陳秀珠爆神劇《金枝慾孽》內幕 單親母未婚生B情路曲折 坦言被仔話過？

陳秀珠大爆拍攝神劇《金枝慾孽》內幕

由鄧萃雯、陳秀珠、佘詩曼、黎姿、林保怡及陳豪等合演的神劇《金枝慾孽》於04年播出，當年一衆演員都獲獎無數，鄧萃雯憑此劇獲得實力非凡女藝員獎，而林保怡聯同黎姿亦榮升視帝視后。近日「如妃」鄧萃雯在微博直播時更請來「皇后」陳秀珠連線，分享當年的拍攝點滴。劇中陳秀珠和鄧萃雯不斷鬥過你死我活，在後宮爭寵爭權。但現實中二人卻十分老友，經常約去行街食飯。

鄧萃雯在直播期間爆二人當年曾爭奪擁有全場最閃最高貴的頭飾，陳秀珠笑稱：「我哋兩個係鬥㗎！身為皇后，我見如妃娘娘嘅頭飾靚過我梗係唔得啦，我一定要戴更加搶眼嘅顏色，更加金光閃閃。所以我哋兩個唔只鬥演技，鬥氣場，仲鬥埋頭飾。」鄧萃雯聲稱：「當年見到梳頭製作嘅同事，有幾款飾物仲靚過自己個啲，睇到就好妒忌問佢哋幫邊個整，佢哋話幫皇后娘娘整，但佢嫌太重唔太鍾意，咁我就話：『畀我用……』嗰日我仲走過去秀珠度搶你啲頭飾，你仲話：『我戴呀！咩唔戴呀』，我話：『你唔戴我就戴！』」陳秀珠戲言：「當時唔戴都唔畀你戴！」。鄧萃雯直指「皇后娘娘真係全部都要，一件都真係唔留畀我用。」

當年如妃同皇后有不少對罵場面，陳秀珠指鄧萃雯拍攝時眼神兇狠，鄧萃雯解釋當中因為自己的第一個孩子就是被皇后害到離開人世，可想而知二人仇恨不共戴天。她們更不禁有感而發說：「當企喺真正既紫禁城入面時，就會有一種滄桑、孤獨、距離感同無助的感覺一湧而來，後宮妃嬪一生只為求等皇上寵幸嘅感受。」

港姐大熱倒灶 選美原來只為見一人

陳秀珠入行前曾任職地勤人員，其後於1979年以21歲之齡參選港姐，參選的原因原來的為了一見偶像：「我喺街被人捉去拍廣告，趙潤勤係我嘅伯樂，係第一個搵我拍廣告，之後選美係想見偶像繆騫人，我好鍾意佢，於是去試吓，點知我選到佢就走。（當年獲得第幾名？）永遠都話自己係第四名，因為係無公布出嚟……梗係唔係真，我算係大熱囉。我哋嗰屆好勁，冠軍係鄭文雅，季軍係鍾慧冰又有鍾楚紅。」

曾被行內人鬧爆 戲路甚廣為「御用母親」

陳秀珠當年三甲不入，落選後簽約TVB，曾主持《K-100》，並是《體育世界》第一代主持。她曾於電台節目《一起走過》大爆初入行時曾被前輩大罵：「我做過《K-100》同《體育世界》，大家以為我口齒伶俐…其實我無讀過訓練班，但我好想讀，始終係選美入行，途徑比其他人係快啲。記得報節目嗰時被蕭亮鬧我，因為蕭生係好咬文嚼字，我哋又好多懶音，佢加埋啲三字經入去鬧人，仲有時撳咪落嚟鬧，佢要求高係啱，但本身我新入行已經好驚。（入行拍劇最驚哪一個武術指導？）鼎爺（李家鼎），因為佢個樣又惡，但係佢嘅惡係想你做得靚，佢係惡但OK。唔知對其他人係咪一樣，但對我係OK，有時佢都會識錫住人去教。」

