41歲楊洛婷生完BB索過30歲麥明詩 最索人妻曾被舊公司逼迫拒就範 老公即護花

楊洛婷生完BB仲索過麥明詩

2015年港姐冠軍麥明詩身穿低胸裙在維港前拍照，上圍呼之欲出，又大騷長腿，然而不少網民指她造型甚「娘」、欠高貴，加上有隻手凌空放，甚古怪。相反2003年港姐亞軍楊洛婷與老公Tim黃天翱去希臘旅遊，狂曬泳裝、低胸連身裙，條小蠻腰勁纖瘦，仲見到馬甲線，弗到漏，被網民大讚是最索人妻。

2015年港姐冠軍麥明詩

2003年港姐亞軍楊洛婷

楊洛婷全靠古法紮肚法修身

楊洛婷老公是Dear Jane主音Tim，兩人育有女兒Tanya、細仔Tristan。雖然身為41歲的兩孩之母，但她身形仲索過年紀足足細10年的麥明詩。去年6月，她誕下兒子，產後僅四個月就成功修身、速度驚人，原來她用了古法紮肚方法，除了有助修身，亦可以改善血液循環促進疤痕癒合和放鬆肌肉，能令媽媽回復分娩前的狀態。

自從修身成功，她不時大曬玲瓏浮突的身材，平時穿上DeepV低胸晚裝出席公開活動，騷事業線，又曾發布了一張穿著喱士內衣的黑白照，被大讚「Fit過選港姐時」、「真心佩服佢生完兩個都仲咁索」。另一方面都有網民批評她：「咁都Po相博出鏡」、「其實係對老公唔尊重」、「為人母親，應該檢點啲」等等。

楊洛婷名校雙學位畢業 前港姐亞軍14年因1事離巢

楊洛婷在溫哥華長大，於名校英屬哥倫比亞大學經濟及心理學系雙學位畢業。99年，她參加加拿大溫哥華的陽光少女競選獲得亞軍，03年度參加香港小姐競選得到亞軍兼旅遊大使獎，同年加入TVB，曾演出過八套劇集，但最為人深刻印象是主持明珠台節目《講生活．講享受》﹐以及在兒童節目《問問Master Joe》飾演的角色AI Rabee’a，節目長達300集。

14年，她與TVB合約屆滿，因公司沒提出續約，所以決定離巢，同年加盟新城電台。現時口才了得的她當了全職司儀，經常出席不同公司的周年晚宴和活動，曾與奧斯卡大導馬田史高西斯與著名影星里安納度狄卡比奧同台。

楊洛婷同老公結婚5年共渡低潮

去年Dear Jane舉行首場紅館演唱會，楊洛婷非常支持老公Tim，連日來先後帶同媽媽、女兒Tanya、細仔Tristan，還有周家蔚、曹敏莉等好友到紅館舉燈牌撐足五場。她在Instagram用《草戒指》歌詞向老公表達愛意：「就算我只得一口袋的碎紙 就算我只得無人欣賞的堅持 你仍舊說聲你樂意 為我 飽風霜 空肚子 就算我只得披身的破衣 仍想給你一顆草織的戒指 更期待你講『我願意』沒有西餐只得蠋光不介意」，還說：「老公 I will always choose you no matter what！」、「我老公好正！」日日不斷放閃。

Tim亦好識做，經常公器私用，在台上對住台下的楊洛婷做心心手勢，又大唱郭富城的金曲《愛的呼喚》示愛，他說︰「成個禮拜做演唱會，之前綵排好少喺屋企，想借大家畀啲歡呼聲老婆同外母，要照顧兩個小朋友實在唔容易。」哄到楊洛婷冧爆甜笑。

當時Dear Jane在台上大談入行低潮，他們指以前的演唱會只有個位人數購票支持，要靠公司叫親朋戚友、場地再減少一半面積，才令場面不會太難堪。

事後楊洛婷亦於Instagram分享感受：「真正令我感動嘅，並唔係啲飛一早賣晒，又或者幾乎每首歌都全場企起身一齊大合唱，而係呢四個男人尾場第二次ENCORE時所唱嘅三首PUNK ROCK。呢啲歌係我15年前同我老公啱啱開始拍拖嗰陣，我第一次聽佢哋喺台上面表演唱嘅歌，代表咗Dear Jane嘅誕生，亦都係 Dear Jane全部意義嘅所在。簡單啲講，呢啲歌就係DEAR JANE！」

她指那三首歌令她回想起夫婦經歷過的高低起跌，第一件是她曾經被舊公司欺騙的往事：「我從來都無分享過，我估計我老公都唔記得。曾經有一段時間，我被舊公司不斷無理咁逼我去整，因為我唔肯妥協、唔肯就犯（範），所以就被人無情咁『掟入雪櫃』，結果我無工作、無收入。」當時Tim仍未做老公，就即以男朋友身份向她許下承諾，做「最強後盾」：「我老公就好型咁同我講：『我會用我嘅所有能力去照顧你。』的而且確，我老公絕對有履行佢對我嘅承諾，而幸運嘅係，我精彩嘅主持生涯亦隨即展開，呢個就係我哋愛情故事嘅開始。」

第二件是Tim與樂隊的低潮，她坦言自己曾叫過老公放棄，但後來她選擇繼續相信老公，做「最強粉絲」：「雖然我一直都好相信我老公，好相信Dear Jane，我甚至可能係佢哋最強大嘅粉絲。但抱歉嘅係，我都有試過喺佢哋低潮時勸過我老公面對現實，甚至叫佢轉變一下佢嘅職業。依家諗番，我好慶幸佢當時無聽我講，我真係好佩服佢哋對理想嘅堅持同毅力！喺演唱會入面，Jackal提及過：「每次開show都好驚冇人買飛」，其實我都同佢一樣有呢個擔心，所以多年來每次開Show我都會求神拜佛，努力叫晒身邊所有朋友買飛支持。」

去到今次演唱會，她很感激身邊人捧場，亦承諾自己會繼續支持Dear Jane：「直到今次佢哋話開演唱會撞正我坐緊月好忙，輪到我啲朋友好主動好踴躍、個個追住叫我幫手買飛，連一啲素未謀面嘅人，好似餐廳侍應、幫我整電話嘅師傅等等，都一一走來搵我買飛(我即使再忙都出盡全力幫手答謝大家)，我真心為Dear Jane感到無比嘅光榮同驕傲！我真係好愛呢四個男人！喺未來嘅日子，無論世界有幾艱難，我都會繼續Suppprt你哋，希望你哋繼續用音樂同樂迷聯繫起來，創造更多大家喜歡嘅故事! 」