指港人難服侍大數麻煩客6宗罪 入行10年酒店員工：唔係你工人

怨港人難服侍大數麻煩客6宗罪 入行10年酒店員工：唔係你工人

酒店Staycation熱潮勢不可擋，酒店每逢假日都人頭湧擠，不過酒店業界似乎對香港人好大怨言，有酒店從業員在Facebook群組「酒店Secret」中大嘆香港麻煩客好難頂。

該酒店從業員話「最近睇到所謂Staycation，經常見到啲無理客，越睇愈燥，部份酒店已經要8折支薪同放no pay，前線同後勤已做到XX」，對比其他國籍的旅客更加差，更在文中大數香港酒店麻煩客6宗罪行！

酒店麻煩客第1宗罪. 成日搲提早入住、延遲退房

好多人以為酒店好多吉房，可以供客人隨時入住，但每次要求酒店換房，延遲退房，酒店職員都會果斷Say No，其實酒店並非涼薄，皆因酒店真係無晒房。該酒店從業員更透露好多酒店麻煩客會賴死不退房，「唔催佢都唔肯走」！

酒店麻煩客第2宗罪. 日日都週年紀念、慶祝生日

好多酒店Staycation套票都包括週年慶祝及週年紀念禮遇，會送蛋糕或其他贈品，該酒店從業員就似乎暗示好多人扮自己特別日子要慶祝，實則想搲著數搲到盡！

酒店麻煩客第3宗罪. 太怕撞鬼！麻煩客轉房再轉房

最近好多酒店住客都話住酒店撞鬼，原來酒店從業員好怕酒店住客成日轉房。他提到網上流傳「酒店尾房唔好住」，上到房間又突然話要轉房，真係好麻煩，大嘆「唔好信咁多啦！」

酒店麻煩客第4宗罪. 去廁所無沖廁+用完避孕套放床頭！

該酒店從業員又話，好多住客去完廁所唔沖廁，無奈道：「冇人想一入房就聞你陣尿味」。他又話成日見住客將用完的避孕套放床上、床頭櫃等位置，好激動表示「冇人想聞倒你啲X味」！

酒店麻煩客第5宗罪. 唔鍾意落前台退房

從酒店退房，大多數都需要酒店住客親自落櫃檯辦理手續。不過他提到有部分香港麻煩客，要求房務員直接查房，當正自己住時鐘酒店，導致房務員無辜增加工作量。

酒店麻煩客第6宗罪. 一入住就要毛巾、水、廁紙

其實作為酒店住客，要求少少基本用品實在不為過，不過他指好多Staycation酒店住客，鍾意一入住就要求房務員提供毛巾、水、廁紙等等用品，真係「擺明係攞走……要食埋人地隻車」，無奈感嘆「（酒店）唔洗燈油火蠟咩」。

酒店員工大鬧「有品少少啦，香港人！」

該酒店從業員話再話「你係客俾咗錢梗係想relax下，但唔好俾一千幾百就當自己酒店、就當自己皇帝，我地服務性行業都係人，唔係你工人 ，有品少少啦，香港人！」，似乎對住香港酒店麻煩客真係積怨已久。

「寧願做中國客！」

好多酒店從業員都留言話「不嬲都覺得香港客唔好做架喇」，又表示好多人話唔好做中國客，但人哋「畀得起錢、無文化得嚟有品啊」，對比之下香港人鍾意發爛渣，真係差好遠！

「越多要求越玩佢哋」

有酒店從業員更留言，嬲爆表示自己對住香港麻煩客，「越多要求越玩佢哋」，似乎會將怒火投放於工作上，勢必要香港客人受返氣！

「貪心唔會玩得開心」

亦有酒店從業員表示「其實啲人玩得咁貪心， 都唔會玩得開心」，想開心入住酒店最緊要心態擺得正，相信無論職員還是住客都能保持正面心境。