Anson Lo新歌《King Kong》反應兩極？自爆1事纏身 讚花姐好似媽媽

Anson Lo盧瀚霆呻媽媽被追演唱會飛

早前盧瀚霆接受Do姐鄭裕玲主持的《口水多過浪花》節目訪問。提到MIRROR 12子首次踏上紅館舉辦演唱會，很多鏡粉都紛紛「蹼飛」支持偶像，惟一票難求，即使主辦方加辦兩場MIRO特別場依然不能滿足粉絲的需求，有很多粉絲都表示失望。

Do姐表示自己都被很多不認識的人追問有沒有演唱會門票，而盧瀚霆都坦言自己不清楚有幾多張門票，他指媽媽的親戚都經常問她求飛，但他無奈表示不能承諾大家，多數都無能為力：「我都唔知我可以幫到大家買到幾多。」他憶述早兩次表演也是前一、兩日才知道每位成員擁有幾多張門票，上次只是十張以內，要分配也是頭痕的問題，笑言：「自己揀邊個無咁易嬲…盡咗力。我一定揀我爸爸媽媽先，有多餘能力先幫其他人。」

他表示出道以來一直很憧憬可以踏上紅館，覺得是遙遙不及的夢想，又指去到紅館已經很開心，已達到里程碑。他指花姐曾講過出道後五年才好幻想上紅館，但如今MIRROR出道四年就能成功達到目的，他高興表示已超額完成。惟現在MIRROR 12 子都各自有工作，暫時還未能齊人進行排演，他都只能在工作及休息時間練習。

他感激花姐經常為度表演流程表花了很多心機：「佢好似一個媽咪咁，好擔心好多嘢，唔只擔心首歌好唔好聽，佢係諗呢首歌接嗰首歌，我哋會唔會夠氣唱？佢擔心我哋體能、能力上應唔應付到，佢就會睇吓點調整。」

自認唱歌不夠好：驚唔值得大家鍾意

在訪談期間，盧瀚霆自認能力不足，唱歌方面較其他歌手遜色：「好驚自己做得唔夠好，好驚自己唔值得大家咁鍾意。我唱歌唔夠好，大家一定會比較、評論，我唱歌一定會遜色過其他歌手，可能咁樣好坦白、難聽，但一定要我自己知道嘅嘢，我一定有不足嘅地方，要時間去改善。 」

舞蹈員出生的他自出道以來都很努力唱歌技巧，深知需要加強鍛鍊歌唱能力，但平時除了唱歌之外，他亦應付不同類型工作，例如拍戲、拍劇、廣告等，很難平衡工作及訓練時間。他直言自己很難兼顧多重身份，只能盡自己最大努力平衡各種工作：「能力上嘅訓練好重要，但係唔代表其他工作唔重要。我最驚平衡唔到，是旦有個範疇做得唔好，會令樂迷失望。（你好錫歌迷喎！）一定要錫，無咗佢哋，就唔會有我哋。」

首次執導MV有3大阻滯 要安撫燥底花姐

近日盧瀚霆推出個人新歌《King Kong》，這次是他初次執導MV。被Do姐問到做導演感覺如何時，他大呼「呢次係好煎熬嘅經歷」，坦言在拍攝過程中感到十分擔憂，儘管拍攝前已經做好心理準備，但由於首次執導要處理及安排不同單位的拍攝工作，想不到實質運作時比想像中困難、艱辛：「要就燈、衫，同埋其他Dancer，我已經無就自己，因為就我一個好易。」他指事事都要他做最終決定，因此今次的拍攝對他造成頗大的心理壓力。

而且他指拍攝期間遇到不同阻滯，例如拍攝時近一小時突然死機，令到拍攝時間大失預算：「用咗個幾鐘係無做過任何嘢，好嘥（時間）同埋好苦惱。我唔知部機可唔可以再開返，就會驚個MV係咪完咗，唔使再拍落去？我唔好意思，搞到人哋乾等。」他指自己在時間限制上已盡力：「喺呢個時間上做到呢個效果，其實我已經犧牲晒我嘅睡眠時間。」

他又笑言副導演常常用咪提醒各個單位要做甚麼，他則喜歡親自跟當事人溝通，有幾次試過他跟副導演溝通完一些決定，對方用咪大聲說出來，令他感到尷尬。

另一方面，由於MV近九成都是綠幕及CG虛擬背景，在後期製作才會知道最終成果，所以拍攝時他要十分了解自己在做甚麼，要對整個流程有信心，如果對自己有懷疑，拍出來的效果就會不理想：「超級難！你要100%好清楚自己做緊咩。」當時花姐都有在場視察，她全程都十分不安，因為花姐難以想像MV畫面，很怕由電影感的MV最終拍成卡通片，為此感到十分擔憂，所以他當時還要分身安撫花姐：「我同佢講：『唔好咁愁先，唔好咁勞氣住！冷靜啲先！』佢全日好緊張，又好燥底。」

發千字文感謝合作單位

事後盧瀚霆在社交平台發千字文，分享拍攝MV的感受及感謝各單位的支持和協助，令到MV能順利完成。對於首次執導MV拍攝，他表示需要超級大嘅體力同「腦」力，除了應付平日工作、劇集拍攝，現在還要分配時間拍攝MV。這次他需要主導整個MV拍攝，所以休息時間比以往少很多，但他十分享受創作及執行的過程。

好開心今次再次同Oscar 合作，寫岀咗一份我認為適用於任何職業、情景下嘅「競爭」同「比較」。唔止係我依家嘅職業，細個時我家姐同我都有一種無形嘅比較，學業上同言行舉止上；去到小、中、大學同同學嘅比較、教跳舞時舞技嘅比較，相信我地每個人每一日都經歷緊比賽。而《King Kong》好想帶出即使哩個世界嘅競爭幾激烈都好，只要你有進步同努力嘅心，每個人都可以做自己嘅第一，做自己最強大嘅King Kong。King Kong再強大，都未必能夠同其他人比，因為每個人嘅King Kong強大嘅地方都唔一樣

今次第一次做MV嘅導演，坦白講係好需要超級大嘅體力同「腦」力。要應付平日自己嘅工作加上劇集拍攝，時間比以往拍任何MV更加唔夠用。拍攝當中休息嘅時間好少，因為每一刻都要主導同決定拍啲咩～ 但我好享受成個創作同執行嘅過程！辛苦水哥團隊、花姐、Karson團隊同Virtual Set團隊連夜一齊開會逐一解決每一個問題。

網民對新歌反應兩極

MV講述一班人被送到一個沙漠，眾人在很口渴的情況下要爭奪成個地方唯一一支水，大家為求生存而作岀不同選擇。在MV內，這些人在玩一場生存的競爭遊戲，面對競爭，有些人會選擇傷害別人，有些人則選擇坐以待斃，亦有一些人會選擇和別人分享。MV的內容其實有意義，指出大家可以共同合作，分享成果。而惡性競爭只會導致兩敗俱傷。

網民對新歌《King Kong》反應兩極， 有些部分網民在討論區留言指今次歌曲不好聽，質疑抄《移動迷宮》，但其實Anson Lo有講過新歌MV是向電影《The Maze Runner》致敬。

這次新歌推出後，反應較為冷淡，雖然如此，亦有一眾網民表示十分欣賞他初次執導MV，看到他花了很多時間和心思去拍好MV。