男童考試期間生病 媽媽不准兒子食藥：返去仲要溫書，考埋試先食
廣告
11月是莘莘學子考試的時期，假如不幸生病了，對孩子溫習的能力可能大大下降。大部分家長都知道小朋友身體健康當然比成績重要，不過日前在Facebook專頁「診所低能奇觀」，診所護士向讀者分享了一則真人真事，原來有媽媽因不想生病的兒子食藥，以免影響溫習進度，所以要求兒子先溫好書，考好試，兩天後才可以食藥。
文章授權：診所低能奇觀
有日一對母子嚟到診所。
等睇醫生時，媽媽拎出書本遞俾個仔：「趁而家未睇得醫生，你溫多陣呀」
仔接過書本後：「嗯」
到睇完醫生拎藥俾錢後，媽媽行去坐位度，拎出一枝又一枝嘅藥水。
媽媽：「而家食埋藥先呀」
仔點頭。
媽媽望住我問：「啲藥係咪唔眼瞓㗎？」
我：「收鼻水嗰隻會眼瞓㗎～」
媽媽望望枝收鼻水，再望吓個仔，佢問阿仔：「你唔食枝收鼻水住得唔得呀？返去仲要溫書呀，一係考埋試先食呀？」
仔仔看似無力反抗，只有點頭…
我：「一係我問吓醫生有冇啲冇咁眼瞓嘅俾你呀？不過可能會係藥丸，好細粒嘅，吞唔吞到呀？」
媽媽：「唔駛啦唔駛啦，眼瞓嘅先有效㗎嘛，唔駛轉啦，而家唔食住就得啦」
我：「咁一係瞓前俾佢食啦」
媽媽：「唔得呀，佢考試呀，仲有兩日呀，我怕啲藥散唔到呀」
我：「唔會㗎，佢瞓醒就冇晒藥力㗎啦」
媽媽唔理我，望住阿仔講：「頂多兩日好冇，頂多兩日就有好日子過㗎啦」
媽媽將藥匙遞到仔口邊：「擘大口呀」
仔擘一擘大咗個口，再合返埋個口。
媽媽問：「做咩呀？食完返屋企㗎啦」
仔問：「媽咪呀，我幾時先有真係嘅好日子過呀？你次次都係咁講」
媽媽尷尬望望我，尷尬笑起上嚟：「哈哈，你講咩呀，考完試咪有好日子過囉」
仔：「呢個考試完咗，好快又有下一個考試…」
媽媽喝令：「擘大口呀，食咗佢先呀，食完返屋企啦！咁多嘢講…」
仔抿抿嘴後，擘大口吞咗匙藥水…
【前世情人】女兒，等妳長大後，爸爸想跟你說的十點愛情觀
關鍵詞
診所低能奇觀
