離婚後囡囡鼓勵 黎瑞恩 再尋唱歌夢想

撰文：Ling
攝影：Clay Lam、部分相片由受訪者提供

脫下戒指鬆一口氣

小恩子形容婚姻是人生一場最大的賭博，過去11年的婚姻生活，經歷了不少快樂時光，亦得到兩個可愛小朋友凱栭和浩儒。但人會變，婚後幾年已感到一個走去火星、一個走去月球，雙方的步伐愈走愈遠。她檢討過可能是自己把時間全放在小朋友身上，忽略了前夫，而且自己說話太直，傷害了別人也不知道，導致兩人爭拗漸多。小朋友看在眼裏，勢會影響成長，兩人不得不作出重大決定。「有時拗完媽媽會喊，爸爸又黑晒面，咁樣唔係幾好，父母係子女一面鏡，係模仿對象，如果父母開開心心，佢哋咪會開心。」

「一人有一個夢想」，小恩子的夢想一直是唱歌，之前為家庭放下歌唱事業十多年，現在仔大女大，連女兒都覺得媽咪應找回自己的夢想，重拾咪高峰。現在小恩子好喜歡現在的自己，能做自己喜歡做的事感到無比快樂。

決定分開後，小恩子有如釋重擔的感覺，脫下戒指更鬆一口氣，「分開未必唔係一件好事，可能喺小朋友嘅角度會有啲遺憾，唔係一個有爸爸媽媽嘅屋企，但如果爸爸媽媽唔夾、唔開心的話，日日見到爸爸媽媽咁樣，其實都影響佢哋長大，即點樣睇男女關係嘅心態，甚至令佢哋有陰影，以為屋企人相處係燶口燶面。」

女兒欣喜父母開心

孩子面對父母分開，難免會出現負面情緒，尤其女仔心事較多，小恩子需要為凱栭作出輔導，而浩儒當時只有8、9歲，未知發生甚麼一回事。「家姐有少少嘅（情緒變化），我有同佢傾過，爸爸媽媽係分開咗，但佢覺得我依家仲開心，爸爸又開心咗，所以都冇乜嘢。」

小恩子另一個大夢想是開設一間洗腎中心，因老爺是腎病患者， 並探訪過洗腎中心的病人，因腎病大大影響生活，亦為他們未能發揮所長感到可惜，希望今年能舉行演唱會為腎臟基金會籌款，幫助病患者買家用洗腎機。

開頭有段時間不開心，但返學發現有同學的家庭情況差不多，生活也是如常，慢慢就放鬆心情，小恩子說：「佢內心深處點諗我唔知道，但佢有日放學返嚟同我講：唔緊要啦媽咪，我啲同學都話佢哋爹哋媽咪都係咁。」時間可以沖淡一切，好快凱栭見到媽咪開心，自己都豁達了，「佢見到原來咁樣父母係開心啲，好快就冇嘢，仲話『依家仲好啦，我哋仲開心！』」

囡囡過澳洲兩個多月就回港放暑假，小恩子覺得囡囡好似無走過，「依家科技咁先進，我哋日日都講電話，日日都會FaceTime。」

教仔女要體罰講道理

仔女開始踏入青春期，13歲凱栭有少少情緒波動，11歲浩儒仍未出現問題，小恩子指仔女至今都好乖，未有反叛情況，反而同個女感情好到似拍拖。「男仔遲發育，女仔會多嘢講啲，我哋好似friend，仲好似拍拖呀，出街有人撞到我哋兩個，都覺得我好似情侶咁癡纏，成日啜嘴！」

樣子童顏的小恩子一臉慈母，但都有發惡的時候，甚至施以體罰！「我會打手打腳，唔會打面，我主要係講道理，但有時佢哋唔係好明，要同佢.傾多.，或者體罰完再講點解我要咁做。」仔女之中，阿仔比較令人勞氣，主要因為兩人性格不同。「家姐好醒水嘅，見到我塊面黑黑哋，佢就知道要做回自己本分；細佬就比較天真，冇咁成熟。有時我話嬲，叫佢哋唔好再問，佢都係繼續問，激到我更加嬲！其實我喺仔女身上都學到好多嘢，例如我嘅容忍程度啦，由本來好爆變到冇咁爆，要慢啲。」

小恩子有少少潔癖，故十分重視子女的清潔，「養成佢哋要整齊啲，食嘢唔好一枱都係，食完一定要抹，我好怕污糟，依家大女比我更乾淨。」

小恩子覺得仔女唔聽話，或許是冤孽，「即細個可能我都係咁樣，激到阿媽紮紮跳，依家報番喺我身上！細個阿媽成日叫我唔好著短裙出街，會冷親膝頭哥，依家年紀大啲就明，真係好易病；細個又好鍾意著來着去都係着幾件衫，依家我個女又係咁，話佢點解唔着其他，佢話『我鍾意着嘛！諗諗吓我細個都係咁。」

