諸葛紫岐 :生完仔想死

編輯：Sunday Kiss
圖片：新傳媒資料室
(內容節錄自991期東方新地)

仲想唔想生小朋友？

諸葛紫岐 早前為丈夫薛嘉麟誕下一子 薛華韜 (Arthur)剛滿3歲，佢深深明白為人母親的感受，當被問到仲想唔想生小朋友個陣，佢話：「我覺得對小朋友嚟講，有兩個係好啲嘅，因為可以互相照顧大家，會成長得快啲，但都要睇番我身體同做嘢情況，我唔係一嚟可以生三個嗰啲，因為我身體比較弱，同埋我生第一個嗰時身體上都出現咗啲問題，搞到我有啲驚，嗰時覺得不如死咗算，真係有咁諗過，因為真係好辛苦好痛。」而佢媽咪就有叫唔好搞生意，專心再生小朋友！「我媽咪有講過，不過我媽咪都好尊重我，佢都覺得我咁大個人，喺呢個社會都學咗好多嘢，佢都覺得你大個，自己決定啦！」

工作、老公同個仔，時間上點分配？

Marie就話：「基本上冇乜衝突，小朋友都返學，佢返8點半放11點半，下晝又返一個鐘，其實佢都喺好豐富多彩嘅生活，放假咪帶佢去旅行囉。」

絕對唔係「惡」媽及怪獸家長

Marie坦言話自己絕對唔喺「惡」媽，因為當「爸爸比較惡少少，小朋友會話：「媽媽，help me!」你已經知啦！」佢更加否認自己喺怪獸家長，「我覺得唔係，如果係，我個仔就唔會成日咁黐我，我應該係好開心嘅媽咪，我個仔好鍾意同我玩，成日話：「媽咪，你同我玩吖！」我出去做活動，佢一定要跟住去，如果冇得去，佢會喊，我問佢點解要去，佢會話：「媽咪你着得好靚，我都想着得咁靚出去。」我話要影相㗎喎，佢會話：「我都唔怕影相。」佢完全係好開心做呢樣嘢。」

之前囝囝被批評土豪，又點睇？

早排 諸葛紫岐 囝囝開生日會扮皇帝，有宮女侍候，被批評土豪。佢就反駁話：「娛樂新聞嘛，八卦嘢嚟㗎啫，開心咪得囉，最緊要我個仔開心、啲賓客開心，我哋有好開心嘅memory，我覺得就夠，報紙雜誌點樣寫，冇傷害性。」佢仲話唔會俾小朋友好物質嘅生活，「佢食完飯要自己執嘢，有嘢跌落地要自己執番，我依家成日叫個仔幫我攞個袋過嚟，話媽媽想飲水，叫佢攞個杯斟水，佢真係拎俾我，好乖，so far我啲朋友見到佢都話佢好乖。」