陳嘉寶批有港爸媽刻薄工人 分享一法讓外傭留家防疫！32歲三女之母教媽媽瘦身

陳嘉寶批有港爸媽2個行為刻薄工人

陳嘉寶雖然年僅32歲，但她已經是三女之母，經常於社交平台大晒親子合照，有女萬事足。有位經營Playroom的網民讚她是個好媽媽，指曾經見到她帶女兒過來玩，覺得她跟老公都很有禮貌，對工人姐姐又好。陳嘉寶先多謝對方的讚賞，她表示其實自己早幾日跟工人姐姐吃飯時，始知道有部分僱主對工人姐姐態度惡劣，如果不滿意她們的表現，會扣起食物，令她們吃不飽來做懲罰，甚至有僱主會對她們動手，如此行為讓她感到不可思議：「呢種情況唔係一個、半個，個別例子，係好多！」她希望大家那些僱主可以善待工人姐姐：「我想講，人哋都係人，離鄉背井嚟一個陌生地方都只係為咗頭家。我哋只係僱主，唔係人哋主人！將心比己，你返工做錯嘢係唔係老細可以對你郁手郁腳？係咪可以倒咗你半盒飯要你餓住嚟做嘢？假設你識得有人咁樣對佢哋嘅姐姐，請勸阻。」

一法令工人留家減少感染機會

另外，疫情期間，很多人都擔心工人姐姐放假出去玩，與其他人聚集，擔心會受感染機會變大，將病毒帶回家，傳染給小朋友，所以唔想她們出去。陳嘉寶慶幸自己的工人姐姐都好黐家，但同時為其他工人姐姐護航：「當然好多姐姐係想抖氣同貪玩，但原來有更多姐姐決意要外出，係因為就算放假留喺屋企，都會無意中被叫去幫手做好多嘢，呢度幫少少，嗰度幫少少，就無咗日假期，所以寧願落街坐公園食西北風，都唔願意留喺屋企。」她教大家，如果真的想工人姐姐留在家，應該讓她們享受真正的假期：「就算屋企無一間房畀佢，都可以試吓提自己千祈唔好畀佢幫手（有時佢哋唔好意思唔幫），同時禁止小朋友搵姐姐玩。」

最後她想趁這個機會呼籲大家對工人姐姐好點：「工人姐姐對我哋屋企來講，就係屋企嘅一份子，所以從細都教小朋友，姐姐有兩個屋企，一個喺菲律賓，另一個就係我哋屋企，佢係屋企人，唔係淨係幫我哋地做嘢嘅。」

32歲生三女如何保持少女身形？

陳嘉寶生足三個女，現時已決定封肚，她指自己望住三個小朋友，經常覺得很感恩：「好彩有佢哋！」有男網民讚她保養得很好，想向她請教方法，再教老婆，亦有女網民指自己產後下半身浮腫，不知道該怎樣做，她表示自己懷孕時最重要是有規律地做運動、控制飲食，而坐月時要坐得好、吃得均衡 、好快重拾運動習慣：「運動！一定要郁。我嗰陣時係唔郁即腳腫…按摩都有用，但一定唔及運動持久同有效。」

但她認為最重要還是保持心情開朗，她借機讚揚老公黃頌祈Epaphras：「佢會喺努力工作打拼嘅同時，用心用時間落手落腳照顧每一個小朋友，畀空間同時間打理我自己。亦會盡力去照顧我嘅飲食同關心我嘅需要。如果一個女人身邊無另一半咁樣無條件嘅支持，點會有時間，精力同心神去KEEP呢？請各位男士加油支持為你哋生兒育女嘅另一半。PS，我仲有超級好奶奶，媽咪同HELPERS感恩。」