郭藹明 萬能賢妻 自度餐單慰老公劉青雲
撰文：東方新地｜圖片：新傳媒圖片庫 | 編輯：Sunday Kiss （原文刊於：東方新地）
劉青雲 紀念日必慶祝
劉青雲當年與美貌與智慧並重的郭藹明相戀，外界普遍不太看好，但事實證明這對黑白配是絕配，今年是二人結婚20周年，沒有一兒半女的生活，二人激情如昔，年初在鬧市行街攬到實，黑實大男人劉青雲被keep 住少女情懷的郭藹明緊箍，可見夫妻關係歷久常新。
相敬如賓談何容易，但劉青雲說得出做得到，他是個心細如塵的好老公，每年的紀念日都一定有表示，知情者透露：「唔好睇青雲大大嚿又唧都唔笑，其實佢對Amy(郭藹明) 好溫柔同細心，每年生日、拍拖同結婚周年紀念佢都一定會諗定點慶祝，送咩禮物，就算忙住做嘢都會預先慶祝或者補祝，今年6月17日係佢哋結婚20周年，佢話咁多年嚟多得有個好老婆喺佢身邊扶持，要送份勁嘢畀Amy，早前託相熟車行搵車。平時佢哋唔係大花筒，有錢都唔會亂使，寧願穩陣投資買磚頭，青雲話如果Amy一早知道佢買貴車，一定會阻止佢，所以要秘密進行。」
車行收禮 百萬波子冧郭藹明
近年劉青雲與郭藹明一同外出，多數都由司機駕駛七人車接送，另有一輛寶馬房車及一輛平治房車代步，過去劉青雲買的車都偏向平實穩重款式，絕不會追求新款及速度感的跑車。據知劉青雲早前買入了一架過百萬的保時捷跑車(波子)，送給郭藹明作為驚喜，日前更帶埋老婆去車行收禮，現場所見，夫婦二人乘七人車到達後，行入寫字樓辦妥手續，郭藹明雖然已知有車收，仍全程四萬咁口，興奮之情表露無遺，最後由職員帶領下去取車，波子早已掛上二人專用的私人車牌號碼，由劉青雲負責開車揸走。
收禮前郭藹明在保時捷寫字樓內辦理手續，之後步行去拎車，見她keep住甜笑，一切盡在不言中。
高血壓放棄生育
有老公送贈百萬波子做結婚紀念禮物，有邊個女人會唔冧？對從來不愛追求物質生活的郭藹明來說，劉青雲對她的心意肯定重要過架波子，而事實上這個廿四孝老婆值得擁有更多。50歲的郭藹明，98年嫁劉青雲後一直做其背後的女人，老公拍戲愈來愈紅愈賺愈多，她就負責管財投資錢滾錢，打理家頭細務又學煮餸煲湯。亦因為劉青雲有先天性高血壓，嚴重會影響到心臟，郭藹明多年來都為老公的飲食操心，只要劉青雲在香港，她都會度定菜單親自下廚，務求令劉青雲食得健康。據知因為先天性高血壓有遺傳的可能，早年曾放風想生B 的劉青雲與郭藹明，最後亦有共識放棄生兒育女，好好享受二人世界。
原來劉青雲要去車行拎番自己架寶馬房車，入到去已有為數不少的車行職員列隊等他合照，親民影帝來者不拒逐一影完合照先走得。
郭藹明 劉青雲 買西貢旺財屋
劉青雲同郭藹明夫婦二人多年來投資炒樓炒舖，累賺超過三千萬，現手持的數個物業及地舖亦全部升值，手持物業市值逾億計，最近劉青雲以510萬元沽出新蒲崗富 德工業大廈一單位，又賺134萬元。
14年底，劉青雲以3,280萬買入西貢西沙小築獨立屋，在高人教路下大廳唔裝落地玻璃，布下「倒騎龍局」。愛巢背水面山，食正扯旗山頂的龍氣，大旺財喜，只要把向水一邊的窗門封閉，氣聚則財聚，食盡龍氣，自然可以令夫婦二人財喜來臨，愛情美滿。
落手落腳搞裝修
郭藹明除了助老公財富滾大，家中大小事務都親力親為，年前她一個人為西沙小築新居搞裝修，被影到一個人落上海街親自買裝修物料，無論揀地磚，櫥櫃或浴室材料，甚至門柄都非常細心，再落手落腳度尺，完全是完美妻子典範。
恩愛如新婚
今年年初，劉青雲與郭藹明拍拖到九龍灣睇戲，搭扶手電梯時，郭藹明激罕公開施冧功，兩手從頸環抱老公撒嬌摟錫，甜蜜程度儼如新婚。
近年劉青雲與郭藹明不時被邀夫妻檔出活動及拍廣告，之前拍的EPS廣告，二人演恩愛夫妻完全真情流露，被大讚互動夠甜蜜，郭藹明更凍齡一樣，身材樣貌仍然省鏡。
樸實黑白配
能夠令婚姻保鮮，劉青雲坦言全靠老婆郭藹明的功勞，他曾公開大讚老婆說：「太太係我人生最好嘅禮物，佢好聰明，我鍾意 咩唔鍾意咩，唔使講出口佢都一清二楚！」夫婦二人多年生活簡樸，從不追求名牌與物質生活。
劉青雲與郭藹明每年都去旅行，近年多見他們去亞洲國家，早前去台灣旅行在酒店大堂被粉絲包圍，郭藹明乖乖企埋一邊等老公招呼粉絲。
買餸走幾轉
劉青雲曾揚言感激郭藹明多年來的犧牲，女人最能幹不是在外搏殺搵幾多錢，而是肯為另一半照顧頭家，郭藹明懂得為婚姻保鮮，她坦言目前是她的收成期，多年來努力經營沒有白費，尤其是劉青雲對飲食有要求，郭藹明說：「老公以前唔鍾意返屋企食飯，可能我煮得唔好食，又唔會同朋友講個老婆識煮嘢，家陣佢會話：『佢都煮得OK!』」
日前本刊記者見她獨自在九龍城茶記食牛腩麵，之後到街市買餸，買完牛肉同菜先放上七人車，再折返街市拎雞，連走幾轉辛苦到暈，不過從劉太臉上可見成功感。
因為劉青雲有先天性高血壓，嚴重會影響到心臟，郭藹明多年來都為老公的飲食操心，只要劉青雲在香港，她都會度定菜單親自下廚，務求令劉青雲食得健康。
郭藹明到九龍城街市買餸，拎住幾袋餸放上七人車又再折返街市繼續買，睇見都覺辛苦。
劉青雲 繁忙影帝
拍戲拍足35年， 已54歲的劉青雲近年接戲依然唔停手，近年產量更有增無減，去年至今已拍了《我的寵物是大象》、《風林火山》、《明日戰記》及《廉政風雲之煙幕》4部電影，再加上廣告代言同其他活動邀約，年賺過億絕對唔誇張。
