38歲蔣祖曼《羅密歐與祝英台》決鬥場面型到爆！17年前當後母視對繼子錫到燶

蔣祖曼分享動作場面花絮！ 拍完車面翻滾戲盤骨大髀瘀晒

英華（蔣祖曼 Joman 飾）於上周痛失愛兒皓仔（何珀廉飾）後性情大變，劇情中暴走的英華變本加厲，就算手下木村（張韡騰飾）苦勸事件另有蹺蹊，英華仍堅決鎖定羅家為復仇對象，揚言情願以死謝罪也要「有殺錯冇放過」。為阻止英華暴走，英台與山伯（陳豪飾）及羅密歐聯手展開激烈決鬥，英台因而單對單對密歐進行開槍特訓；決鬥期間，仇恨滿血的 Joman 一邊雙手持槍瘋狂開火、一邊腳踢車門更是型到核爆！

談到精彩對決場口，Joman 透露足足拍了兩天，自小已迷上香港動作電影的Joman，並笑言這才是自己真正的動作場面：

拍動作戲真係好難，既要有體能、亦要同時控制動作、演戲及節奏，仲要同對手配合；所以如果經驗唔夠，控制得到個動作嚟、又控制唔到個樣，搞掂晒又有機會落錯位。嗰場戲有個鏡頭係我喺車面上翻完身再落嚟，望落雖然好短，但如果落錯位好易『銀』到盤骨，嗰日拍完我返到屋企、先發現自己盤骨大髀瘀晒，但演員嘅通病就係咁，一 Action就咩都唔記得晒。

分享幕後照大讚陳茵媺：我都想聚佢做老婆

Joman自言好鐘意Aimee，又nice而且毫無架子，令她可順利進入拍攝狀態：

Aimee係一個好勤力好硬淨堅強嘅人，我完全想像唔到一個唔識睇中文嘅人係點樣去背咁多中文台詞，佢嘅腰有傷，但我見住佢訓練從不缺席之餘仲另外會做Gym，每一場動作戲都不留餘力。而且佢係有一種令你好舒服嘅吸引力，佢笑起上嚟好sweet你都會跟住佢笑㗎，我係男人嘅話我都想娶佢做老婆！

蔣祖曼入行20年 顏值、演技兼備

現年38歲的蔣祖曼自2001年於《Y2K+01》演出，入行至今已經超過20年，曾參演過不少獨立電影、商業電影，如《圍城》、《竊聽風雲2》等。近年，她參與過幾部電視劇集的演出，包括《詭探》、《警界線》、《火速救兵4》等，當中有在TVB劇集《使徒行者2》、《鐵探》、《使徒行者3》演出過。

視繼子如己出做個好繼母

蔣祖曼幕前形象剛烈，但現象生活卻相反，她曾表示在20歲時有一段苦戀，當時男友沉迷賭博負債纍纍，蔣祖曼不惜一邊在餐廳打工、一邊拍劇為對方還債，不過男方竟瘋狂出軌，仲試過追自己的朋友，最終忍痛斬纜。

Joman 21歲開始同任職電影幕後的陳卓麒Keith拍拖，對方與前妻育有未滿一歲的兒子陳滌Day，但其後前妻因病離世，所以她接棒照顧Day，拍拖時一直都是三人行，從無二人世界。她直言自己一早知對方有小朋友，拍拖時沒有考慮那麼多，也沒有想到很長遠，所以已習慣一直以來三人行的拍拖模式：「我愛佢，我愛埋佢小朋友都好正常。」

蔣祖曼拒做直升機家長

蔣祖曼同老公同樣係行內人，有時兩公婆都要互相配合工作時間，以最唔影響照顧小朋友為前題，如果真係冇時間就會搵家人照顧。蔣祖曼曾表示，自己對於孩子嘅態度十分放開，認為同小朋友都應該有自己嘅空間，因為喺唔喺屋企對小朋友成長未必有大幫助，有時唔喺小朋友身旁反而令佢哋更獨立。另外，蔣祖曼認為父母應該鼓勵小朋友去搵自己嘅興趣，所以唔會直升機媽媽。

蔣祖曼為繼子追個妹妹

蔣祖曼同老公於2014年結婚，婚後一年誕下囡囡陳可。蔣祖曼曾表示，當初想為陳家添個小朋友，最大原因是繼子Day想有細佬妹，「計劃生育前我第一個問佢想唔想要細佬妹先，佢話想呀，我問如果我真係唔生小朋友，你會點呀？佢話『我會嬲你囉，依家就嬲！』」Day自細就恨有細佬妹，最好是妹妹。當年爸爸與蔣祖曼結婚，他更以為一結婚就自動大肚，令她哭笑不得，「佢以為會單性繁殖！」

三人行睇超聲波

當時Day得知繼母懷孕後，表現得非常興奮，經常摸蔣祖曼肚子，連睇超聲波都是三人行，希望第一個得知BB性別，「照超聲波我同先生帶埋佢去，佢仲緊張過爸爸，係咁捽手問醫生仔定女，醫生話係女，但佢都質疑：『依家話係女啫，出咗世可能變咗仔㗎！』」好多父母都驚哥哥會呷細佬妹醋，但蔣祖曼好放心，因為Day太喜歡妹妹，但出現了另一煩惱，「我問佢想做一個點樣嘅哥哥，佢話一定會縱壞妹妹，叫我千祈唔好俾佢湊㖭呀！講嘢幾老積呀！」

蔣祖曼因繼仔唔認阿媽而喊

蔣祖曼表示，最令她難受是繼子Day剛懂事的年齡，回想起都有點眼濕濕，「我一向冇縱佢，曳我會罰，乖就會獎。幼稚園有段時間幾反叛，佢話：『你鬧我嗰時，我覺得你唔係我阿媽，你錫我先覺。』我即刻入廚房狂喊！」親生媽媽早已過身，Day不了解母親的角色是怎樣，蔣祖曼感慨道：「其實我都明嘅，佢唔係好知道究竟一個媽咪係點，佢只係睇電視認識，卡通片啲媽咪唔鬧人架嘛。有次佢問我朋友，如果你媽咪叫你做功課，你會唔會覺得佢好煩？我朋友話梗係會啦。嗰一刻我就知道，原來佢以為我鬧佢係唔錫佢，唔知道我係出於關心，依家大個咗佢就明白喇。我份人好直，有咩都講晒出嚟，佢都好明白我諗乜，所以相處得好好。」