被指獲邀出任 教育局長 陳美齡: 希望為香港教育帶來新風

能學習的時候要珍惜機會，好好學習！

現年61歲的Agnes，在美國史丹福大學取得教育博士學位，也夢想三個兒子和平、昇平與協平也考入史丹福，成為世界性人材。她沒有虎媽上身狂谷，反之給 予 滿滿的母愛，啟發他們做書蟲，自發學習，並自稱「教育媽媽」創出一套「Agnes式教育法」，果真成功把三子送進史丹福，得到世界排名第三的大學認可。

去年，她接受Sunday Kiss訪問時，表示能給孩子最大的禮物，就是教育。多得 陳美齡 （Agnes）爸爸一句叮囑：「能學習的時候要珍惜機會，好好學習！」長居日本的歌手 陳美齡 自為人母後，沒有放棄任何學習機會，邊讀、邊工作、邊湊小孩，對孩子的照顧不下於全職媽媽，因Agnes覺得生育了孩子，就要一世負責，任何事都比不上 「媽媽」這份工作。尤其孩子的嬰幼期在教育中最重要，性格和個性都在此階段形成，影響往後人生。

1985年，Agnes與日本人金子力結婚，多年來與丈夫的相處之道是互相尊敬，結婚前已對如何養育小孩有共識。

熱愛湊仔 犧牲洗頭修甲

人 人都不禁要問，究竟陳美齡有甚麼育兒秘訣？水滴石穿，並非一二日之事。Agnes的秘訣就是做個負責任的媽媽，為了不想有任何後悔，她每天都為孩子做好所 有事情，大部分時間都盡量與孩子相處。「工作係緊要，但做媽媽仲緊要，呢三個小生命係我嘅責任。其實以前真係好忙，依家諗番起我都唔知點做到，日日冇覺好 瞓，連出去同朋友飲茶、洗頭、修甲都冇，去髮型屋都淨係剪頭髮唔洗頭，如果我自己剪到嘅髮型我會自己剪；買餸、買衫、買日用品都係網購。」全因想無時無刻 看到孩子，Agnes激發出所有母愛，寧可犧牲自己的外觀、社交，去換取湊仔時間。「湊小朋友俾我好大樂趣，每日生活都好開心，我又想教到佢哋頭腦靈活， 好多嘢想同佢哋一齊做。」

做在職媽媽 平衡思想

Agnes 不修邊幅享受家庭樂，但她從沒打算放棄工作，亦因為要工作，她才會如此爭取時間湊小孩。為何不轉做全職媽媽，換多一點時間？「我嘅個人時間就係工作，因為 工作都係為咗追求自己夢想，繼續唱歌同做義工。有工作亦平衡到我思想，工作辛苦就諗吓屋企，想快啲放工陪小朋友；喺屋企做家務辛苦，又諗吓聽日返工有咩樂 趣，所以做在職媽媽反而得到平衡。」

日常照顧以外，Agnes與孩子做很多啟發活動，讓他們從小明白讀書不是一種負擔。 「一定要多睇書，BB時期我已經讀好多圖畫書俾佢哋聽，小朋友頭腦好犀利，未識講嘢就識用手催你揭書，到佢識講嘢已經識唸晒簡單內容，就係咁培養到佢哋愛上閱讀，做咗書蟲。」

成 為書蟲已經贏在讀書起跑線，除了提升語文能力及自發讀書之外，更訓練到表達能力。「我讀完俾佢哋聽，就叫佢哋讀番俾我聽，小朋友一放聲出嚟讀，就會記得更 入腦；之後叫佢哋用自己說話講番俾爸爸聽，令佢哋更了解內容同表達自己；仲有鼓勵佢哋多發問，唔好覺得羞恥，所以佢哋成日問我嘢，我都會讚佢哋問得好！ 『不過媽咪都唔識答，不如你哋自己去搵答案啦！』提升埋佢哋嘅求知慾。」

自創小遊戲 取代打機

每 日除了親子閱讀，Agnes亦投放大量心思設計小遊戲，好似接龍、猜謎語，既好玩又能刺激思考，連出街都有得玩！「搭車好悶㗎嘛，我就搵個題目玩，例如： 大家睇住路上行人，鬥快搵到着橙色衫、綠色褲嘅人，好少有㗎嘛，所以成程車就望到實，真係會搵到㗎，搵完就轉紅色衫、紫色褲。如果上高速公路就搵車牌，要 有3、7，好好㗎。」Agnes設計的小遊戲只需動手腦，毋須工具，一家人坐着就玩到，可訓練集中力，頭腦靈活，更重要令小朋友明白追求快樂，不一定需要 物質。「只要有伴侶，甚至一個人都可以搵到樂趣。」

