身教問題｜B仔同診所病人打招呼僅一女子零反應 港媽咒無仔生被對方妙句KO

B仔同街坊打招呼

近日，Facebook專頁「診所低能奇觀」發文指自己見到診所發生罵戰。事緣有位媽媽手抱小朋友去到診所，母子登記完就坐低，小朋友周圍望，開始向診所內排隊的病人揮手、講「Hello」。有幾位病人見到小朋友打招呼，都有作出回應，只有有一位女士由頭到尾都沒有望過小朋友，沒有給任何反應。不過小朋友沒有氣餒，他繼向住女士方向揮手、揮手再揮手。

港媽鬧爆無禮貌

此時，B仔的媽媽說：「唔好再同呢個阿姨say hello啦，佢無禮貌啊。小朋友say咗咁耐hello一啲反應都無，無禮貌！」該位女士聽到就抬頭問：「你話我啊？」B仔媽媽沒有輸掉氣勢，直認是指罵她：「呢度係得你咁對我個仔啫！」女士表示不解，認為毋須理會：「佢同我揮手我一定要應㗎咩？」豈料媽媽說：「呢個年紀嘅小朋友係好需要身邊嘅人畀反應佢㗎，如果唔係會打擊到佢㗎，你係大人就唔應該咁囉！」之後媽媽同小朋友講阿姨零反應很無禮貌，做不到身教，叫小朋友不要學她：「人哋同你say hello你一定要應，咁先有禮貌啊。」

女士終極反擊

女士聽到怒火中燒，但仍保持冷靜地回答：「我阿媽教我唔好同陌生人講嘢㗎喎。」媽媽否認其仔是陌生人，繼續強調：「你無禮貌就無禮貌啦！慌死你唔係無仔生心理變態啊？」

此時連版主都覺得媽媽說話未免太過份，始終生不生仔是個人選擇，不能人身攻擊。最後女士一句KO港媽：「所以你教你個仔同個心理變態say hello？」媽媽鬧爆：「冇仔生懶有寶！」雖然媽媽深感不忿，不時望一望女士，但二人一直沉默，現場氣氛僵到其他病人都不敢出聲。

網民叫港媽要做好身教

有網民狠批港媽不可理喻，叫她要做好身教，否則教壞小朋友：「唔鍾意打招呼咪唔打，三唔識七，老馮㗎？」、「依家啲人真係以為自己嘅小朋友係王子嚟㗎？全世界人都要讓路」、「可能佢咁啱好專心諗緊嘢，又或者佢唔識點畀反應小朋友啫」

有人認同女士：「唔好隨便同陌生人傾偈，因為好多小朋友傾傾吓，就當咗係熟人被人拐走都唔知道，呢啲咪就係身教囉！」

資料授權：Facebook@「診所低能奇觀」