仔女愛聽媽咪國語歌

仔女性格不同，喜好也不同，凱栭鍾意畫畫、設計，浩儒鍾意打泰拳，「因為佢太肥，我要捉佢做運動，時下小朋友都鍾意打機，我就唔想佢成日對住部電視、電腦，一定要有啲運動。學咗一兩堂之後佢鍾意喎，咁我要佢繼續學。」阿仔上泰拳班只有一段短時間，未減肥成功，但手臂實淨了。「本來佢手臂拋拋吓，依家實咗有老鼠仔，佢話『媽咪你撳吓吖！』」

兩人其中一個共同喜好皆遺傳媽咪，就是唱歌，日日在家載歌載舞，凱栭現最愛唱韓文歌，浩儒就唱英文歌，問到有冇偶像，小恩子笑說：「我都唔知佢哋係邊個，但個韓星係靚仔嚟嘅。」

至於媽咪當然是仔女永遠的偶像，媽咪的歌都有聽開，「佢哋喺架車度迫於無奈要聽，哈哈！佢哋鍾意聽我新碟啲歌，因為以前我好少喺佢哋面前播自己啲歌，或者講我以前做過啲咩，今次因為我要做唱片，我就成日喺車度播自己嘅碟。佢哋最鍾意國語歌〈城裡的月光〉，佢哋有讀國語。」經典熱爆歌〈一人有一個夢想〉仔女都識，不過就好少唱喇。

一對仔女都有遺傳媽咪的唱歌天分，但沒有學唱歌，靠天分加上在家「唱唱吓」練習，「我哋細細個都係唱唱吓唱番嚟㗎啦，冇話跟邊個老師學，或者佢哋大啲想喺唱歌方面發展，咪等佢哋自己選擇囉。」

分析入行利弊

如果仔女想入行，小恩子都不會反對，但一定會講清楚入娛樂圈的利與弊，「弊就係無晒自由，去到邊人哋都可能認得你，同埋可能會有人跟住你、影你相，無晒私隱。但如果你鍾意舞台，你會好開心，唱得好會有好多掌聲，所以佢哋要選擇同衡量。」不過，小恩子覺得仔女的夢想暫不在此，見到媽咪復出唱歌、做宣傳，都不太有興致。「佢哋會問『媽咪你又影相？又訪問？』好多又囉，我話做呢一行係咁㗎喇。」小恩子明言不知道仔女的夢想，但他們將來想做甚麼，媽咪都會支持，為人父母只希望仔女健康快樂，讀好啲書，「完成學業想有咩發展，我覺得嘗試吓都無妨，最緊要唔好害人，做一啲正途嘅嘢。」

囡囡提出澳洲留學

要追求夢想，首先要讀好書打好基礎，再憑知識開創自己的路。去年10月小恩子在社交網站上寫道：「一轉眼已經13年喇，我的寶貝要自己展開人生另一個旅程，就算有幾唔捨得，做父母都要放手，因為佢嘅成長，唔在於我哋為佢決定幾多，而係要佢學識面對幾多，呀女，加油呀！」原來是囡囡自己要求出國留學，原本選址英國，後來改到澳洲升學，「我覺得英國啲人比較斯文，美國好似太開放『hey mom！』唔好hey啦，我哋比較傳統啲。澳洲就比較陽光自然啲，唔會成日好灰暗咁。因為遲啲細佬都會過去，覺得澳洲比較適合細佬，所以一齊揀咗澳洲，但兩個一定唔同校，依家個女讀女校。」

凱栭最近回港放暑假（澳洲是夏天），新年會返回當地，今次回來小恩子覺得囡囡變得成熟了，「小朋友真係大得好快，兩個月冇見已經同我一樣高，佢個人都有交帶咗。」

家長少啲say no

為人母親十多年，小恩子悟出一個道理，家長要多讓孩子嘗試，不要凡事say no，迫孩子跟着你的安排去走。「小朋友嘅童年好短，最多十三、四年，如果佢哋細個要承受好多壓力，父母又迫佢做呢樣嗰樣，到佢哋大個會依賴人哋安排。細個要俾佢哋有適量自主權，唔係話佢鍾意做乜就乜，但家長可以少啲say no，多啲俾佢哋選擇：你覺得我俾呢樣你做，你會點做呢？你想學乜嘢，我俾你去試，你試到有嘢鍾意嘅，你決定要學好就要keep住學，唔好半途而廢。」

女兒往往有窩心的舉動，小恩子的女兒自六、七歲開始給媽媽寫「情信」，早前身在澳洲的她於網上撰寫「給媽媽的信」，感謝母親多年來的付出，令小恩子喊到豬頭。