《超人特攻隊2》夠貼地！ 超級英雄都有家庭問題！

撰文：Sunday Kiss 圖片：劇照

英雄一樣有煩惱！

《超人特攻隊》雖然係動畫，但係刻意顛覆超級英雄無所不能嘅形象，第一集我哋睇到超能先生一樣有中年危機，一樣要為口奔馳，一樣要受老細氣！今集彈力女俠搶盡超能先生鋒頭，肩負起為超級英雄爭取合法化嘅使命，打擊罪惡，而超能先生就變咗做湊仔公，喺屋企照顧三個細路。雖然故事背景係設定於60年代，但係睇番現今社會，「男主內，女主外」其實已經唔係咩新鮮事！

而三個仔女就成為咗超能先生最大嘅難題，小麗正藉青春期，開始有感情上嘅煩惱，小衝日日都有唔識做嘅功課，焦點就係BB積積原來擁有強大嘅超能力潛能，但係唔識得點控制，種種家庭日常狀況，就搞到超能先生連想瞓一覺好嘅都難！

現代媽咪身兼多重身份

時代唔同，好多媽媽都要同時兼顧工作同家庭，賺錢養家和照顧家庭都唔再係夫妻一方嘅義務，所總超能先生同彈力女俠都會為咗家庭問題意見分歧。

一個女人，就算佢嘅能力有幾超乎常人，但係當佢一旦做咗媽媽，就算佢有幾咁十萬火急，拯救緊世界，當個仔打電話俾你，問你對波鞋喺邊，你都一樣會即刻講得出喺邊； 就算你離開屋企有幾遠，只要你聽到小朋友需要你，你都會想即刻飛奔趕返屋企，呢啲就係女人天生嘅母性。

家庭危機 需要一家人去解決

身為父母，無論喺咩情況下，都係一心一意要保護子女，但係隨住惡勢力逐漸強大，甚至威脅到自己父母嘅時候，身為子女一樣會挺身而出，發揮自己嘅超能力，去打倒惡勢力！

就正如第一集嘅經典對白：「只要一家人喺埋一齊，就冇解決唔到嘅難關。」就算每個家庭都有自己的問題，但面對現實中嘅困境，家人之間彼此互相支持，就係一道最強大嘅防護網。