超簡易 清熱利尿 粟米薏米水

撰文、圖片：小小豬KINSEY

粟米薏米水可以有清熱降火同利尿消腫功效，最好就係超級簡單，真係啱晒我依個懶懶地又可以扮勁呀…哈哈哈！

材料：粟米三條、生熟薏米各半碗、蜜棗四粒

將生、熟薏米洗淨，之後浸水最少半小時；蜜棗浸洗一陣。

粟米洗淨切段，粟米鬚唔好浪費，洗淨可以加埋一齊煲，加強利尿消腫功效呀。

煲內放入3水，然後將所有材料加入煲內。

待水滾後，用大火加蓋煲約15分鐘。

然後轉慢火加蓋煲多一個鐘。

待涼後就可以過濾入樽，就可以飲用啦！

由於有超香嘅粟米香，入口又好濃粟米味，所以粟米怪嘅小小豬都不知幾鐘意飲，仲話咁多涼茶佢最鐘意飲依個，叫我下次再煲添。

哈哈哈….小小豬幾時學識賣口乖呢，不過見佢咁賞面，又咁主動飲，我緊係非常樂意再煲啦！
溫馨提示：由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，呢個湯料啱唔啱自己呀！