郵輪初體驗 參觀 海洋贊禮號

雖然冇得郵輪旅行，不過我地應邀嚟參觀 海洋贊禮號 ，望梅止渴先啦~

編輯：sunday KISS

參觀 海洋贊禮號

雖然我哋都只係參觀大約3小時，不過我哋都要做好晒曬一切嘅出境手續，等咗一陣，終於攞齊文件，可以上船玩呀~

大鄉里嘅小小豬一見到咁大隻郵輪就嘩嘩大叫~

不過其實唔只小小豬，就連我都覺得好驚奇，因為海洋贊禮號真係好大隻呀~

單睇船嘅外觀都已經好期待，真係好心急想睇下入面有啲咩呀~

其實一入到去真係唔似係一隻郵輪上，就係好似行緊商場，絕對唔會有暈船浪嘅感覺~

我地第一個目的地就係去郵輪上大劇場，參加郵輪之前舉辦嘅「尋找贊禮小天使」頒獎典禮~

頒獎表演仲有特別節目就係夢工場主角史力加同埋PUSS出嚟表演跳舞呀~

當然唔少得同兩位主角集郵，其實我都好想一齊影，不過依啲都係小朋友專利…冇我份呀~

接住我地就去餐廳食午餐，行去餐廳嘅時候，我地經過賭場。平日賭場都係唔俾小朋友入去，同埋係嚴禁拍攝。今次因為未正式航行，所以就可以俾我地大影特影，兼俾小朋友觀摩一番~

由於今日行程實在太豐富，我哋午餐時間都有啲趕，所以唯有快快手食完個午餐，爭取時間繼續去玩啦~

飯後第一個節目就係小小豬期待好耐嘅碰碰車啦~

滿六歲就可以玩，不過想做司機就一定要八歲以上。雖然全程我都坐係司機位，不過我都有俾小小豬渣個軚盤滿足下啦~

跟住就去船頂參觀，小小豬見到個大型水池都好想落去玩喎(其實我何尚唔想呢)~

之後就去咗一個重點節目就係入去北極星，360度睇下周圍嘅靚景~

一向大膽見稱嘅小小豬初時竟然有啲驚喎~

不過，當佢適應咗之後，就完全冇有怕咁喺個北極星入面行嚟行去睇風景。住喺九龍東嘅我，真係冇諗過九龍東個VIEW係咁正，可能就係因為我鍾意望住個海啦~

海洋贊禮號都有一個吉祥之物，就係依一對熊貓「 媽媽與寶寶」~

之後住我地就去睇iFLY及甲板衝浪，不過由於當時冇安排iFLY表演，不過睇衝浪都幾好睇呀~

路經遊戲場小小豬又去扮玩一陣先~

頭先遠睇水上設施小小豬都已經好想去玩，依家咁近距離見到佢就更加心癢癢，冇法啦……時間所限，我哋都唔可以入去玩一轉啦~

郵輪周圍都有好多休息嘅座椅，俾遊客坐定定欣賞風景，我諗如果出到大海坐係度睇風景，應該會好寫意~

最後我地就係去睇依個機械手臂調酒器，睇短片介紹就好似好厲害，不過今日冇得親眼睇到，都有丁點失望添~

認真講，今日其實真係睇得未夠喉，仲有好多場地我地都冇睇到，有機會都真係好想正正式式坐著郵輪去旅行。

除左長途行程，外贊禮號暫有一啲兩日一夜嘅旅程，真係要計劃一下先 ，就到時間就嚟玩兩日，到時一定可以俾小小豬玩餐飽。

BY 小小豬的成長日誌