羅子溢夫婦同屬處女座 揭太太楊茜堯真面目 靠8字維繫婚姻

撰文：東方新地
圖片：新傳媒圖片庫

羅子溢 一放假即撲返港

羅子溢近兩年在內地拍戲，成日要兩地飛，問到佢哋有幾多時間見面？羅子溢話：「依家我會覺得我嘅休息時間係唔重要，我喺大陸拍戲，今日唔知聽日事，未必知聽日係返工定放假，好多時我一知道放假，就即刻訂機票，未天光我已經返到香港，十二點派通告話連放三日，我五點已經返到香港，哈哈！幾趕呀！老婆未瞓醒，擘大眼已經見到我。」

家庭工作兩邊平衡

羅子溢表示佢一放假就直接返香港，係因為唔想miss咗任何嘢：「我追求工作、有鬥心，想賺更多嘅錢，得到更多嘅機會，但同樣我同自己講，唔可以用有限嘅嘢去追無限嘅嘢，咁唔代表我冇鬥心，只不過我係隨緣、平衡。我又可以開到工，又可以照顧到屋企人，係自己嘅時間冇咗啫，我覺得冇辦法啦，要顧兩邊平衡，就要犧牲呢啲嘢。」

處女座夫婦 大爆楊茜堯真面目

問到楊茜堯係咩類型嘅太太？會唔會做家務、煮飯？羅子溢就笑言：「佢會做家務、煮飯，同埋唔係大家表面睇到咁硬淨、咁強，佢係一個好照料我身體嘅太太，成日擔心我食唔好，食得多唔好嘅油，我又鍾意飲汽水，佢就迫我戒汽水，哈哈哈哈！凍又驚我唔著衫，因為我喺圍村大，凍慣，大家成長環境好唔同，我同佢都係處女座，所以大家性格相似嘅時候，我明白佢嘅出發點，好多不必要嘅爭拗就可以避免。」

缺點收埋優點放大

羅子溢指兩公婆拍拖同結婚八年，冇可能冇拗撬：「但我覺得情侶之間嗌交永遠都係芝麻綠豆事引起，依家我會學識冷靜吓，我睇吓報紙，佢上吓網購物，就唔記得咗。唔好畀件事發酵，我幾鍾意中國人有句說話──相敬如賓，兩公婆無論幾多年感情都好，我覺得相敬如賓好緊要，可能大家因為恃住感情耐咗，有啲嘢放縱咗，譬如你追佢嘅時候，會將自己嘅缺點收埋、放大優點，但點解結婚之後唔得呢？」

楊茜堯眼濕濕大爆求婚經過

楊茜堯當年榮升羅太後不久，曾接受本報的訪問，講述老公羅子溢求婚經過，馬上去片：