小朋友扭計港媽大鬧滿座巴士　向乘客提出過分要求被1句回絕再發難

滿座巴士冇位坐　小朋友扭計港媽竟要求乘客讓座

一名網民向Facebook專頁「生仔要考牌系列」投稿，他指有日乘搭了一架滿座的巴士，一名港媽帶著小朋友搭車，而小朋友因為沒位坐所以不斷發脾氣，還扭計要媽媽抱，但是他看見港媽似乎不太願意抱小朋友。小朋友不斷發脾氣，港媽做出驚人舉動：向一位正坐著的女乘客搭話，並且要求對方讓座：「我個小朋友好攰，發緊脾氣，可唔可以讓畀佢坐？」女乘客聞言後即刻十分禮貌地婉拒：「唔好意思，我都好攰」。

乘客禮貌拒絕後港媽再發難：點解你咁冇愛心？

但港媽聽罷並沒有死心，一直解釋小朋友發緊脾氣，此番「發緊脾氣」言論令女乘客感到十分不解，於是反問港媽：「所以？」結果港媽惱羞成怒責怪女乘客：「點解你咁冇愛心，唔可以就下人，佢發緊脾氣畀佢坐都唔得嘅，依家啲人真係！」

女乘客一句絕妙回覆：其實你生仔我冇責任㗎

港媽無理取鬧的說話讓女乘客大翻白眼反駁：「你咪抱佢囉！讓畀你係人情，唔讓畀你係道理，佢要坐，你咪等下班有位先上或者搭的士」豈料港媽竟大鬧道：「佢得幾歲咋！」逼得女乘客「爆seed」回應：「其實你生仔我無責任㗎，唔好覺得個世界欠咗你，要人就你啦好無？」

網民認同女乘客講法　「只會讓座畀有真正需要人士」

目擊整個對話過程的網民指，女乘客說完該番話後，港媽被反駁到無法再回應，但就「成程黑晒面」。而小朋友就繼續扭計要媽媽抱，惟港媽繼續毫不理會。

投稿公開後引來大批網民熱議，不少網民大讚女乘客：「姐姐答得啱喎！佢冇必要幫媽媽安撫個小朋友」、「講得好，讓係人情，唔係老奉」、「你生仔，我埋單。咩道理？」。亦有不少人港媽做法不妥：「連自己個仔都唔抱，憑咩要人讓個位畀佢？」、「一巴車落個細路叫佢收聲啦講咁多」、「依家啲阿媽好似全世界都有份搞大佢個肚」、「好明顯個呀媽特登等個細路扭到有人心軟讓座比佢，3歲4歲企下有乜問題，我只會讓座給抱住BB，老人家或行動不便的人。」

除此之外，亦有網民表示：「如果我係個女仔，我會主動讓座畀小朋友。如果我係個阿媽，我唔會要求人哋讓座，要小朋友明白有位先有得坐，無位要企係正常。」