花蛋全攻略 迪士尼 明星春日嘉年華

其實小小豬都有一段時間冇入園玩，加上上一年嘅花蛋節小小豬都搵蛋搵得非常開心，所以當佢知道今年又可以入嚟搵蛋時，佢都真係超級興奮，未出發就已經全身作戰狀態啦~

花蛋全攻略 迪士尼 明星春日嘉年華

比起上年嘅花蛋節，今年陣容就更加強大，一百隻迪士尼朋友花蛋隱身係樂園唔同角落，各位大小朋友齊齊嚟「猜猜誰‧尋尋蛋」。當然，小小豬亦都將依個活動視為最重點任務，一定要搵齊一百隻花蛋先肯離開呀！
一入園就已經見到醫神同阿廣啦~

成班玩轉腦朋友嘅主角就係動畫藝術廊等緊我地啦~~

今年新登場嘅阿力與朱迪~

大街中央小花槽中就可以見到一眾主角人物呀~

城堡旁邊就可以搵到七個小矮人~

小小豬至愛嘅毛毛同大眼就係大街尾段出現呀~

係搵花蛋嘅時候，千其唔好漏左睡公主城堡嘅園藝場景，三個場景都好有春日氣氛呀~

哈哈哈…依張相又好似影得我地好SWEET哦~

一心入嚟搵花蛋嘅小小豬叫佢陪我影相又真係好似好慘咁，所以佢一影完就即刻去明日世界繼續搵啦！
一嚟到就見到樹人同火箭依兩粒新花蛋~

當然唔可以少左星球大戰嘅一眾主角啦~

樂園最新主角之一嘅Iron Man就緊係有佢份啦~

新花蛋嘅蜘蛛俠同蟻俠可以話係眾多花蛋中最難搵到嘅，小小豬出茅招，問職員姐姐先知道佢地係邊呀~

當我地走入幻想世界，就已經見到一眾愛麗絲夢遊仙境主角~

仲有小熊維尼家族添~

小小豬另一至愛小白~

小小豬留心一望，指住城堡上大叫，原來佢搵到奇妙仙子呀~

近期美女與野獸大熱，新花蛋又點可以冇佢地份呢~

3D劇場前又可以搵到魔法師米奇~

我地就繼續轉戰探險世界，係水上面就可以搵到多莉同MO仔~

獅子王劇場搵到辛巴同佢嘅兩位最好朋友呀~

獅子王劇場對面就可以搵到泰山嘅三位主角，三粒都係新花蛋嚟呀~

新花蛋仲有魔海奇緣嘅小雞同豬包~

反斗奇兵大本營嘅朋友仔我諗大家都好易搵到啦~

千其唔好漏左迷離莊園嘅阿拔~

同埋灰熊山谷嘅一眾熊寶寶呀~

幾經辛苦(我指我…因為陪住小小豬周圍行都幾攰，不過隻豬仔又極度興奮，所以都冇計啦！)終於搵齊晒一百隻花蛋，時間剛剛好我地就睇花車巡遊啦！
今次依個係全新巡遊以「迪士尼明星嘉年華列車」為主題，一眾迪士尼明星著上春日新裝，仲有好多人物加入車隊行列，最重要係有我至愛MARRIE同DUFFY，絕對要推介呀~

冇睇過星戰嘅小朋友(相信佢係聽得SY哥哥講多…哈哈哈)一聽到話BB-8嚟左同大家影相，所以就話要去同BB-8影相啦~

為左依個春日嘉年華，都會舉行迪士尼明星：本月之星」活動，我地可以係小鎮大街跟當日之星影相互動一番呀~

不過….因為實在太受歡迎，五點鐘嘅拍照環節我地四點五十五分去到都已經截龍，真係有丁點失望，唯有遠遠影一張《美女與野獸》止咳先啦~

雖然影唔到《美女與野獸》，不過小小豬好快就開心返，之前嚟到冇俾揀中，今次終於可以成功同到白兵影相~

今日我真係可以話超額完成，小小豬就完全放電，因為真係可以話由天光玩到天黑，係樂園入面都不知行左幾多轉為搵花蛋。真心好鐘意今依個迪士尼明星春日嘉年華，因為周圍環境都好有春日氣氛，望住啲咁靚嘅花花佈置，真係人都開心啲啦！
我自己又好鐘意搵花蛋依一部分，每一隻花蛋都靚靚吸引唔在講，將佢地分佈唔同園區要小朋友搵，都真係幾考小朋友嘅觀察力，同埋考佢地嘅堅持度。就以小小豬為例，當佢知道仲欠兩隻時，佢真係要堅持搵埋佢，就算我話帶佢去玩巴斯光年，佢都唔肯，話一定要搵齊先安心呀！
當日在場都見好多家長及小朋友都圍住花蛋不停細聲講大聲笑又開心拍照留念，所以唔止我同小小豬，應該好多大小朋友都愛依個活動，所以希望出年都仿然有得搵花蛋，最好就加多好多唔同角式花蛋啦…..哈哈哈！

BY 小小豬的成長日誌