香港旅客量急跌 遊客拒來港 港人列5大執輸原因：本地人都想走
1.香港無聊冇嘢玩 本地人都嫌棄
唔少香港網民認為香港非常無聊，作為當地人已不知道有什麼好去處，就算就算有錢，都會選擇去旅行，並非留在香港消費：「香港有咩好玩呀，夜市？邊個亞洲國家冇？平過你，好食過你」、「旅行嚟講，香港真係冇咩好值得去」、「人地衰極都有百幾個夜市，香港得個廿蚊4粒燒賣」、「香港勁在廿年前同今日都係一X樣」。
2.香港商人食老本 美譽不再
以前香港被稱為「美食天堂」、「購物天堂」等稱號，不過港網民認為現時香港根本配不上這些稱號，又指香港不會創新，只懂得食老本：「仲夠膽食老本話自己美食天堂，貴都唔再講，去親度度啲食肆都倒模咁，可以一層有幾間舖你以為好多選擇，點知全部都同一個集團嘅，又貴又難食」、「當年自己吹美食天堂，而家啲人眼光闊咗，就知根本吹大咗」、「唔好話食嘢，連嗰啲跨年節目煙花匯演，播嚟播去都係十幾廿年前啲歌，每方面都係食緊七十至九十年代老本」。
3.香港服務態度極差 本地人都頂唔順：旅客點會肯過來
此外，香港的服務態度非常出名，不過就不是出名地好，而是出名地差，因此不少遊客會投訴，連本地人都頂唔順：「食嘢又貴，又唔係特別好食，服務態度9成西，又要搭枱，有啲衰到75分鐘限時，想傾多幾句都比人眼超超，本地人都咁既情況，旅客點會肯過來」。
4.香港失去本地特色
有網民認為以前香港是文化輸出龍頭，電影及音樂產業可以帶動旅遊經濟，不過現時香港娛樂產業風光不再，而且沒有本地特色，因此難以吸引遊客來港觀光：「霓虹燈、招牌都拆得七七八八，上太平山睇夜景，一次就夠」、「好多代表到香港既野都消失晒，中西合壁文化消失， 倒模商場、工場快餐，同新加坡一樣去1次就夠，唔會想黎第2次」、「啲商場鋪頭一模一樣，英式建築都買少見少，復古又唔復古，創新又唔係新，四不像咁」、「好多人係睇以前啲電影感受香港了，依加啲香港電影，香港都沖出唔到，好似之前日本妹黎咁，去尖咀剩係感受到屎味」、「以前啲鬼佬、日本人好鐘意來香港睇霓虹燈，好CYBER，自己摧毀自己賣點文化」。
5.超高物價勁趕客
最後，就是香港的超高物價，不過提供的品質卻不成正比：「業主見搵到錢就係咁加租，商戶為賺錢就一定係咁加價，同時控制成本啲野出品又愈黎愈X」、「以前香港買嘢平，嘢又好食，又可以睇下夜景，依家三樣都冇」、「去東京、首爾都平過香港啦！」
