幾年是業餘畫家

Chris報稱是飛機工程師，而且畫功了得，曾為不少圈中人繪畫人像，例如石修父子、林夏薇、Uncle Ray等。李龍基接受訪問時大讚老婆畫功勁，尤其畫他畫得非常神似。早前Chris畫了一幅畫送給Uncle Ray，也曾向楊柳青送畫，楊柳青在Instagram分享和兩人的合照，網民驚嘆長髮飄飄的李太充滿少女味。

Chris的Instagram除了有其畫作外，還有生活照，見她打扮青春、高貴大方，還有性感一面。動靜佳宜的她喜歡潛水，穿上比堅尼身型fit到爆，形容為「索爆人妻」並不誇張。

買六層樓收租定居深圳

20年前李龍基已洞悉先機，在深圳買優質樓投資，並與嫩妻定居當地，現持有六層樓收租，做包租公的收入本已夠生活有凸，不過早年《深宮計》效應令李龍基人氣急升，登台爆騷有錢繼續搵。

李龍基投資有道，全靠買內地樓致富，他說：「近年我一直住喺深圳，仲開始投資買深圳樓，咁多年keep住唱歌登台，試過18個月内去咗六次美國、三次英國、三次澳洲同四次大馬，賺番嚟嘅錢就投資深圳樓，當年有好多朋友話我傻，覺得買深圳樓收租好冒險，但我好有冒險精神，只會買地段好嘅優質盤，亦證明咗我當年嘅決定好正確，嗰時我用100萬可以買到一個400幾呎嘅優質屋苑單位，依家已經升咗好多倍，每個單位月租可以收7,000幾蚊，回報率好高，托賴有能力買幾層樓畀老婆收租，等佢有啲細藝。」

李龍基表示仔女已長大可以自立，而他的人生目標就最緊要開心，無論工作定生活，都會揀自己鍾意嘅去做，難怪會再娶個令自己賞心悅目的老婆。出騷歌王變成深圳樓王，李龍基以後可以印印腳退休享清福了。