電視城明星撞鬼實錄 張家輝 鄭伊健 林峯 都有份！
撰文：東方新地｜圖片：新傳媒圖片庫
TVB劇《逆緣》驚現疑似鬼影
《逆緣》黎諾懿夏文汐忘年戀
黎諾懿喺《逆緣》戲份唔算太多，不過37歲的「馬壯」同52歲夏文汐發展忘年戀感情線，兩人喺劇中有唔少親密鏡頭，其中兩人喺月光下錫錫一幕真係… 令人難忘！不過劇情已經講到黎諾懿癌症病逝，忘年戀不再！
驚現女鬼黑影？
但講番早前一集，講述患末期癌症的黎諾懿與家人爭吵後頭暈不適，於是夏文汐扶佢上房，坐喺床邊休息。呢個時候，畫面偏右位置竟然出現一個神秘黑影，感覺似係一個長髮女性，該黑影只見上半身，正正位於椅子上方。望真啲，個黑影仲好似伸手拎住杯一樣…
該黑影由始至終都係一動不動，仿似望住黎諾懿同夏文汐演戲咁… 不過咁，其實片場到處都係工作人員、到處都係燈，有人唔小心將影子打喺木板上都唔係冇可能的，但事實係點就無從得知了…
網民齊搵鬼！起底 & 查證！
到底係嚇一跳定係得啖笑？話說電視城經常有撞鬼傳聞，今次在片場的異物，難免引起觀眾亂諗嘢！甚至幫手用Photoshop查證：
電視城明星撞鬼實錄 張家輝篇
清水灣電視城咁多靈異事件，真係講極都講唔完！話說當年尚未成為影帝嘅張家輝，亦曾於清水灣電視城遇上口哨鬼，事發於半夜時分，當時佢正於四廠趕拍同宣萱主演嘅劇集《騙中傳奇》，突然成組人聽到廠內傳出口哨聲，即使拍攝期間亦未停過，但拍完之後睇翻重播，卻聽不到之前口哨聲，令在場所有人毛管戙！
鄭伊健篇 夜戰驚魂
鄭伊健一向都大唔透，有次佢趁放假相約一班幕後人員，於黃昏時分到電視城打War Game。當時八個大男孩在民初街上拎住武器你追我逐，玩了個多小時後戰事結束。眾人打算分車離開時，領隊鄭伊健數人頭離開，數來數去都是九個人，當時有人以為他玩嘢嚇鬼，但他卻一臉認真。其中一人代伊健再數一次，結果同樣是九個人，眾人不敢再考究，極速走人。
女鬼索命
除了打War Game出事，伊健亦試過在電視城錄影廠內遇上怪事！當時佢正等埋位，期間瞓在地氈上休息，突然有盞燈由高處跌下，正正跌喺佢身邊！伊健事後說︰「發生意外後，有位有陰陽眼同事話之前見有個穿小鳳仙裝女人坐於燈槽上，盞燈無整傷我，可能佢同我玩啦，不過我以後入廠都唔敢唔拜神！」
林峯篇鬼揞眼事件
位於電視城走廊凹陷位嘅男藝員休息室，真係邪到你唔信！談及將軍澳電視城男休息室，林峯講起都怕怕︰「個男休息室好邪門，試過有次入去瞓覺，吩咐咗個PA一個鐘後入去叫醒我，我瞓瞓吓扎醒，見過晒鐘，咪入廠問個PA點解唔叫我？點知佢話入到去見我唔到。咁邪！自此我都唔敢再入休息室瞓覺。」
原來TVB最陰的地方便是位於整條走廊凹陷位的男藝員休息室，陽光完全射唔到入去，容易積聚陰氣。休息室面積約一百呎，米白色牆，有五、六張單人梳化，燈光陰暗，嚴禁拍照。
屋企遇女鬼事件
除咗呢件事，林峯原來亦試過在屋企見到女鬼，「事發喺兩年前，我記得嗰晚好攰，瞓瞓吓俾女鬼『責』，佢壓到我手腳郁唔到，精神係醒嘅，突然寒一寒，見到佢去到床角位，有陣煙，有一個人影，我心諗死火喇！避都冇得避，我試圖郁，佢就愈大力，我同佢講︰『我好攰，第二日要開工，求你俾我瞓啦！』 佢個影就慢慢走近我，仲同我講國語︰『就是他，就是他……』 之後就消失咗！」
吳卓羲篇 目睹同事鬼上身
現在已離巢的吳卓羲都見識過將軍澳電視城男休息室嘅恐怖！不過唔係佢自己有事，而係佢同事！吳卓羲曾於男休息室遇上怪事，回到2003年時：「當年拍《英雄•刀•少年》，因為趕戲日接夜咁拍，我同成班訓練班同學都喺休息室瞓覺。點知瞓瞓吓，隔籬個同事突然講嘢，好似鬼食泥咁，但聽唔明佢噏乜，最恐怖嘅係佢把聲變咗第二個人把聲，跟住其他人都俾佢嚇醒，成班人驚到雞飛狗走！」
「小朋友」深夜來嚇
