餐廳內BB大叫被幾枱食客投訴 港媽不滿職員勸教好小孩 65字反駁惹網民負評

港媽BB餐廳內大叫被職員投訴 否認影響食客

一名港媽在Facebook討論區「香港米線關注組」撰文，指控觀塘某間連鎖餐廳雖然有BB坐椅提供，但不歡迎BB，她勸有小朋友的家庭不要去受氣。事緣BB肚餓，她走入餐廳餵BB吃粥，中途BB大叫幾聲，食飽之後就沒有再叫。

其後一位男職員突然走過來投訴，表示影響到其他人，有幾枱食客結帳時黑面，投訴BB太嘈。港媽反駁BB現在已經沒有大叫，質疑食客為何在結帳時才投訴，而不是當刻投訴：「吓！阿B無嘈啦喎！」男職員解釋，BB已經大叫了一段長時間：「頭先阿B都嗌左好耐吓，麻煩控制吓。」但港媽反斥過去還過去，現在還現在：「已經控制咗，你都識講頭先，我B依家都無嘈，你依家嚟投訴？」之後她跟職員開始對鬧。

職員批評沒有教好BB 港媽說出難處

他們先爭拗未夠一歲的BB是否能教好的問題，一位女職員衝過來幫口：「因為有食客投訴，都好影響到食客，麻煩控制吓BB，叫佢細聲啲。」港媽反問：「吓，佢一歲都未夠，你覺得我可以點樣叫得佢明要細聲啲？」女職員說：「咁你可以教。」港媽愕然：「未夠1歲你覺得可以突然教識？」女職員指責港媽沒有盡到媽媽責任：「咁未夠一歲都可以教㗎嘛係咪？！咁你依家開始教佢細聲啲囉！」

港媽認為女職員不明白媽媽的無奈：「你有小朋友未？你知唔知小朋友唔係即時可以控制到？」女職員表示自己同為人母，港媽即叫對方示範如何馬上控制到小朋友。突然女職員碌大對眼地說：「唔關我小朋友事！」港媽指女職員應站在媽媽立埸：「大家都係做人媽媽，你都明唔係話控制就控制到㗎？體諒吓好無？」女職員更加嚴厲地說：「你可以帶佢出去！你都體諒吓其他食客！」

職員指BB太嘈 港媽反駁BB從沒喊過

最後他們再度爭拗BB大叫的時間與聲浪，港媽指：「你見唔見到我B食緊粥，完全無再嗌?」女職員認為時間長短不是重點，而是聲浪過大：「我無見過BB好似佢嗌得咁大聲囉！」惟港媽不滿女職員話自己BB大聲：「你依家係咪即係歧視我仔？」女職員馬上澄清：「我無咁講過，小姐你唔好亂講嘢。」港媽形容自己當刻「嬲到爆」，最後反駁BB只是說話，沒有影響其他人：「咁你特別話無見過BB好似我仔咁嗌得咁大聲，唔係即係歧視我仔咩？仲要埋嚟投訴喎！你要講嘢，BB都要講嘢啫，我B仲要係由頭到尾都無喊過！」

網民炮轟港媽沒有理會他人感受

港媽出帖文公審餐廳職員，引來網上極大迴響。有網民支持港媽，認為一歲BB太難控制，批評職員處理手法很差:「不如立法以後唔畀三歲以下入餐廳啦好無？」

惟大部分網民都批評她自私、無公德心，沒有理會其他人感受：「人哋投訴得你，肯定你個B嘈得好勁，不過喺你眼中肯定覺得無乜嘢」、「嗌到幾枱都投訴應該真係幾嘈」、「點解要人受埋你個仔嘅噪音？」、「好多時啲客都係死忍，只係今次有人出聲投訴咁解」。港媽回應時承認BB有嘈過，但職員投訴時已經收聲，網民指：「投訴時無嘈，唔代表影響唔到人，人哋埋單先投訴係費事即場話你。」

有網民建議港媽下次應該先承認錯誤，講句「唔好意思會注意吓」，其實很多人都會體諒，而不是拒絕承認影響到其他人：「呢啲嘢係大家互相體諒，得確係嘈到人咪好禮貌啲講句唔好意思咪過咗去囉。」而且他們覺得即使BB未夠一歲都應該要開始教好他：「唔講以為一個月，一歲唔開始慢慢教等幾時？」