衝破火劫 化身無敵鐵金剛

不提昔日火災 向前看

接受及出席過無數訪問、分享會的Stanley，昔日經歷已像老掉牙的故事，事隔十八年，他不再回首，只求向前，積極投入生命教育工作。Stanley中一時遇上山火，燒傷痕跡清晰地烙印在身上，筆者問他那時是人生最艱苦的時刻嗎？他說最艱難日子是赴美留學時期。療傷時，他不能四處去，在家中看書，開始鑽進學術世界，中二成績更因而有進步，中三赴英參加交流團後，知道世界多大，十八歲那年，決定到美國留學。「我有興趣讀心理學，研究『人』，美國心理學排第一，當然揀美國，我係為咗戴四方帽過美國。嗰時壓力一個人面對，一個人照顧自己，生活從頭適應，頭兩年去KFC，連to go同eatin都唔知係咩？生活英語難倒我。不過，我同自己講，為咗頂四方帽，客死異鄉都唔怕。」

無懼歧視 赴美留學

Stanley不在乎自己創傷，反而自信滿滿，因為他知道別人怎樣看自己是建立於自己的態度上。「同學有好多唔同種族，嗰邊最特別係唔care你係邊個，問到我創傷，照話俾佢哋知，佢哋說句Oh! So sorry to hear that好尊重我。」赴海外留學讓他學會獨立，加速成長。他說美國的大學「易入難出」，畢業門檻很高，Stanley只花短短四年就畢業於三藩市州立大學心理學系。回港，他在中大繼續進修，2010年畢業後，現時又在教院讀博士。「一日未死，都唔可以話自己做唔到，只可話未做到。」學術上取得成績，在發掘興趣上，也積極嘗試，燒傷後截手指、聽覺受損的Stanley，還是學曉唱歌、打鼓。他自稱喜歡交朋結友、思考人生及談笑風生！而興趣是讀書、長跑、潛水、旅行、夾Band，以及陪娘子大人及寶貝兒。

照顧愛兒 頂硬上

在Stanley的人生中，像是不怕任何大大小小的難關。他致力於推廣正向生命教育、學會於逆境中成長，自己正是個樣辦。正如失去手指打字慢，善用語音輸入siri，就可以打萬字論文、寫專欄、出書；兒子出生，榮升爸爸，就硬着頭皮湊仔，由「P牌爸爸」學起。兒子恩博一年多前出世， 暱稱是「卡索B」，是Stanley看到太太懷着BB時的超聲波照時，覺得十分抽象，借畫家畢卡索之名而取。而本名「張恩博」充滿意思，希望愛兒生命充滿恩典及保持感恩的心，以認真態度努力學習，然後用知識貢獻世界。
太太Rainbow有全職工作，Stanley忙讀書、工作及義工外，亦會花時間照顧兒子。恩博還是嬰兒時期，手部不靈活的Stanley將替BB沖涼、換片的工作交由太太負責，現時Stanley頂硬上，幫忙照顧兒子起居飲食，體現了從逆境中學習。獲心理學學士、社工碩士資格，經常擔任演講嘉賓的Stanley，更主力擔任「教育部」工作。訪問之時，恩博大約十六個月大，Stanley坦言面對很多教仔新挑戰。「以前佢瞓喺度，基本睇實佢，我都仲可以做自己嘢，依家開始忙其他，為咗幫佢報PN班，寫咗篇家長論文俾學校，仲認真過寫論文。佢將會讀香港教育學院滙豐幼兒發展中心。我自己做生命教育，好認同小朋友要探索模式學習，讀書問題不是求分數，而是學習動機，教佢做人最深處……」一談到兒子教育藍圖，Stanley滔滔不絕發表意見，表示這間幼兒學校是非讀不可。

不一樣的爸爸

恩博年紀還小，但爸媽對他已滿腹期望。Stanley說：「我身邊一直有很多人支持、幫忙，佢有好多契爸契媽錫，我希望恩博學識感恩，唔一定好似我咁成為博士，最重要係知道社會現實。與其死讀書去換證書，不如體驗唔同經歷，我會俾好多資源佢嘗試，帶佢潛水、將我套鼓留俾他，契爺契媽又可以成為導師，教佢學好多，佢有興趣先繼續學。最緊要係，我絕對唔允許恩博變成不負責任、沒常識、事事由人代勞嘅港孩。第日四處都係港孩，點同佢鬥？」問到將來怎樣跟兒子解釋爸爸不一樣？Stanley說：「我唔心急，等佢主動問我時，咪解釋，坦白講，我有次行山遇火燒，手指熟咗，咪切走佢。兩邊睇，我係有咁嘅經歷，係事實改變唔到，但反轉睇，我用自己感受、學到嘅用於社會，就係咁，社會地位都幾高。如果朋友仔問佢，點解爸爸跟普通人唔一樣，佢有責任將我介紹俾朋友識。或者佢會答： 我爸爸係唔一樣，好厲害，又出書、又四處演講，雖然係平民，但廿五歲時已經拎咗傑青。我唔會set model answer，而佢亦唔應該自卑，反而要自豪有咁叻嘅老竇，做人唔使謙虛，要有自信。」

災後義工 影響生命

「以生命影響生命，以行動傳遞感動」是Stanley的宗旨。Stanley一直用行動引領兒子探索生命。早前，災禍連連，他放棄在家陪伴妻兒，隨無國界社工出隊往四川探訪，又到台灣等各地提供心靈支援服務。站在災民前，過來人分享從來都是最有說服力，雖然Stanley說這份工作一點都不好受，看着災民驚惶跟無助，情緒支援工作根本做不完，但仍會堅持下去。「我希望將來恩博了解我做嘅事，一齊經歷，一齊做義工。現時，只希望佢健康開心，喺學校識到朋友、玩得開心。」Stanley強調不想兒子受他影響，希望憑經歷所感，建立自己的想法，成為比他更厲害的人。

●撰文：Esther Ngan

●攝影：Paul Choi（i部分相片由受訪者提供）