葉翠翠三年抱三後歷盡大劫 細仔及老公曾危在旦夕 剖白輕生前心路歷程
葉翠翠罕談兩度患抑鬱症歷程
2005年港姐冠軍葉翠翠近日接受資深傳媒人汪曼玲的訪問中，毫不掩飾地揭露了自己的內心世界，包括兩次抑鬱症的經歷以及家庭中接連發生的磨難。
第一次抑鬱症：剖白計劃輕生前兩天心路歷程
葉翠翠首次經歷抑鬱是在誕下第三名兒子三個月後：「第一次係生完第3個小朋友嘅3個月之後，因為我喺過去幾年，生小朋友都好密，可能一個小朋友出世後，跟住幾個月又有咗，個腦都未Ready，嗰陣生完小朋友就搬屋，好多嘢搞，搬嘢執嘢，突然間會發現自己無故坐喺度喊，係不自覺嘅，就算唔諗嘢都會喊，總之無端端就會喊，覺得好辛苦，人生冇意義，持續半年，去到最後時間，好規律地每一天到下午，小朋友瞓覺，我就入廁所匿埋鎖門，坐地下喊：『點解會咁㗎？』」
葉翠翠講述自己在家中廁所崩潰的經過， 曾經在廁所裡哭喊了很長時間，直到家人下班回家，她才離開，好像什麼都沒有發生過一樣。翠翠指自己當時已拿起了輕生的工具，構思了一整個情節：
「最嚴重嘅時候，曾試過攞輕生工具，又試過喺浴缸放水，已諗好晒成個畫面。」
打算在輕生前兩天，翠翠坐在那裡哭了很久，然後想：「『如果我咁樣走咗，我個仔會唔記得我』，於是又喊了，『係喎，佢哋真係唔記得我喎，我做乜嘢呀？』」這時，她想起誕下三名兒子後便患上了這種病，於是決心走出廁所，「我想，如果狀態再持續幾天，我就撐不住了。幸好在最後兩天，我聽到了要幫助自己的聲音」。
葉翠翠當時想到唯一的方法就是做運動，「但我唔願意離開間屋，即刻買太空漫步機﹑健身單車，好快送到，堅持日日做運動1小時，做咗半年，真係咁樣做運動走番出嚟，要自己幫自己先得，點樣令自己走出嚟。」葉翠翠描述了自己如何在絕望中尋找出路，最終通過購買健身器材並堅持每天運動，逐步走出了抑鬱的陰影。
第二次抑鬱：後悔信錯一個人
可是在兩年前，葉翠翠抑鬱症復發：「當時我錯信一個人，累我損失咗天文數字，唔止一百幾十萬，而係好龐大嘅數字。我當時心理好唔平衡，我咁辛苦去工作，因為係人哋嘅錯蒙受咁大損失，除咗冇咗好多錢之外，要搞番好件事承受咗好大壓力。」
作為KOL的葉翠翠需要每晚做直播，有時卻不由自主爆喊，有粉絲更察覺到她有異樣，會馬上留言鼓勵她。葉翠翠坦言當時是全靠做直播和與粉絲互動才捱過來，故此她堅持每晚舉行 直播：「第二次低潮係靠粉絲捱過。當時我一定會做直播，道理同運動一樣，我話畀自己聽一定要做到，唔係就咩都做唔到。」
葉翠翠孻仔病情不能逆轉 險失去性命
在葉翠翠努力克服個人健康問題的同時，家庭中又發生了一連串的不幸。當葉翠翠逐漸走出抑鬱陰霾器期間，卻發現孻仔有問題，2020年誕下三仔後不久，翠翠已察覺他有異樣，不過老公卻指她多疑。
直到仔仔1歲零3﹑4個月，有中醫朋友勸喻翠翠要帶仔仔看醫生：「『我嗰半年做運動，之後點解冇做，有個中醫朋友嚟我屋企，見到我個仔真係有少少問題，叫我帶佢睇醫生，我即刻約醫生，第二日去睇，睇完已經係不能逆轉地步，要即刻入院，一開始睇私家（醫院），但私家幫唔到，要去政府（醫院），之後排山倒海治療做手術，每天喺醫院度過，然後我好自責，自己發瘟（抑鬱）半年，不停做運動，醫生話媽媽好彩鍥而不捨，如果唔係冇㗎喇，然後要照顧佢。」
醫生向葉翠翠表示，幸好她鍥而不捨地醫治細仔，否則他很可能失去性命。其後，孻仔即時被送入政府醫院做手術，看到插到周身後喉的孻仔，媽媽葉翠翠大感心痛自責。
