球星爸爸曬親情

葡萄牙前鋒基斯坦奴(C朗)，喺2010年搵代母生咗個「茨菇腚」，做咗未婚爸爸，小C朗雖然冇媽咪，但係老豆C朗就錫到佢燶，曾經有傳媒影到，C朗一踢完比賽，就即刻飛返馬德里，冒雨親自接個仔放學。

西班牙前鋒費蘭度托利斯又靚仔又好波，所以楊千嬅同丁子高都用咗佢名Torres，做個仔嘅英文名。生咗一仔一女嘅費蘭度托利斯，感情同家庭生活都比較低調，不過佢生個細仔嗰陣，就缺席咗一場比賽，睇得出佢對屋企人相當重視。

荷蘭翼鋒洛賓，生咗兩個仔一個女，嚮往家庭生活嘅佢，不時被傳媒影到3代同堂嘅溫馨場面，好爸爸形象深入民心。

2012年球王美斯嘅女朋友幫佢生咗個仔，叫泰亞高美斯。當時美斯喺醫院包咗一間豪華產房，房間嘅落地玻璃仲可以望到附近嘅的魯營球場，美斯仲全程陪產，親自迎接小生命出世。