賣萌 星B 玩水放暑假

梁浸浸愛涼浸浸

鄭希怡女兒梁浸浸最近去泳池游水，梁浸浸未落水前着件cute爆迷彩服手舞足蹈，原來佢於游水前，做熱身運動，醒目！

梁浸浸同黃伊汶及陳國坤兒子陳真十足兩姊弟，一人一個水泡學游水，咪睇佢哋咁細個，估唔到竟然唔怕水，仲識望鏡俾反應！

周汶錡仔肥肥白白

周汶錡上載混血靚B Jacques沖涼相至社交網站，Jacques邊洗白白邊玩玩具，展現肥肥白白嫩膚，加上紅卜卜面頰，真係好靚仔呀！

徐榮女勁愛玩水

徐榮女兒心怡日前進行下水禮，心怡首次落水不知幾興奮，戴上水泡下水後手腳揈揈，喺池邊休息時依然玩唔停，似乎好like玩水消暑喎！

姚樂怡女變大雞髀

姚樂怡女Gaibe(小雞髀)半歲大，完全遺傳媽咪漂亮五官優點，而且愈來愈肥嘟嘟，勁好肉地，樂怡更笑言：「就嚟變大雞髀了，肥妹仔最喜歡玩水，聞到沐浴味就識笑。」

湯盈盈帶大女暢泳

湯盈盈自從為錢嘉樂誕下大女Alyssa同細女Kassidy後，專心湊女，閒時除了帶兩個女去遊樂場玩，亦會游水活動吓！可能細女Kassidy 仍年紀小，所以盈盈早前只帶大女Alyssa到室內泳池學游水，戴上水泡嘅Alyssa表現興奮，邊學邊嚷着要跟媽咪selfie，十分活潑！