混血模媽Cara.G 產後復工拒坐月
產前食壽司
外國人百無禁忌，Cara產前產後一啖湯水沒飲過，產前還在醫院食壽司，「當時我好想食壽司，所以我朋友買咗盒壽司來醫院探我，護士一見到即刻nonono！大肚婆食壽司生冷嘢係大忌！但我照食。」其實Cara並非任性提早復工，只是她的果汁生意正計劃擴張，希望事事跟到足，不想擔子全落在拍檔身上，「我生女期間，我間果汁店有好多嘢轉，包括喺ifc開分店，我想確保一切按計劃順利進行，我未大肚前已經開始搞，唔
想就咁掉低俾拍檔一個人跟晒。」身為model兼攝影師的丈夫Jesper一直從旁支持她，操刀為太太的生意做拍攝工作，更重要是精神上支持，Cara說：「兼顧工作同湊女好大壓力，好彩佢一直支持我，又主動幫手湊女。」
BB未滿月照帶出街
她揚言身體沒大影響，只是產後第三周一次扁桃腺發炎，「嗰次要入院，我覺得筋疲力盡，但我依然繼續工作。中國人產後停工休息成個月，但之後好難修身，我生完即刻復工走來走去，又帶埋India跟我四圍去。」BB未滿月就帶出街，Cara不怕她易受感染，寧願早些讓她接觸不同環境，好過困在家中，只需要提防她的小手亂摸就夠。Cara湊女親力親為，沒刻意運動都能修身，迅速回復產前體態，「我餵了母乳六個月，有助我減磅，產後三個月我身體回復後，我開始做番運動、恢復健康飲食同果汁排毒（Detox Juice，以果汁取代三餐，維持身體功能和排走毒素）。」Cara每朝必食兩隻有機蛋、多士及一支綠色果汁，例如加入菠菜、芹菜、蘋果、檸檬、歐芹等；午餐及晚餐則變化較多，以沙律、意大利麵為主，並隨身攜帶健康小食如天然果仁、燕麥條等果腹，她強調健康食物要raw and organic，「唔需要100%有機，但會盡量多吃。」別以為她沒坐月、沒進補、茹素又身形瘦削就沒奶水，她透露自己奶水勁多，懷孕期間主要進食有機食物及飲新鮮果汁，未知有沒關係，「唔知係我好彩，定係關果汁事，但我好肯定India喺我餵哺下非常健康，到依家未病過一次，相信同我嘅日常飲食有關。」
「印度B」集多元血統
Cara來自澳洲，混有中、泰、德、瑞士、愛爾蘭等血統，家人居住新加坡；而Jesper是加拿大人，在美國長
大，但家人來自丹麥，所以India可謂集合多元血統於一身。為女兒取名非兩人族裔的「印度」，是源於兩人對印度的感覺，Jesper解釋：「印度係一個野生、美麗、宏偉嘅地方，充滿魔法同神秘感，我哋都希望個女係咁，去經歷地球美麗同神奇之處。」Cara非常嚮往印度的神秘感，喜歡當地有很多動物，「我好鍾意India呢個名，就同Jesper提議改呢個名，我哋好開心最後揀咗India Wilde，非常切合佢性格，佢充滿野外精神，對每件事物都好有興趣。」
半歲大飛遍歐亞
在教女上， 兩人會好好利用多元種族優勢，Cara說：「我哋一定會利用所有文化，去教育佢所有嘢，例如帶佢返家鄉探親，去旅行放眼世界，讀萬卷書不如行萬里路，一定會俾佢親自看清世界。」兩人言出必行，八個月大的India已走遍歐亞多地，個半月大已踏上人生首個旅程——泰國，之後還飛到倫敦、西班牙、丹麥、峇里等地，最神奇是India非常享受搭飛機，完全沒喊，Cara形容囡囡是機上完美BB，「好多人見到咁細個BB上機，一定好驚，心諗天呀，千祈唔好坐我附近，事實上佢喺機上好乖，落機嗰陣好多人讚，佢係一個完美嘅旅行BB。」搭飛機沒難度，最可怕卻是回程返家，Cara回憶道：「India有嚴重時差問題，返屋企後兩星期瞓唔到覺，簡直係一個惡夢！」
未決定紮根香港
母愛泛濫的Cara有女萬事足，她亦沒因為囡囡而冷落丈夫，兩人抱着女兒，依然行到邊咀到邊，羨煞旁人，Cara十分滿足現時生活，「BB帶來好多愛，令我哋生活更加美好，雖然做在職媽咪好，但當佢對住你笑，幾都冇所謂，佢令到世界更完美，亦令我工作更有動力。雖然工作同家庭好難平衡，但為咗家人我會盡力，我知道好難搵到完美解決方法，但我唔會放棄，我熱愛做生意、做model、做媽媽，我覺得自己每日都有進步。」Cara十分享受在港生活，香港為她帶來生命中最重要的兩人，BB是香港製造，亦是與丈夫Jesper相識的地方。在這裏事業家庭兩得意，但將來需為女兒考慮，香港是否適合女兒成長？香港讀書競爭大，求學需要求分數，與兩人的探索世界、快樂學習的育兒方針有分別，Jesper指兩人仍未有決定，「我哋對任何可能性持開放態度，仲未有最後決定，香港擁有一個優勢，就係學好中文呢個重要語言，香港亦擁有多元文化，背靠中國，亦有好多來自世界各地嘅人，喺度有機會認識好多不同國家人士，都係好寶貴。」被問到有冇計劃生第二胎，Jesper指未有打算，Cara卻搶答自己打算明年下旬再懷孕，屆時India將近兩歲，「我唔想兩個小朋友年齡相差太遠，又唔會太近。」Jesper才恍然大悟，「原來有人已經計劃好，哈哈！」Cara表示生男生女沒所謂，最緊要是healthy baby，「有多個小女孩都幾有趣，我覺得我哋會有一屋女人，組番個girly family！」
