謝安琪B女賞月初體驗 楚楚可憐怕人群！

撰文：Sunday Kiss
圖片：謝安琪 Kay Tse Facebook

Karina首個中秋晚會 遠望人群都驚驚！

謝安琪早前携半歲B女參加屋苑舉辦的中秋迎月晚會，作為人氣星B，自然多粉絲要求合照。不習慣面對人群的Karina一開始十分冷靜，但隨著越多人接近，kakaball就越驚，最後更忍唔住喊！Kay媽為安撫囡囡，立即帶她及大仔張瞻遠離人群，點知Karina仍然楚楚可憐，好似好無癮！

阿Kay不忍心愛女擔驚受怕，於是與她先行回家，結果Karina的賞月初體驗歷時只有短短十分鐘。一眾網民對阿Kay非常關心，紛紛留言叫她不用擔心B女的社交能力，更希望明年看見他們一家再慶中秋。有網民的祝福，相信kakaball好快就唔會再怕陌生人！

張瞻張靖 兄妹性格大不同

張繼聰與謝安琪另外育有10歲大的張瞻，雖然兩兄妹似足餅印，但阿Kay透露，二人性格原來截然不同！原來哥哥張瞻於半歲時已經係社交能手，似足爸爸。對於Karina中秋晚會一事，Kay表示「妹妹女孩子確實比較有矜持，遲啲可以向哥哥拜師學習社交技巧喇！」

其實張瞻除咗係社交高手，仲係個暖男哥哥，連阿聰都不禁大讚他「好柔情，當妹妹喊時，佢會好溫柔咁叫妹妹唔好喊，哥哥喺度。」在離開屋企出席比賽時，James更向媽咪要求同妹妹玩視像通話，哥哥一見kakaball就牽腸掛肚，扁嘴想喊！咁細個就有哥哥錫，Kakaball真幸福！

張瞻雖然人仔細細，但抱BB都有一手！Karina有暖男哥哥呵護，難怪笑得咁開心。

誕女半年張繼聰：「我嘅餘生都係照顧佢哋！」

哥哥懂得照顧妹妹，全賴父母教導有方。出名係顧家爸爸嘅阿聰曾經公開表示「為了家人幾辛苦都值得，我嘅餘生都係照顧佢哋！」言出必行的他為照顧老婆，不惜於她懷孕時減產，在B女出世後，他亦經常留在家中湊女。

自稱有分享症的張繼聰不時張貼與子女的溫馨照片，相中見他落手落腳照顧Karina，又喂奶、又彈結他氹囡囡瞓覺，真係廿四考爸爸！

謝安琪全職湊女 未計劃復出

KakaBall才半歲大，身為媽媽的Kay當然還未捨得復出工作。早前她透露：「希望可以餵足一年人奶！真係擺低工作，以家庭為先，囡囡都係得幾個月，雖然囝囝10歲，但都係要傾偈嘅階段，只要睇住小朋友開心就乜都值得！」一眾歌迷亦非常愛錫Kay媽，期待有朝一日看見偶像以最佳狀態復出唱歌。

Kay用心照顧一對子女的起居飲食，提倡健康生活的她除了堅持餵母乳，亦喜歡給子女吃有機食品。希望Karina喺媽媽細心照料下快高長大，等Kay可以盡快復出，為一眾粉絲唱更多好歌！