蕭正楠細數初入行辛酸 講錯嘢拖累事業 爆翠如有3事不懂自理 人生喊過2次全因佢

蕭正楠爸爸患病家貧 為養家一星期返足七日工

蕭正楠十分獨立，因為家庭經濟困難，爸爸是長期病患者，所以他小學開始就會找臨時工，養活自己、減輕父母的壓力，到中學時，他已經會給予父母少許家用。他一直以來腳踏實地去賺錢，任職過不少工作如客服中心、擔任廣告的小模特兒。他最高峰時期是整個星期一至日都有工作，努力工作賺錢，希望令父母安心，

傳講錯一句被封殺

蕭正楠於00年代入行，成為歌手出道。最初一兩年，他忙於表演，錄音等工作，其後因為公開說了一句「邪不能勝正」，被指影射競爭對手麥浚龍，有傳惹怒麥父，封殺他，故他就轉移內地發展。

可惜，當年他沒有拍攝的機會，星途陷入谷底。之後他回到香港，有幸獲安排在《戀愛自由式》擔正做男主角，其後他憑電影《六樓後座》榮獲第23屆香港電影金像獎提名「最佳新演員」，從歌手慢慢轉型成演員。之後他再次到內地發展。

牛魔蕭母為他戒食牛肉

身為牛魔的蕭媽媽為了勸服蕭正楠回港工作，表示只要他可以回到自己身邊，願意永遠戒食牛肉，令他深受感動: 「我媽咪肯戒食牛肉，換我返香港做嘢，我真係好感動，我願意為咗佢返香港重新嚟過，我返到香港之後咩工都會試，例如做介紹樓宇嘅工作，節目主持人，有咩做就接，唔會揀job。」

被問到在娛樂圈有沒有對自己定位，他回應: 「其實無，我淨係想大家慢慢透過作品認識到我，以前啱啱就係覺得做就得，唔會去解釋，身邊嘅人對我有誤會，覺得我份人好串，今次返嚟之後，我都願意同人溝通合作，避免產生隔閡。」林盛斌表示，自己所認識的蕭正楠是一個樂天、正能量，以及十分照顧別人的人。

直言無想過追黃翠如

蕭正楠與黃翠如的感情很好，羡煞旁人，被問到對黃翠如的第一印象，他神回覆：「其實佢份人真係好粗魯，好多大頭蝦嘅嘢會發生喺佢身上，我同佢合作開頭，係完全無諗過追佢，淨係覺得佢個人心地好好，同事有咩問題都會主動去關心，安慰其他人。喺娛樂圈好難遇到無機心嘅人，慢慢被佢吸引咗，留意佢多咗，到之後發覺部戲就做完會見唔到佢，先察覺自己好似鍾意咗佢」。

身為蕭正楠同黃翠如好友的林盛斌亦直言: 「黃翠如唔係蕭正楠理想情人嘅標準，完全唔同類型。」蕭正楠語出驚人: 「翠如根本係一個男仔，完全唔識打扮同照顧自己，煮餐飯都可以切親手指，煲個飯都可以辣親自己，又會成日發生蝦碌嘅嘢，食咗啲過期變壞嘅嘢都唔知，真係令我好擔心佢，好想照顧佢。」

自爆首次求婚失敗 兩次喊都是因為黃翠如

另外林盛斌亦問蕭正楠: 「當初你直接喺頒獎禮上公開黃翠如係蕭太嘅身份真係令人好難忘，我哋都想知道你點求婚喎。」

他表示: 「我係喺英國同佢求婚㗎，但係第一次係喺翠如不知情下失敗左，因為我本身諗住喺樂園玩過山車衝落去個吓同佢求婚，點知佢太緊張無理過我就衰咗第一次。咁過咗幾日，我哋經過一座好莊嚴嘅教堂，我覺得係時候，係呢個感覺，就咁舉高咗隻戒指同佢求婚，完全無講過其他嘢，個下真係好緊張，個腦一片空白，準備咗好多嘢同佢講都諗唔到，淨係講到幾句説話，好彩最後佢都應承咗我咋，最後我都補左封信講畀佢知嘅。」他揚言自己是一個不感性的人，但是人生兩次喊都是關於翠如，一次是求婚，另一次是在紐西蘭同她結婚的時候。

黃翠如不懂自理 為她護航：唔係完全傻

蕭正楠與黃翠如的生活點滴，都會分享在網上平台，字裡行間都透露充滿愛，甜蜜的感覺。正如他分享他早前去竹篙灣隔離營時，很擔心翠如不能照顧自己，所以隔離9日前，他亦準備9日的食物給她 : 「其實咁耐以來佢都進步咗好多，逐漸可以照顧自己，我去完隔離後佢煮咗餐宵夜俾我，係好感動，但係啲食物味道係可以發出酸臭味，黃翠如原來係用9日前隔離準備嘅肉，煮番畀我食。」

林盛斌聽後開始懷疑黃翠如的智商，他替翠如反映: 「佢依家都學識接衫洗碗，唔係完全係傻。」場面一度失控，發放不少笑彈。

早前蕭正楠北上搵銀遇上疫情，黃翠如更到上海搵老公，在網上上載二人合照，留言：「走了一個大圈，找回我的電池。」表示老公就是她最好的心靈良藥。她也不時出post分享與對方「遊山玩水」的點滴，可見他們無論在何時何地發生甚麼事，有心都可以維繫感情，令網民覺得他們真稱得上「遇到對的人」。