【必學！】簡單拆新襪招牌方法
廣告
相信唔少人開一對新襪嘅時候都會遇都幾個問題，「點先可以輕鬆整走新襪嘅塑膠索？」、「點解對對都會有個小銀夾喺度？」拆新襪時最煩就係遇到呢啲問題！不過，原來有個好簡單嘅方法，可以喺唔使用剪刀同唔整爛對襪嘅情況下，整走個塑膠索。而且，原來個小銀夾係十分有用，依家就話畀大家聽點解啦！
撰文：Kammy｜圖片來源：Kammy，unsplash，Youtube
簡單拆襪招牌方法
唔少人都一定有開新襪嘅經驗，通常喺對新襪上都會有條縫線，或者塑膠索、俗稱「T型塑膠釘」嚟連住對襪同招牌，好多時都要搵剪刀去剪走佢，但有時仲會唔小心剪到對襪，搞到有瑕疵！
其實，大家可以用手捏住T字橫條，以佢為軸心，之後就不停旋轉轉對襪，塑膠釘就會因為咁而斷掉！大家學識咗呢個方法之後，就唔使成日都喺度揾剪刀喇！不過，如果係用縫線方式嘅新襪就唔啱用呢個方法喇。
應保留新襪上的「小銀夾」
另外，基本上每對新襪都會有個小銀夾去夾兩隻襪，好多時見到呢個夾都會直接拆走。不過，原來呢個小銀夾係十分之有用，佢嘅設計其實係用嚟剪線頭用，唔少人知道咗之後都大為震驚！
大家首先攞走個夾，並將佢拉直，之後將小銀夾穿過襪嘅縫線同招牌之間。其後，大家只要捏著小銀夾，再旋轉幾圈，襪上嘅縫線會自動斷開。大家記得以後唔好再浪費個夾喇！