輪到老公出事 葉翠翠：當時他入院是以月計
最後，孻仔最終保住了性命，現時是一名長期病患者，須要經常進出醫院。當孻仔情況穩定下來，想不到輪到丈夫Raymond出事。
翠翠透露，當時她發現老公臉色欠佳，著他前往醫院檢查，起初他說自己沒事，怎料檢查完畢後，醫院立即叫他入院，「當時他入院是以月計」，有想過帶老公到內地醫治，但因為當時正值疫情，需要隔離兩至三星期，但醫生指病人根本捱不到隔離日數，故最後決定留港醫治，幸好大步檻過。
葉翠翠婚姻現危機？ 社交網失望留言：我為咗頭家傾盡所有 19年斥9千萬買獨立屋
葉翠翠確診焦慮症：覺得屋企有鬼
不過在這艱難的過程中，曾患抑鬱症的葉翠翠確診了焦慮症。面對種種的家事， 葉翠翠坦言當時以為屋企有鬼：「嗰陣屋企發生咁多事，我直頭覺得屋企係有鬼，我真係搵咗個捉鬼師傅上嚟，但佢話我屋企冇（鬼），所以我都安心些少。」
經歷不僅考驗了葉翠翠的心理承受能力，也展示了她作為母親和妻子的堅韌不拔。葉翠翠的經歷不僅是關於名人的光鮮亮麗，更是一段關於母愛、妻子責任與自我救贖的深刻旅程。她的坦白不僅讓人感受到名人背後的真實生活，也提供了對抗抑鬱症的勇氣和方法。
網民稱讚葉翠翠：我都未必撐得住
葉翠翠受訪片段播出後，很多網民、甚至粉絲都感到震驚，因為一直看直播都絲毫不覺葉翠翠有任何異樣，稱讚她是一位堅強的媽媽和妻子，有人更表示非常佩服她「我未必撐得住」：
- 「估不到翠翠近年經歷這麼多，面對人生嘅高高低低，仍然咁正向，好堅強!仔仔有妳，先生有妳，真係佢哋嘅福氣。妳都要好好愛鍚自己吖。」
- 「好坦白，好真，不似其他只說自己幾幸福」
- 「翠翠，你真喺好叻好有智慧，我由心底裡佩服和向你致敬。翠翠理性，有智慧，愛家庭，對你刮目相看(以前負面新聞)。若果是我，除了自身，家中至愛亦接二連三遭遇大劫，我想我未必撐得住。翠翠加油，祝福你和家人身體健康，平平安安，齊齊整整」
- 「堅強嘅人真係慘，有病都無人信，我相信你，翠翠加油啊」
- 「葉翠翠的生活真的不容易、辛苦妳了、堅強的母親、帶三個小孩十分不容易的❤加油加油」
- 「平時見佢fb直播帶貨，完全睇唔出佢曾遇過咁大問題，真係為母則強，母親真偉大。」
- 「葉翠翠真係一個好堅強嘅妻子同埋媽媽！翠翠仲要照顧三個小朋友！我成日唸佢點樣可以一個照顧三個呢？翠翠一定好辛苦壓力一定好大！工人又吾聴話！
我都係佢粉絲有睇佢平時直播！記得佢幾年前有隻公主白貓成日都陪住佢㗎！每次直播白貓就好似佢守護神一直陪住翠翠！但係都知道公主白貓離開咗啦
原來翠翠呢幾年受到咁大嘅壓力！你真的好埾強！辛苦了
葉翠翠俾人一個好堅強嘅感覺，但係我知道佢內心都係有軟弱嘅一面！
翠翠加油❤祝你們身體健康，未來一切都會順利」 - 「佢生完兩個仲算keep 到，有一排成日睇佢直播，隔了一排生完第三個再睇，已覺佢氣色好差，以為只未復完，原來發生咁多事，照顧三個小朋友真唔容易」
防止自殺求助熱線：
香港撒瑪利亞防止自殺會：2389 2222
生命熱線：2382 0000
明愛向晴軒：18288
社會福利署：2343 2255
撒瑪利亞會熱線(多種語言)：2896 0000
東華三院芷若園：18281
醫管局精神健康專線：2466 7350
「情緒通」精神健康支援熱線：18111
賽馬會青少年情緒健康網上支援平台「Open 噏」：http://www.openup.hk
