雪梨乾甘草雪耳瘦肉湯

撰文：小小豬的成長日誌
圖片：小小豬的成長日誌

雪梨乾同埋雪耳都係可以滋陰潤肺、乾咳痰嗽，而甘草就可以清熱解毒，祛痰止咳，所以好啱我依家喉嚨唔舒服時飲呀！

材料：
雪梨乾一兩(約有十二片)、甘草半兩(約五片)、雪耳一個、蜜棗三至四粒及瘦肉$40~

其實甘草原食譜係落一兩，不過當我去藥材店執藥材時，店員話如果落太多甘草的話，整煲湯就會甘味比較重，小朋友應該唔鐘意嗰一陣味。

我鐘意煲湯唔多唔少都係為左小小豬，佢平身因為濕疹關係，好多嘢都唔食得，所以要多啲煲湯等佢吸收唔同營養。為左令小小豬開開心心咁飲湯，我就聽店員建議啦！

做法：
雪耳浸發洗淨切件，瘦肉切件出水，其他材料浸洗乾淨~

將1L清水燒熱，然後放入所有材料~

由於雪耳唔可以隔夜，所以我都係煲夠一餐嘅份量，用1L水可以煲出六碗湯，夠我地三口子飲啦！

待水再滾後轉低火煲一個半小時~

最後加少少鹽作調味之後(真係少少就夠啦)，就可以飲得啦~

其實初時都俾店員嚇一嚇，好驚個湯唔好飲。但飲落又真係唔錯，入口第一啖就覺得清清地又甜甜地，當入到喉嚨時又感受到嗰一份甘甜味，連老公都讚有驚喜，飲完喉嚨又真係幾舒服哦！
哈哈哈….就連小小豬都話好飲，飲完兩碗之後仲要追住添飲。不過湯就真係每人兩碗冇得多，小小豬唯有向食左會靚仔嘅雪耳埋手，整煲湯嘅雪耳都俾小小豬食晒呀~

難得佢地兩父子都咁鐘意，真係勁有成功感，等我過多兩日再煲多次，等三口子滋潤下之餘，又等我添多啲自豪感啦….哈哈哈！