診所遇到燒傷毀容姐姐 小女孩好奇一問 結果⋯⋯

原文：珍寶豬@診所低能奇觀 （文章得作者授權轉載）圖片：PhotoAC

原文如下：

有日診所內有一位後生女加一對母女。
母女登記後，位小朋友由登記處行到坐位旁，一直都望住位後生女…
媽媽發現小朋友咁望住後生女，即刻同後生女講：「唔好意思呀小姐」
後生女擰擰頭笑笑示意唔緊要。
媽媽同小朋友講：「唔好咁望住人啦，冇禮貌呀」
小朋友摸摸自己臉：「媽媽，姐姐…」

後生女臉上嘅係傷疤，因火而起的傷疤…
媽媽：「你咁好冇禮貌呀，你知唔知唔可以咁眼定定望住人㗎？我平時點教你呀？」
媽媽再半鞠躬連聲：「唔好意思呀唔好意思呀」
後生女問小朋友：「你想知點解姐姐塊臉咁呀？係咪覺得我好奇怪好肉酸好醜樣呀？」
小朋友疑惑地微微點頭。
媽媽嚇到：「唔駛呀～你唔駛理佢㗎，佢係好多事㗎，成日都係咩都想知，你真係唔駛理佢㗎，對唔住呀」
後生女望住媽媽講：「我真係唔緊要㗎，如果連我都接受唔到自己，人哋又點會接受我？我真係冇事呀」
後生女向小朋友講出傷疤嘅由來…小朋友聽得入神，好好上咗一課，媽媽亦都係。