當年童星王樹熹Jacky仔城大畢業

Nov 12 2020

正所謂「仔大十八變」，童星出身嘅王樹熹（Jacky仔），唔經唔覺今年已經22歲大學畢業，準備踏出社會工作。當年精靈活潑的Jacky仔同哥哥王秉熹（Jeffrey）一齊做童星，兩人拍過不少TVB劇，如《爸爸閉翳》、《宮心計》、《十兄弟》、《隨時候命》及《天涯俠醫》等。其後，兩人都因為學業而淡出螢幕，專心讀書，原來係王媽媽當初「狠下心腸」嘅決定，亦造就咗兩兄弟嘅好成績！

撰文：TLY | 圖片：Jacky仔@IGFB、新傳媒資料庫

Jacky仔接拍接近50齣電視劇

Jacky仔展開童星生涯的契機，是他在3歲時被港台導演邀請拍兒童節目《點蟲蟲開開心心學飛》，逐漸為人熟悉，拍下了不少教育電視、廣告、電影等。其後參演了不少TVB劇集，如《爸爸閉翳》、《疑情別戀》、《十兄弟》、《隨時候命》及《天涯俠醫》等，拍過接近50齣電視劇。

Jacky仔1至6年級都係優異生

王媽媽接受訪問時表示，Jacky仔細個時補習、興趣班，乜都冇！興趣就係拍戲，所以王媽媽同兩兄弟講：「如果你哋鍾意拍戲，一定要早啲溫習課本，做好準備，就算測驗、考試，佢哋都會照樣拍戲，冇問題，因為一早已溫晒書。況且佢哋對自己要求都好高，成績少過90分都覺得差。Jacky仔由1至6年級都係優異生，哥哥喺5、6年級嗰陣，仲係全級第一名，從來都唔需要學其他嘢惡補。」

Jacky仔因升中淡出考入第一志願中學

小五嗰年，Jacky仔喺螢幕上突然失蹤，原來一切都係王媽媽嘅計劃。為咗要Jacky仔專心為升讀中學作好準備，所以刻意斷絕Jacky仔所有工作，最終Jacky仔都不負所望，考入第一志願中學。

據知Jacky仔DSE文憑試放榜當日，要求高嘅佢知道自己成績只係得最低入學要求嘅21分之後，立即報定副學士，不過好彩最後都順利入到大學嘅心儀學系，入讀香港城市大學到修讀媒體與傳播系，空餘時間佢都不忙增值自己，例如學日文、配音、唱歌等等，仲同哥哥一齊考普通話水平測試。轉眼間Jacky仔大學畢業，準備投身社會。

Jeffrey 2004至2008年活躍於TVB

哥哥Jeffrey同樣在2004至2008年活躍於TVB，參演了不少劇集，包括《皆大歡喜》、《西廂奇緣》、《宮心計》、《十兄弟》等。

Jeffrey喺《宮心計》中飾演杞王，係幫陳豪重掌朝政嘅關鍵人物。（圖片來源《宮心計》電視截圖）

令人印象深刻嘅，一定唔少得《十兄弟》裡面嘅「大喊十」啦！（圖片來源《宮心計》電視截圖）

中學讀喇沙靠《哈利波特》學好英文

中學時就讀喇沙書院嘅Jeffrey，原來升讀名校之初，都遇過挫折。王媽媽喺專訪中表示︰「哥哥考喇沙，係因為當時佢讀嗰間小學認為佢得，建議佢試吓，結果得咗。最初，佢英文程度一定唔夠人哋叻，中文就冇問題，咁啱嗰陣流行《哈利波特》，佢好沉迷，中文小說版每日可以睇七十幾頁，相反英文習作就睇得十幾版。我撕爛晒佢七本書，佢好傷心喺度喊，我同佢講如果你想睇，我會買番7本英文版俾你睇，送埋本字典俾你查。因為佢追緊結局，焗住要睇英文版，逐粒字查字典，我仲叫佢，見到啲覺得有用嘅句子就抄低。結果，3個月之內，佢英文成績跳升至全班第1。」王媽媽當初嘅狠下心腸，就造就咗兩兄弟嘅好成績喇！