陳曉東 凍齡惡爸

昔日的陽光男孩變成新手爸爸，一班小粉絲亦變成年輕媽咪，由從前追捧偶像，到現在與東東交流湊女經。東東坦言為人爸爸後，多了一份家的感覺，以前像隻無腳雀仔周圍飛，不知道何處是家，現在終於覺得有個家，個人「貼地啲」。不過東東外表斯文，實際卻是一名嚴父，經常碌大對眼喝令女兒，「始終要有個做惡先得，佢哋咩都唔驚就唔掂㗎喇！」
撰文：Ling 攝影：Simpson Chiu（部分相片由受訪者提供）

陳曉東 凍齡惡爸

陳曉東 自言臭脾氣 太太頂得住

陳曉東 數年前在台灣拍攝台劇《愛情急整室》期間，在診所邂逅俏護士王妤嫻，2014年兩人奉女成婚，婚後移居到北京生活，以方便東東在內地工作，兩夫婦盡量不希望相隔異地。東東直言自己臭脾氣，夫妻相處之道有賴太太容忍度高，「係佢頂得我住啫，佢性格好、脾氣好、有耐性，比較傳統一啲，如果唔係，我哋吵到上天棚呀！」
誕下一女後，王妤嫻火速再懷孕，兩年抱兩！東東得知太太懷第一胎與第二胎時，反應有很大分別，第一次比較冷靜，第二次就十分驚訝：「吓！又嚟！」驗了四支驗孕棒也不相信，要到醫院證實才相信，細女多多在2015年8月出世。

新手爸爸 終有家的感覺

已有兩個可愛女兒的 陳曉東 ，都有意追多個仔，但太太修身成功，對生多個表示罷工！「我冇所謂，但太太唔想，女人身材一回復就唔想生。」女人懷孕真的不容易，王妤嫻兩次孕吐都很嚴重，第一胎甚至生完第二日仍在吐，幸好其他方面沒大影響。所以想生多個，一定要問准太太先！

東東坦承自己忙於工作，湊女重任落在太太身上，自己比較少湊，最多給予財政上支持，晚上工作後飛奔返家陪伴。他自言不愛夜蒲和應酬，最多夜晚與好朋友食飯，沒有不良壞習慣，工作以外的時間差不多全給了家庭。以前單身時，他形容自己像隻無腳雀仔，經常往返中港台工作，現在終於有一個家，做人腳踏實地了。「以前唱歌密集式四圍飛，今日飛台灣，聽日喺國內，後日到香港，冇一個返屋企嘅感覺，好似冇腳雀仔。依家終於覺得有個穩定嘅家，感覺落地啲。」

孩子性格與生俱來

自有小朋友後， 陳曉東 驚覺小朋友一出世並非一張白紙，有些性格真的是天生，想改也未必改到。「我原本以為小朋友一出世係零，所有嘢都可以塑造，但原來有種性格係與生俱來，要改變係好難，咁後天當然可以補救。」

兩個女只相差一年，但性格完全相反，朵朵很好動，多多則有性格，愛獨來獨往，不理睬人，父母想抱她也會被推開。「細個我抱大女入去沖涼，佢一落水就好鍾意踢水；細女落咗水半日都係浮喺度唔郁腳。」
親友覺得細女性格似東東，大女性格似媽咪，但東東覺得大女比較黐身。「大女黐我多啲，細女唔黐人，淨係食飯先走過嚟話要食嘢。」細女扭食物只會扭食正餐，不扭零食，自動自覺培養了健康飲食習慣；大女又相反，鍾意食糖，十分愛吃。

北京屋企裝修 囡囡返港暫住

最近 陳曉東 返港為保健產品拍廣告，過年後要到深圳拍戲，同時北京的家要大裝修，所以今個新年與囡囡齊齊返港度新歲。
東東為孩子打造一個六星級的家，但一講起裝修，他大嘆忙得一頭煙。「冇咩事真係唔好搞裝修，煩到嘔，尤其是我成間屋拆晒，連設備都換晒，包括冷氣機管，因為之前樓上漏水，要拆晒啲嘢成個吊頂造過，又將啲嘢駁喉去出面，總之好多細位好難監督，材料、地板、傢俬都係我買。」
北京的家大裝修，囡囡要暫回香港由嫲嫲照顧，長遠都考慮帶女兒返香港讀書，但東東一諗到讀書方面就好頭痕。「最重要學校方面啦，如果真係返香港讀要搬返嚟住，我哋都未決定，但我想佢哋一定要學好中文。」

惡爸聲大眼珠大

在教育方面，東東自認是一名傳統爸爸，女兒將來一定要學好中文，所以移居了北京生活，讓孩子先學好國語，「依家佢哋講得仲標準過我。」女兒在北京講英普雙語，在屋企講國語，學校講英文，現所就讀的國際學校幼兒班，採用蒙特梭利教學，主張讓孩子自主學習。「學校好尊重小朋友，好free，係一個英文學習環境。等佢哋大啲我想轉番佢哋讀local school，不論喺香港或北京，要識寫識講。」

不怕功課壓力大嗎？「唔理！唔好睇我個樣好似好好相與，其實我係惡嗰個，我喝一聲佢哋就驚我㗎喇！我會打手板，會體罰㗎！同埋我聲夠大，粒眼珠夠大，我碌大對眼喝一聲就驚，我認真起上嚟唔講得笑！」

東東與太太在教女上有共識要言行一致，所以兩人都是嚴父嚴母，女兒不會覺得父母有一方「好恰啲」。囡囡已試過多次激到父母發惡，單是食飯不聽話已經好激氣，「食食吓飯無端端趴喺度、喺張枱度跳嚟跳去，又拎啲碗掟，一定要教好！但淨係惡都唔得，要軟硬兼施，有時會用啲糖引佢哋，乖乖食完飯就獎粒糖，真係一啖砂糖一啖屎。」