魯文傑 集體回憶傳真機
舞台劇結良緣
Simon哥哥前年12月榮升Simon爸爸，與年輕16載的舞台劇演員梁嘉敏（Pinky）誕下愛兒魯煦耀（Jathan ），兩人於2010年合作音樂劇《一屋寶貝》時認識，求婚時亦得到《一屋寶貝》台前幕後幫手，順利抱得美人歸。1991年讀演藝學院，92年入TVB，Simon一直在舞台劇及電視雙線發展，2012年轉投HKTV，現已約滿專心做舞台劇，早前更報讀了演藝學院戲劇教育碩士課程，但他要湊仔又要演戲，需停學一排。「啱啱嗰個sem都幾辛苦，都幾多功課，依家亦開始有啲團體叫我教演戲。」太太Pinky現為全職家庭主婦，但隨着湊仔生活穩定下來，計劃復出工作，但未必回歸演戲。
節目中另一經典「古怪家庭」改編自愛登士家庭，主要介紹不同地方的有趣奇聞，Simon飾演達達Cousin，頭髮梳到箭豬頭，麥包（右一）則扮演怪管家。
譚玉瑛常飛法國品酒
Simon加入TVB不久就被派往主持《閃電傳真機》，第一日見到譚玉瑛就被她的威嚴嚇倒，完全不是電視中熟悉的譚玉瑛姐姐，「我第一日見到譚玉瑛就忍唔住同佢講，我細細個就睇你大架喇， 跟住佢應該有少少嬲， 但又唔可以鬧你，『係咩？係呀？（高八度聲線）』嗰一刻我覺得，點解咁惡嘅譚玉瑛姐姐……」合作相處數年，譚玉瑛其實是非常友善的人，亦懂得享受人生，Simon大爆譚玉瑛經常飛往法國歎世界，「《閃電傳真機》逢星期六日拍，佢就星期一飛去法國，星期五返，佢去做咩呢？去試紅酒，好識得享受生活。」
93至94年林志穎有首經典兒歌〈野菊花〉，在《閃電傳真機》日日播，個個細路都識唱「野菊花呀野菊花」！
離開兒童節目後各散東西，Simon最懷念一班舊同事，感情好到逢周六日都要見面，持續好幾年，「我哋太似屋企人，好close，依家間唔中仲有出嚟食飯，譚玉瑛都有，我嗰期仲有麥包（麥長青）、黃智賢、姚安娜、蔡子健、羅貫峰、蓋世寶，仲有幕後嗰班，感情仲喺度，好難得囉！」
醉心舞台 無心做電視
譚玉瑛經歷多個兒童節目朝代，身邊同事如車輪轉，但她仍會留意每位舊同事的動向，像Simon轉往拍劇及舞台劇雙線發展，譚玉瑛亦有留意他的表現，直言他在電視的演出不及舞台劇，「你做舞台劇好好睇喎，點解做電視咁嘅？」Simon指譚玉瑛睇人好叻，亦好坦白講出她的心底話，「好似有套戲我做第二男主角，但出嚟反應麻麻哋，佢又覺得我做得麻麻哋，覺得我冇乜心機拍，係咪以為拍劇好簡單，因為舞台劇成日排戲排到熟，電視劇唔使。某程度佢都講得啱嘅，可能以前我睇小咗電視，覺得講晒對白得啦，冇研究角色。」
去年尾公演的話劇《巨型曲奇》，已為人父的Simon飾演爸爸更有感情。
Simon曾奪得香港舞台劇獎最佳男配角（喜劇/鬧劇），愈做愈有，相反在電視台愈做愈霉，後期的咖哩啡角色連對白都無，心淡離開TVB，「呢行唔係你付出幾多，收穫就成正比，我一開始唔係諗住做電視，我入演藝係想做戲、做舞台劇，所以電視個心唔夠強，冇乜目標，我好易滿足，唔係要大紅大紫，都係想做戲啫。」
2013年參演的《莫札特之死》，配合戲劇、文學、音樂及視覺藝術演出。
做兒童節目想教寫apps