吳卓羲續言：「我亦聽過有同事話曾經於凌晨時分，喺男休息室見到個年約七、八歲嘅細路女，問佢點解喺度，個女仔冇應，其實無綫規定喺夜晚11點前，所有童工都要離開。自此，就傳出男休息室有『小朋友』。」
姚子羚篇遇上冇腳女鬼
林峯、吳卓羲都在男休息室有過非一般「驚」歷，今次就帶大家去到化妝間，話說姚子羚曾經在化妝間遇過冇腳女鬼︰「有一日拍《棟篤神探》拍到半夜，當時化妝間除咗我之外，仲見一個着灰色T恤長髮女仔，低着頭坐喺化妝間嘅一角，驟眼睇佢唔似藝員，又唔似化妝阿姐，以為係生面口臨時演員。我冇理就瞓一陣，突然感覺寒風陣陣，我就扎醒，跟着我支唇彩跌喺佢附近，我去執時唔見佢雙腳，起初我以為佢雙腳瑟縮喺櫈上，我睇真啲，佢冇腳之餘，原來個樣模糊到不見五官。當時我勁驚，即刻跑出走廊比較光猛地方！」
化妝間的腳步聲
另一則化妝間傳聞發生於清水灣舊廠，事發時有兩位負責梳頭、化妝員工，閒來無事，坐於化妝間睇電視，突然聽到有「人」行入的腳步聲，喺鏡子睇到係一名中年男子，佢哋以為有人需要化妝，點知一轉身竟然鬼影都冇隻！此外，道具部走廊亦一直流傳有「人」身穿旗袍，經常於深夜時分喺走廊走來走去，至於係人定係鬼，咁恐怖，梗係冇人敢去證實啦！
奶茶婆婆：你飲咗未？
昔日清水灣電視城鬼故多籮籮，但最駭人肯定係「奶茶婆婆 」！
唔少藝人聽過令人毛骨悚然「奶茶婆婆」故事，地點都係6號廠同一間女廁！話說有工作人員如廁時竟有人敲門，突然有把婆婆聲音說：「你飲唔飲奶茶呀？」工作人員以為係同事開玩笑，只怒吼一聲：「咪玩啦！」事後佢跟同事人談起此事，有位警衞哥哥即言之鑿鑿說：「又飲奶茶？之前有個夜班同事當值時都有個婆婆走嚟問佢飲唔飲奶茶，夜媽媽人影都無隻，邊度會有婆婆、邊度會有奶茶呀，個同事醒目知道自己撞鬼，咪好禮貌咁拒絕咗囉！」
多年前陳錦鴻趕拍劇集《獄焰驚情》(又名《蘭花劫》)，多次遇到無法解釋的怪事。有晚凌晨時分，陳錦鴻如常在電視城十五廠開工，由於位置較入，給人陰森感覺。當晚佢只係拍攝一場簡單文戲，對白唔算複雜，偏偏成晚食螺絲，NG好多次！
到監製唐基明第二日睇重播時，卻發現之前一晚所拍的片段，全部只有畫面，演員講對白的聲唔見晒！反而錄得一把陰森女聲，仲唱住類似《等着你回來》的老歌。怪事接二連三發生，無綫即提前進行開廠拜神，祈求拍攝順利。
Bobby俾鬼拍醒
除了峯峯之外，歐陽震華(Bobby)都喺男休息室遇過怪事：「嗰日係日頭，見未夠鐘入廠，咪喺男藝員休息室瞓覺。點知突然俾人拍醒，我好清楚聽到一聲大力拍大髀嘅聲，我扎醒咗，但成個男藝員休息室都冇人，我成身都唔郁得，維持咗一陣，之後我望一望錶，可能夠鐘入廠，嗰啲嘢想叫醒我！有工作人員話有細路仔嘛，但我就未見過。嗰次之後都冇再入過去，咪搞！」
滕麗名女廁撞邪
當年滕麗名剛加入《真情》劇組，《真情》於舊清水灣電視城6號錄影廠拍攝。而6廠位於舊城較入、亦較陰一邊，最近6廠女廁更係全城「陰中之陰」，以往已傳出過不少鬼故，所以好多藝員都避之則吉，情願行遠兩步去其他廁所解決。
偏偏有一晚阿滕人有三急，惟有硬着頭皮衝入去6廠女廁解決。該女廁共有4格、4個洗手盆和4面鏡子，由門口至貼牆依序排列。佢揀選最近門口廁格，衝入去以最快速度解決後，即時衝返出來用第1個洗手盆洗手。當佢邊洗手邊望向鏡時，竟發現自己個樣出現喺最後一塊鏡中，嚇到佢標冷汗，即時以極速跑返入錄影廠！
電視城以外 楊怡篇
其實如果真係要撞鬼，不單係電視城，無論你身處咩地方都冇得避！話說楊怡小時候有一次夜晚獨自坐巴士返屋企，途經沙田時，因為紅燈架巴士停低咗，呢個時候佢望出窗外面街道上，竟然有個汽水罐竟然直立式咁彈吓彈吓！仲要每次都彈到好高，有成兩三呎！初頭佢以為有人用線拉住個罐，但睇清楚知道一定冇可能，因為附近都無建築物，成條街當時亦都無人！
