小童茶餐廳食到成地都係 港媽玩手機兼制止職員拖地 食客一句鬧爆自私家長

港媽全程玩手機 任由小童離開茶餐廳座位

有網民在Facebook專頁「生仔要考牌系列」匿名投稿，指近日獨自去餐廳吃早餐，遇到一家四口坐在通道對面的餐桌上。等候食物時，他看到兩位貌似三、四年班大的小朋友多次離開座位，走出、·走入餐廳。期間職員有禮貌地提醒會有熱水及手推車經過，請小孩安坐等候，惟父母完全沒有理會勸喻，只顧用手機，他形容他們一家：「父母可能有幾百萬生意」。

小童邊食邊玩手機 食到成地都係

食物上菜後，由於小朋友不夠高，於是跪在座位上用餐。兩個小朋友一邊看手機一邊食飯，結果弄到整枱都是食物，甚至部分連汁的食物及大量餐紙等跌落到通道地上，職員見狀就拿拖把來清理。

港媽開聲制止職員拖地

沒想到該港媽「以為自己食緊五星級酒店」竟阻止職員的清潔，要求待他們吃完離開再打掃。由於早餐時段人流量大，忙碌的職員仍有禮貌地解釋：「如果唔即刻拖，一陣間有機會跣到其他客人」。

食客一句話鬧爆自私家長港媽黑面教訓小孩

網民看不過眼開聲批評：「唔拖？你係咪依家自己抹返？一陣跣到其他人係咪入你數？」連搭枱的男食客都話：「你兩個小朋友一路食一路跌，你自己唔處理，人哋已經好忙仲要幫你抹，你仲好意思咁樣講嘢？」

港媽聞言即黑口黑面教訓小孩：「掛住睇手機，跌到周圍都係，被人鬧啦！」而該港爸全程沉迷手機。網民最後批評事件中的家長應該自我檢討：「餐廳職員都係人，畀啲尊重，畀啲包容。」。

網民批評港媽：教唔掂就唔好生

帖文掀起熱烈討論，不少網民都認同網民做法：「好多情況真係要周邊嘅人出聲，職員出聲一定得到一句「我要投訴你」嘅回覆」、「欣賞po主和對面位先生一同開聲」、「無家教之下，害己害人」。另外，有網民批評該對父母，指家長不應該掛住玩手機而不看顧細路：「最憎父母掛住玩手機唔理細路」、「好心自己都教唔掂就唔好生！」、「跣到人真係好大鑊，可大可小。」

資料授權：Facebook「生仔要考牌系列」