梁諾妍半歲女皮膚紅腫 洪永城1句責備？焫㷫大量媽媽網民 即出文為老公平反

梁諾妍半歲女受塵蟎影響導致皮膚紅腫

梁諾妍日前現身港台節目《醫家搞邊科》作嘉賓，分享半歲女兒Amber突然受塵蟎影響，而令面部及雙眼出現紅腫，嚴重到連眼都睜不開，每晚半夜更因皮膚紅腫致痛而哭鬧不止，令到她十分心痛：「嗰晚佢瞓到半夜，突然佢喺度狂喊，見到佢對眼腫到擘唔開，成塊面都係又紅又腫，嗰一刻個心都跌咗出嚟！」。原來Amber本來就有皮膚敏感的問題，十分容易受到環境衛生和塵蟎影響。就醫後，醫生亦有提供了一些藥膏給她使用，可幸好Amber用完效果良好，皮膚紅腫情況得到好轉。

洪永城1句話老婆 焫㷫媽媽網民：怪老婆做乜？

而如今身在內地工作的老公洪永城知道女兒Amber的病況後，心痛得指老婆梁諾妍太疏忽。原來事緣梁諾妍將兩部空氣清新機搬往新屋，只剩下一部在現時居所，而導致家中出現塵蟎的問題。洪永城立刻叫梁諾妍將空氣清新機搬回到現時居所，更每日向梁諾妍詢問女兒的身體狀態。被斥責的梁諾妍沒有不開心，反而表示很安心，大讚洪永城的提點是她最強後：「其實我都知自己好多時都真係幾大懵，好多時佢都會畀好多意見我，係令我好安心。」

不過很多媽媽級網民不滿洪永城的態度：「怪老婆做乜？佢想㗎？照顧囡囡果（嗰）個係媽咪，媽咪仲心痛」、「咁緊張就自己湊嘛！」、「做佢老婆真係陰功」、「媽媽咁辛苦湊B比佢責備？咁交俾洪永城湊啦，一定湊得好」、「嫁錯系列」。亦有網民批評洪永城不在女兒身邊，幫不到手卻要求多多：「佢老婆要照顧個女仲要影相招呼埋佢幫唔到手仲施壓」、「通常呢，好就自己功勞，有咩事就怪人哋」、「洪生好成功咁辣興（焫㷫）哂成班媽媽 、恭喜哂」

梁諾妍為洪永城平反

梁諾妍事後在Instagram動態為洪永城澄清：「其實我都無講過話佢責備我，佢只係同我一樣緊張，想同我一齊解決問題。其實我唔明點解個topic變成咁，大家唔好責備洪永城好嗎？反而多得佢提點我先安心啲。」、「佢都無責備我疏忽，更加冇大發雷霆，多謝洪永城一直陪伴我解決問題。利申︰佢一直都係一個理性+脾氣好的人。多謝大家關心，洪寶寶好快已經無事啦！我日日都出洪寶story大家都睇得出，right？」、「佢個『話我』係提點我，叫我攞番部空氣清新機返嚟，That is it。呢位爸爸一直都做得好好，I am very proud of you！畀人誤會我都唔緊要，誤會佢，我真係一定要平反下。BTW，11/7結婚一周年快樂！我和洪寶和Molly愛你唷！」

洪永城亦在Instagram隔空同梁諾妍慶祝結婚一周年：「你是天使下凡嗎？你嘅好，唔單只係你性格好，而係你管理呢頭家，所有都處理恰到好處，令到我哋有一個好開心嘅家。多謝你呢位天使嚟到呢個家。結婚一周年快樂。 @inez_leong 既然你管理得咁好，之後頭家都交畀你喇。」

而梁諾妍亦有出文回應：「紙婚。我知道因為我嘅大頭蝦，你變咗個緊張大師。我都知道我嘅大情大性，你無時無刻都會提點我，同我分擔工作上生活上所有種種。由拍拖、到結婚、到家裏多咗兩位小公主Molly同洪寶寶

，你對我哋嘅好，我全部都接收晒。聽說過人一生遇到真愛嘅機率係30萬分之一，感激我遇到30萬分之一嘅你，感激路上有你相伴一起同行到老。嘩咁肉麻，一年講一次大家就硬着頭皮睇咗佢啦，雖然呢個紙婚我哋要分開過，當然會好掛住，唔緊要，我望住洪寶寶同望住你都係一樣啫！等你返嚟」