另外喺前年五月，潘紹聰主持《恐怖在線》中，有住喺大埔比華利山嘅女聽眾爆料，直言早前於該處見到剛新婚羅姓男星(即係楊怡老公羅仲謙)，其車頂上驚現兩個靈體，令人不寒而慄！女聽眾指當日佢於下午五點半左右坐車回到大埔比華利山寓所，落車後見到謙謙座駕，停於早前佢聽到有古怪叫聲的位置，原來當時謙謙架車死火。女聽眾最初看到對方車頂上有兩個疑似膠公仔，但仔細一看，兩個只穿白色褲冇着衫的公仔，竟然向佢揮手，女聽眾當堂嚇到轉身！形容兩個公仔似外國真人公仔，日光日白唔係咁猛呀！
森美篇女鬼都聽《架勢堂》
森美都曾在深夜節目《架勢堂》中撞鬼！早年在節目中，小儀接到聽眾電話，對方正準備分享遇鬼經歷時，電話中突然傳出一把哀怨的女性嘆息聲，但該位聽眾堅稱當時家中只有自己一個，並冇聽到任何聲音，一向轉數快的森美都嚇到騰晒雞！事件擾攘近兩分鐘，森美突然播歌避開話題。當歌曲播完，森美率先開聲道歉說︰「有怪莫怪，細路仔唔識世界，今次真係有排驚。」
消失的老婆
另一件事發生於前年農曆新年間，森美同家人去咗北海道滑雪，撞到任賢齊之餘，仲知道梁朝偉、羅霖同陳百祥都同一時間在當地旅行。但之後同老婆滑雪時就發生咗靈異事件，話說當時非常大霧，森美與老婆在同一條雪道滑雪，但佢去到終點後一直未見到對方，於是森美就行番上山搵人。行到一半，森美見到離遠有人同佢揮手，但當佢急急跑上去後，竟然一個人都見唔到！講到呢度，森美自己都忍唔住笑了！原來揮手者的確係佢老婆，不過太太揮手之後又唔小心滑出跑道以外的地方！嚇死人咩！
女鬼送客
另一商台前男DJ表示，多年來都斷斷續續傳出怪異事件，當中最嚇人包括「電梯槽女鬼送客」同「半身人」！「多年前有兩個電台DJ喺凌晨時份收工時搭電梯，商台到夜晚10點就會鎖前門電梯，所以佢哋搭後門電梯離開，當時佢哋由3樓搭落地下，而其中一人無意間向上望時，發現電梯槽抽氣扇位有個女人頭俯視住佢哋，個DJ直頭嚇到唔敢出聲，又唔敢同隔籬嗰個講，隔咗幾秒鐘，佢又再向上望，發現個女人依然喺度望實，真係嚇到死咁滯，架電梯一到地下佢即刻拉埋另一個DJ急急腳走，直至離開商台至敢講出嚟。」
半身人凌空飄移
好多年前，商台啲夜更司機都會貪方便喺公司後欄開張帆布床瞓，有次有個男DJ半夜時想搵茶水阿姐，於是走埋去問個司機知唔知阿姐去咗邊，問咗兩句個司機都無理佢，於是佢用手拍個司機膊頭，拍咗兩吓個司機終於有反應，不過依然係用背脊對住佢，無出聲咁企咗起身，個男DJ嗰刻先發現個司機只得上半身，下半身係凌空飛起飄移，當堂嚇到拔腿就跑，事後病足成個星期！
曾主持《恐怖熱線》嘅潘紹聰，笑言多年來都聽過唔少鬼故，自己亦親身經歷過：「記得有次主持節目，從控制台玻璃倒影見到有個黑影喺我背後閃過，當時自己都嚇咗一跳，因為好少會on air時有人走入嚟，轉頭一望發現根本冇人，個心即時寒一寒，但當時個聽眾仲講緊鬼故，所以當時我都強裝鎮定，呢個時候突然無端端有把女聲『呀』尖叫咗一聲，事後我再聽番段聲帶都一樣聽到！」
港台有鬼車
某港台前女DJ爆料，該台其實都好猛，最經典莫過於夜班看更所見所聞。「一到夜晚，港台都會閂閘，職員每次出入都要由夜班看更開閘，有晚個看更聽到從遠處傳嚟幾聲撻匙聲，知道會有車駛出，所以就起身準備開閘，點知一行出更亭，就見到部黃色嘅私家車穿過閘門而出，但閘門冇爛，嚇到個看更即時辭工！」
麥潔文除了於電影《靈氣迫人》演女鬼，更主唱主題曲〈夜夜癡纏〉，據說係全港電台嘅禁播歌！
因為每次深夜播放時，都會發生極度恐怖嘅靈異事件！有傳因該曲開始時，麥潔文哼出「嗚嗚聲」，特別容易招惹靈體，而有DJ曾試過深宵播放時，發現黑影閃過，聽眾聽了後又被鬼壓；最恐怖一次係播放時有另一把淒厲女聲，悲鳴咁邊喊邊哼歌，電台人員之後重聽該把女聲仍在，嘩，真係令人不寒而慄！
