港女因男友連累未能進入M+博物館 嬲爆力數另一半3宗罪「好似湊仔咁」
廣告
情侶拍拖後難免會發現更多對方的優缺點。但若然伴侶缺點愈搵愈多，伴侶又冇心改變，感情恐怕只會一落千丈。最近有女網民在討論區發文，大呻本身約男友去M+博物館，最後卻被男友連累而未能入場。女網民愈講愈多男友缺點，直言與男友相處「好似湊仔咁」，引起網民熱議。
港女力數男友3宗罪
最近有網民在連登討論區發文，力數男友3宗罪，直斥男友無時間觀念、無記性和無責任心，更無奈大呻「人拍拖我拍拖，點解我拍到好似湊仔咁」。
01 ｜無時間觀念
事主表示原本與男友預約4-6點去M+博物館，「咁我就expect係4點入場睇到6點呢個意思架啦，點知我3點9喺太子send張相畀佢，佢竟然話咁快，最後我喺九龍站等佢等到差唔多5點佢先到」。男友到場後沒有向事主道歉就直接入場，女友怒轟「有冇一次唔係我等你？你book咗4-6，suppose就係4點左右到，你expect幾點」，男友反指女友無講清楚到達時間，「使咩咁心急姐？幾點入都得架啦，邊有人得閒check住你幾點走」，之後更掛著打卡影夕陽，最後接近5點9先去到M+，結果門口保安預約時間已過為由，拒絕讓他們入場。
02 ｜無責任心
男友最近返的新工是透過女友的朋友介紹，怎料返工第4日，朋友突然打來問事主男友為何無返工，事主與朋友不斷致電男友，最後男友11點半先起身。事主超級無奈「好彩我朋友今次幫佢拆掂咗，但我朋友都畀佢嚇餐死，人地用自己credit推薦你，你就咁樣浪費人地credit」。
03 ｜無記性
事主的朋友與男友夾份訂貓糧，結果貨到後約好交收時間，男友卻遲遲未出現，男友致電事主指「死喇我唔記得咗，頭先ot完老細車咗我返屋企」。事主指一早提醒過男友要拎貓糧，「我知佢無乜記性，已經5點果陣我提過佢，轉個頭都可以唔記得，佢話佢果陣忙緊」。
網民建議樓主與男友分手
不少網民紛紛留言，建議樓主與男友分手，「快啲分手，細路仔嚟，拍得耐都辛苦」、「呢啲其實係聰明底，識計到盡啲時間」，不過有網民覺得應該要互相遷就，「你諗下你當初點解會同佢一齊，一齊前唔係了解咗佢係咁嘅人啦咩」、「有咩問題，如果佢性格唔係咁差你都唔會同佢一齊啦，依家似你有問題多啲喎」。
圖片來源：西九文化區官網、連登截圖、《愛回家之開心速遞》劇照、TVB《不懂撒嬌的女人》劇照、《氣象廳的人們：社內戀愛殘酷史篇》劇照、Facebook@West Kowloon Cultural District 西九文化區、電影《怪胎》劇照