洪永城因工作錯過寶貴時刻

在節目中，梁諾妍指洪永城因為要返內地開工三個月，錯過不少女兒成長的時刻：「佢去三個月，即係話囡囡六至九個月佢都唔喺度，相信會錯過咗好多寶貴嘅時刻。」她亦有補充指二人雖然分隔兩地，但洪永城仍會每天視像，看看女兒和老婆：「佢出門口嗰日攬攬我，搞到我幾乎忍唔住（眼淚），當時都覺得應該會掛住佢，但夜晚就無事喇。我哋日日都有視像，況且囡囡同佢成個餅印，我諗佢視像都係想見個女啫。」

她憶起今年三月底時曾確診新冠肺炎，需要自我隔離，試過在網上求診睇中醫，表示效果相當不錯。確診時，她需要獨自躲在房間隔離，如要望到女兒Amber只可隔著玻璃見面，感覺就如現時洪永城北上拍劇的情況一樣，咁掛住女兒。

盤點梁諾妍惹網民爭議事件

1.懷孕期間仍跑8公里

梁諾妍曾在懷孕仍堅持跑8公里，花了54分59分完成夜跑自拍打卡，並在社交平台上留言表示：「輕鬆8k」。

不少聲稱自己擔當醫護行業的網民，指責梁諾妍不應該在懷孕期間跑步：「你唔係大肚嘅咩？咁對你個細路，攞個肚嚟博，一啲都唔錫佢。」、「咁樣太危險。」網民還指出懷孕期間，媽媽的身體變化，會直接影響到腹中的寶寶，劇烈運動如跑步單車等造成顛簸，產生強烈的震動：「我們醫護人員建議最好選擇一些動作比較緩慢平穩的運動，比如散步、慢舞等。」最後那位網民表示自己都是為梁諾妍好才會好心提醒，又留言斥責其他慣常跑步的媽媽自私、沒有醫學常識，引發罵戰。 有網民就叫梁諾妍不要太相信醫生的說話，勸她停止跑步：「醫生好多嘢都唔會包㗎，我都堅信你好好運，不過唔好博喇，可以好多運動選擇啫。」

最後梁諾妍解釋自己已諮詢過醫生意見才會繼續跑步：「醫生話未懷孕前已經有跑開步，到懷孕後繼續跑步唔會影響胎兒，仲可以幫助到胎兒健康發展，你都可以research多啲關於懷孕跑步資料。」

2.產後100日於停業健身室修身

梁諾妍女兒Amber出生100日時，梁諾妍已宣布產後修身成功，更上載一張處於健身室的自拍，身材弗爆的她身穿貼身運動服，腹肌隱隱若現，她留言：「動力就係努力收腹，見到少少少少線返緊嚟，大家都要加油呀！！！！！」不過這張圖片就惹起網民對相片的爭議和質疑，全因為當時全港都受到第五波疫情影響，健身室自今年1月初起，停業至4月21日開業，而帖文則在三月時上載，被網民質疑偷步違規使用設施，留言指：「健身室都未開返，點解你可以去嘅？」

神通廣大的網民，很快就已回應質疑：「人咃係老闆，想練咪練囉！」原來梁諾妍不但是健身教練，亦是健身室老闆，立馬就解開網民的疑團，自己閉門做運動不屬違規，而在自拍中所見，應該場內只得她一人，亦無抵觸限聚令。

梁諾妍運動健將名校出身 考獲三個教練牌

梁諾妍現年34歲，曾就讀名校聖士提反女子中學，入選香港女排青年軍，曾代表香港到北京出賽。及後她到加拿大升學，畢業於當地知名學府多倫多大學經濟與媒體研究學系。梁諾妍一向都熱愛做運動，考取長跑、健身、高強度間歇訓練運動三個教練牌，而且有六個亞洲運動及體適能專業學院證書，經常到不同國家參加馬拉松比賽，17年開設個人健身工作室。

身為長跑好手梁諾妍，產後已經恢復練跑，加上早前她上載與女兒和工人姐姐一齊做運動的影片到社交網，更直言產後傷口已經復原九成，再加上健身的幫助，每次抽30-60分鐘做運動、拉筋修身減脂，身形已經重回以前的苗條。

延伸閱讀：洪永城爆同黃翠如關係 有刺前度疑指唐詩詠？靠一張相媾到梁諾妍 因3點認定做老婆