結婚兩周年 王菀之 Eric So 晒恩愛合照
撰文：Sunday Kiss
圖片：王菀之Facebook、Instagram、新傳媒圖片庫
王菀之 蘇卓航 結婚兩周年
咁就結婚兩周年，Ivana上載兩人的合照，還寫道：「佢哋兩年前今日拉埋咗隻窗。」網友們都留言表示：「好閃呀！」仲話佢哋笑到見牙唔見眼！
難以忘記的求婚
好多情侶無論價值觀幾相似、相處幾夾，都未必會會進入人生另一個階段，問到Ivana當初點解會結婚，佢話：「佢（Eric）求婚我咪結囉！」唔好以為係個係一個好hea嘅答案，Ivana憶起當時求婚嘅過程仲好感動：「（當年）4月18號佢喺韓國有展覽，第二日係金像獎我要返香港先，好唔捨得，我去機場嗰陣，佢突然求婚，我攞住隻戒指好驚，猛問點解會咁，成程機個人空白咁，未process到件事，係咁喊，個激動到依家都好深刻。」
簡單的婚禮 由心而發的快樂
提到Ivana整個婚禮都一切從簡，何解未有大排筵席擺酒，佢認為：「第一，我自己個人唔做嘢嘅時候都係有啲怕醜同低調，第二，做artist呢行好多去event、 function同飲宴嘅機會，到自己嘅大日子冇咁fancy將佢變為好多嘢嘅一個節目，反而好想簡簡單單，譬如着婚紗平時做嘢都着過，對呢啲 fantasy會減低咗。朋友會個別再BBQ、飲嘢或者旅行慶祝。」王菀之的婚禮沒有豪華布置或筵開百多席，婚紗禮服也來得平易近人，原來所有的開心也是從心自發出來，快樂是來得簡單和直接。
王菀之五月時和「Figure王」老公Eric去旅行時，分享咗一條兩公婆喺泰國坐Tuk-Tuk嘅片，雞仔聲嘅Ivana仲同老公撒嬌，留言話：「考慮咗一陣，決定都係post，因為我自己都睇得好開心⋯ 同埋唔好意思，語氣係過份嗲咗少少，畢竟條片原本只屬私人珍藏！」
最懂撒嬌的女人
片段中，Ivana同Eric排排坐，不過車速就快咗啲，勁過香港啲紅VAN，嚇到Ivana不斷同老公講嘢分散注意力。佢一開頭就用把嬌嗲嘅聲同Eric講：「好似好危險咁嘅啲Tuk-Tuk，好快喎！」Eric就話係呀，Ivana就扁嘴話唔中意呀，想叫司機開慢啲喎！不過，期間Ivana聽到Tuk-Tuk引擎發出嘅聲音，轉個頭仲扮埋嗰啲引擎聲，頑皮得嚟非常可愛！Eric仲叫佢拍片要小心啲，全程捉到Ivana實一實，極之體貼。一分鐘都唔使就返到酒店，Ivana最後仲話好好玩！成個過程留意到Eric對Ivana嘅「撒嬌」非常受落，網民都紛紛留言大讚Ivana好cute，仲話佢係「最懂撒嬌的女人」呀！
兩公婆最夾係眼細？
有網民仲讚埋老公Eric話佢係世界上最好嘅老公，難得有男人不強求妻子扮成熟，反而欣賞佢嘅傻氣，羨慕Ivana係一個好幸福嘅女人。Ivana同Eric結婚兩年，仲keep住咁sweet，全因佢哋兩個其實有好多好夾嘅地方，Ivana笑言最似係大家都眼細：「大家都好聚焦，佢就聚落figure度，我就聚落啲音符度，所以好夾，哈哈！大家都好鍾意藝術，由買書到去旅行至到平 時做嘢花嘅時間都係喺創作度，佢創作佢嘅藝術品，我做我自己creative嘅project，到分享嘅時候就有好多嘢傾，價值觀就會好相同。」