接觸大自然 發掘興趣

現 在人人搭車都低頭玩手機，有幾多父母會和孩子搭車耍樂？Agnes形容電玩猶如中毒，她自小就禁止孩子接觸電玩，直至中學，「要幫佢哋發掘其他興趣，好似 我同佢哋玩遊戲、帶佢哋多啲出街見識，去郊外釣魚、接觸大自然；就算夜晚都會出街踢波，落雨搵蝸牛，唔好成日困喺屋企。」Agnes建議家長一定要多帶孩 子到大自然，尋找萬物「老公會帶佢哋搵昆蟲、掘蟲仔、認識花草樹木，令佢哋對大自然產生興趣，唔需要再靠電子遊戲。」家長當然要率先身教，避免在小朋友面 前打機，並灌輸沉迷打機的壞處，令小朋友遠離，「如果小朋友掛住打機，對腦部發育好有影響，有少少中毒咁，遊戲生產商都希望啲人中毒，咁先賺到錢，當你一 中毒就好難戒，你要問小朋友：想唔想好似食白粉咁中毒吖？佢哋梗係唔想，所以唔好俾打機玩到你，係人玩機，唔係機玩人！」

戶外學習課本內容

香 港的填鴨式教育，好多家庭都要逆來順受，催谷小朋友做功課及應付默書考試，壓力大之餘，學習亦枯燥乏味。Agnes的方法是先看一次孩子的課本，記低將會 學習的內容，並計劃一個具體的學習活動，例如假日帶他們去科學館、博物館等地方，寓學習於娛樂。孩子預先接觸了學習的課程，到老師講課時就好易明。「好似 學魚我就帶佢哋去水族館；學歷史就去博物館或歷史古蹟，搵埋相關嘅電影睇，令學習環境變得立體，到佢上堂學嗰陣已經早有知識同有興趣，一邊玩一邊學。」

Agnes笑言三個仔最鍾意去科學館，每次都發掘到不同奧秘，培養到對科學的興趣，令學習事半功倍。「我覺得呢招好有用，當小朋友識咗好多嘢，就唔會覺得讀書辛苦，返學上堂都跟得上進度，我成日都話唔好追老師教學進度，應該安安樂樂等老師教你。」

至 於語文方面，Agnes坦言最佳方法只有多看書，以提升語文水平及閱讀理解能力，其中細仔更自學成速讀者。「佢兩三秒睇完一版！睇書睇得快對返學仲有利， 寫文都好好，因為佢睇得文章多。」自小在日本讀國際學校的三個兒子，精通中、英、日語，以英文能力最好。Agnes沒有安排過兒子補習，親自睇功課至小 六，中學才放手讓他們管理自己。

抗癌10年 點解會係我？

九年前，兒子們開始獨立成人， 陳美齡 （Agnes）看似鬆一口氣之際，被驗出患上乳癌，突如其來的癌魔找上自己，她感到晴天霹靂：「點解係我？我一直以嚟健康生活，咁俾心機做嘢，唔煙唔酒，屋企又冇人患過癌症，點解會係我？」

幸好發現得早，其後她做手術割除腫瘤，並進行長達五年的化療，捱過多次藥物副作用及多重壓力。明年十月，她將踏入抗癌第十年，屆時可正式宣布戰勝癌魔。「我依家身體好健康、好精神，思想都好正面，呢個病令到一家人團結咗好多。」

治療期間她最擔心家人，自覺增加了他們的負擔。當時二子在美國準備考入史丹福，十分擔心媽媽的病情，想回家陪伴，但她不准許，二子全無心機之下交白卷，令她感到歉疚。回想起來，她應該讓兒子回家，不應由他獨個兒在彼邦擔心。幸好老師容許補考，二子最終成功考入史丹福。

最怕看不到三個兒子長大

因 為家庭，令Agnes懷着堅定的意志抗癌，最怕看不到三個兒子長大成人，當時最小的兒子仍就讀小學，即使藥物的副作用令她臉腫、身體虛弱，為了兒子她也 一一捱過。「當時我塊面腫到眼都見唔到，真係好痛苦，有時朝早起身做唔到便當同早餐俾囝囝，老公就會幫手煮飯，送囝囝返學。我細仔知道我唔開心，夜晚會去 我床邊講笑話，佢喺Internet搵好多笑話練習，每晚氹我笑，我真係覺得好開心，都唔知喊好笑好，佢好愛護媽咪。」

Agnes覺得自己教仔最成功的地方，並非三個全入史丹福，而是三兄弟相親相愛，即使將來自己老去，三兄弟仍可互相扶持。「我唔可以睇住佢哋一世，佢哋遲早要自己照顧自己。佢哋走埋一齊好多嘢講，又搞笑，好鍾意同我玩，我都係一個好玩嘅媽咪嚟㗎！」