遺傳父母優良DNA 12歲琦琦女 有美人胚子擁44吋長腿
撰文：Sunday Kiss
圖片來源：新傳媒圖片庫、琦琦微博
琦琦女 有美人胚子
老竇係影壇型佬任達華，媽咪係超級名模琦琦，12歲的任晴佳自細已經省鏡出眾，遺傳父母優良DNA，現時已經有五呎八吋高，44吋長腿更勁搶眼。據知情者透露：「雖然琦琦女只得12歲，但身高已經去到媽咪耳仔，平日佢最鍾意著熱褲同超貼身嘅leggings，騷吓對靚腳，近期佢又再標高，仲好自豪條腿已經長過爹哋㖭！真係有晒父母優良基因，其實Ella（任晴佳）自細已經視父母係偶像，佢好鍾意扮靚同自己襯衫，好崇拜外國名模，成日學佢哋啲打扮，同華哥琦琦會一齊研究時裝潮流，細細個已好有時尚觸覺。」
學校風頭躉
雖然下個月才滿13歲，任晴佳遺傳父母優良DNA，但身高樣貌已經出眾過人，現時已有五呎八吋高， 44吋長腿更加非常搶眼，遠距離睇已經索到一個點！任晴佳就讀國際學校，是校內高材生，早前琦琦就透露女兒在學校攞咗兩個奬狀，氹得爸爸任達華笑逐顏開。
由細靚到大
華哥超錫愛女，不時會在社交網站貼出囡囡相片，同大家分享女兒成長靚樣，亦可見天生一副明星相的任晴佳，細細個已經美人胚子，成日話女兒係爸爸嘅前世情人，單睇華哥對住寶貝女個冧樣，就知此言非虛！
外國超模做目標
雖然家有索女初長成，亦有不少製作公司打任晴佳主意，正因為囡囡受注目，華哥更刻意要女兒低調，希望女兒專注學業，有簡單的童年生活，而任晴佳亦不負父母寄望，學校成績優異。據知情者透露：「華哥個女索爆，好早就有電影監製試探華哥意思，想簽佢個女，雖然華哥絕對唔專制，畀好大自由度個女，亦知個女以外國超模做目標，但始終個女仲細，華哥講明一定要Ella讀好書先，唔想個女鋒芒太露，佢仲要阿女封咗lG，其實Ella同華哥相處就好似朋友咁，兩個成日會一齊做瑜伽，華哥同琦琦又會陪個女捉國際象棋，如果輸咗個女會罰佢哋坐無影櫈，華哥成日話全因為個女，自己依家先至咁fit !每次提起個寶貝女佢就會笑到見牙唔見眼！」
