結婚7周年紀念日 陸永送紅玫瑰但老婆攰到瞓著咗

撰文：K | 圖片：missussix@ig、6wing_fama@ig

結婚7周年紀念日 陸永送紅玫瑰但老婆攰到瞓著咗

日前陸永於Insatgram 發佈一張相片，指當日是結婚7周年紀念日，預備了紅玫瑰諗住比驚喜老婆但老婆早已「瞓著咗」，仲用背脊對住佢！但原來陸永嫂並唔係因為有心訓著唔理老公精心準備的禮物，而是湊足一日女，攰到瞓著！陸永留言解釋「今朝一早佢車個女返學，跟住接放學，再車第二個女返學，再接放學，再車返屋企煮晚飯俾佢地食。。。我收工返黎，佢已經攰到訓死咗了，辛苦你了。」仲同老婆講「結婚七周年快樂，我愛你」，好冧呀！

陸永嫂回應：陪住我已經好浪漫！

而陸永嫂訓醒亦有回應老公，指老公成日陪住自己，已經好浪漫！「陪我一齊早起湊女，陪我一齊食早餐，陪我hea住打機等女放學，就算冇花我都覺得好浪漫… #所有時候精力已畀兩個女耗盡 #慶唔慶祝已經唔重要 」兩夫婦真係好甜蜜！

結婚6周年高呼我愛你

上年陸永都係用送花攻勢，仲話想準備驚喜冧老婆，點知就俾Reina識穿咗，無晒驚喜啦！佢喺社交網站發文話：「如果有個人好中意驚喜，而佢同時又會千方百計去識破你製造嘅驚喜，咁應該俾一個點樣嘅驚喜佢先至最驚喜？」雖然好似有啲怨言咁，但陸永最後都補多句「我愛你」，Reina收貨啦！

另一邊廂，Reina就發文表示多謝老公送嘅禮物。「聰明嘅女人識破所有驚喜實在太唔聰明喇… 多謝老公送嘅禮物，仲有呢紮花！六週年快樂！」雖然驚喜被識破，但睇嚟呢個係呢兩夫妻嘅樂趣？

結婚5周年再求婚

陸永前年就趁住佢同Reina結婚五周年紀念，同老婆再求婚氹下佢開心！當日Reina就在IG上載兩張相並留言︰「突然一束花，突然一首歌，突然一隻鑽戒，突然一大班人，突然被求婚。」

第一張相見到一大束紅色玫瑰，而另一張相就見到陸永跪地攬實Reina，四周有一班朋友影相拍片，Reina仲似乎感動到眼濕濕！有禮物有驚喜，相信陸太上年的紀念日相當難忘！

延伸閱讀 陸永一家四口幸福滿瀉

陸永近年多得Do姐提攜人氣急升，拍劇、拍戲、主持、廣告瓣瓣掂，佢同時係娛樂圈出名的愛妻號，與老婆Reina婚前婚後都非常恩愛，仲生咗2個好可愛的囡囡Hannah同Simsim，不時在網上晒家庭樂，羨煞旁人！

陸永老婆Reina第三胎不幸小產

有報道指陸永老婆Reina早前懷有第三胎，但不幸小產，後來與玄學家吳佩孚一起在紅磡的道壇做法事，超渡亡兒。陸永其後接受傳謀訪問時承認此事，坦言太太早前曾不幸小產，另外呢次係意外懷孕，目前都唔會考慮再追多個。

不過陸永強調佢同太太心情已經非常平伏，佢今日亦係開工中，兩夫妻並唔係外間所指咁悲傷，多謝大家的關心。