其後，她參演大型金庸、古龍武俠劇。如《笑傲江湖》、《射鵰英雄傳》、《陸小鳳之鳳舞九天》，是TVB力捧花旦之一。當年她靚絕TVB，有傳蔡楓華為她寫名曲《倩影》。

初出行，她在88年神劇《誓不低頭》中，飾演謝文武（鄭少秋飾演）的妻子，成為第一代港女始祖為人熟悉。隨著年齡的增長，她亦因而擴大戲路，成為「TVB御用媽媽」，如《酒是故鄉醇》、《戇夫成龍》、《愛我請留言》、《警犬巴打》、《BB來了》。20年7月，她宣佈離巢，而古裝劇集《一笑渡凡間》就為其告別作。她曾接受傳媒訪問，提到有觀看ViuTV《全民造星》，指最愛MIRROR的Ian陳卓賢，唱功了得更是排球選手，非常有特色。

情路曲折 曾為愛離巢勇闖到大馬

陳秀珠的情路並不太順利，至今仍為「單身貴族」。她先與地產界才子、美國籍男友及馬來西亞賭王之子相戀，每段感情未能走到最後。當中最轟勳的莫過於她與馬來西亞賭王之子林致華的愛情，她曾為了這段愛情離開娛樂圈，隻身前往馬來西亞與他一同經營餐飲生意，最後愛情和生意都無疾而終。

「由80年到而家，中間試過完約去馬來西亞拍戲，大約年零左右；90年到95年又走過一次，去馬來西亞做生意。因為以前男朋友係馬來西亞人，跟佢一齊過去做四川小吃的快餐生意，當時想做到中式麥當勞咁，但無諗過馬來西亞大部人唔食豬肉又好多限制，跟住最致命原因係四川廚師年幾左右話思鄉要走，主要係幫唔到佢哋家屬做簽證，所以辭職唔做，惟有訓練當地師傅，但始終都係爭啲，出嚟品質無咁好。」她說。

未婚媽媽母兼父職

98年，陳秀珠於拍劇時發現懷孕，當時已屬40歲的高齡產婦，翌年未婚懷孕在美國誕下兒子陳迪加，一直母兼父職，至今仍然不願意透露兒子爸爸的身份，認為兒子不需要知道。她指當年中學畢業時與男朋友訂婚，擺過兩、三圍酒，形容對方好好，反而是自己傷害了他：「要同佢講對唔住」。

她指當時此舉動十分前衛，認為時機到了，最重要是自己負責，雖然有壓力，但幸得家人及好朋友支持：「有咗咪生囉……我決定咗啲嘢，就會勇往直前。所以我要加倍保護佢、愛佢。最初以為人哋一定會用另一種眼光嚟睇我，不過依家日子一過，我發覺其他人對我嘅眼光比想像中好，大家都好包容，好OK，令我覺得自己就同一般嘅媽咪無乜分別。」她曾指自己一早想要小朋友，但沒有結婚打算。

坦言被仔話過？直言對不起兒子

陳秀珠曾於TVB節目《單對單》中接受訪問，剖白當年要一邊拍劇，一邊湊仔，到兒子讀小學即送他到美國讀書。她落淚坦言後悔太早讓兒子赴美，因為母子見面機會少：「佢讀到小學先至過去美國，我有陪佢，每年留喺美國半年時間先返嚟做嘢，我有啲朋友喺嗰邊會照顧佢，出外靠朋友。」她更直言對不起兒子，沒有陪伴他到外國長大，現時兒子正於美國攻讀大學三年級：「中學畢業嘅時候，因為佢要去外國讀書，佢想定落嚟，我都應承咗，但我最後唔捨得香港五光十色嘅生活，所以放棄咗，呢件事我要同佢道個歉。」

她又指如果能夠再次選擇，一定不會當單親媽媽：「一定唔會，亦唔鼓勵人做（單親媽媽）！我問過佢（兒子）：『媽咪係咪好好？係咪無爹哋都OK？』佢就話：『你覺得啫』。做單親媽咪唔係唔好，但要考慮好多嘢，唔可以只係諗自己，要諗小朋友。」

經歷逾20年的單身生活，她坦言自己不再相信感情，而且感到麻煩：「我覺得夠皮喇！其實我早期都試過。」