《閃電傳真機》出過多齣風靡細路界的趣劇，Auntie烏卒卒、麥氏偵探社、古怪家庭及鼠洞等等，當中一曲〈小老鼠與大花貓〉，一班大細路依然識唱！Simon最深刻卻是「空中暢遊」環節，「我哋會帶埋小朋友一齊搭飛機，喺香港上空兜個圈去玩，好有意義！仲會去好多郊外，依家好少節目會帶小朋友去睇。」
他直言現時工作忙碌，比較少睇兒童節目，兒子都沒睇，現在播映的《Think Big天地》，換了全新班底，以科目為本，他覺得單是節目名已經難發音，而且內容欠趣味性，「兒童節目係比以前難做，要搵個新方向，唔係唔得嘅，但要更加有趣味，我會祝福佢哋。」
如果再投身兒童節目，會怎樣改革呢？「我諗我要訪問吓小朋友先，睇佢哋想要啲咩，可能會多啲關於電腦，或者遊戲、apps呢啲，依家電話太多嘢玩，可以玩成日，應該會喺呢方面入手。」Simon愈想愈多idea，「教寫apps都得喎，玩之餘都學到嘢；運動都有用喎，強身健體，依家小朋友好少玩，以前都會搞運動日，同小朋友跑步玩games！」
夫婦相距16載
Simon喜歡與小朋友相處，但一直未有打算生小朋友，直至遇上太太Pinky，年過40才獲麟兒Jathan，他坦承怕父子有隔膜，「好彩我性格有童心，赤子之心，我同朋友仲會周街玩，打來打去好無聊，所以我覺得我同BB相處OK，我又做緊戲，個人見識多啲，唔會愁眉深鎖。我希望同個仔會係朋友關係，但都要學嘅，因為成日同佢講『喂！No！』好多order式說話唔係咁好，都好難㗎，取個平衡啦。」
兩夫婦會培養囝囝多做運動，Simon踢波叻會教踢波，Pinky在學校年代已是游泳健將，一定會教囝囝游水。
他想盡量做個朋友式慈父，壞人角色交給Pinky，「問題又嚟喇，佢唔聽爸爸話，我點惡佢都唔理。」兩人年齡相差16載，但Simon充滿童心的性格與Pinky的成熟，恰到好處，最緊要互相遷就，「當然樣樣都有啲意見分歧嘅，睇吓點就囉，好多時爭拗過後就明白對方。」年僅廿多歲的Pinky，外表乖乖女，想不到是嚴母角色，在教仔上兩人時有分歧，Simon說：「佢話要打，但我就好快氹番個仔，佢教緊仔，我又喺側邊整古做怪，好似破壞咗佢教導，佢係啱嘅，個仔點教啫？」
讀書方面由Pinky負責，打算讓囝囝試考名校，十多歲可能送往外國讀書，已購買了教育基金為將來鋪路。
超細B遲一年入學
Pinky主要負責教仔，尤其教育方面，讀名校協恩中學出身的她，知道名校有多好，「協恩係好好，如果生女就好喇！揀學校最緊要睇識到咩朋友，名校總有原因值得人哋慕名而來，我都會俾佢試考，如果佢能力做到，點解唔俾佢試吓呢？有能力梗係俾佢讀間好學校。」
Jathan好識聽指令，叫他笑就會笑，叫「請請」又識合十雙手請請。
不過，Jathan是12月出世的超細B，考學校或會輸蝕，所以Pinky打算讓他遲一年入學，「最主要原因係唔想咁早困住佢，讀書一讀就廿年，點解要佢咁細個就咁辛苦呢？同埋佢係呢幾年先同你玩得最多、最親近你，一讀書就好多嘢煩，我唔相信愈早讀就愈叻。」Simon對學業的態度亦好輕鬆，不想計劃太多，如果香港讀書壓力太大，就考慮送往外國，「讀書唔使諗咁多，最緊要身體健康，唔好做壞人就得喇！」
Simon做戲生鬼，待囝囝3歲會試試戲劇教育。
●撰文：Ling ●攝影：溫俊鏘（ 部分相片由受訪者提供）
●化妝: Kings@KINGS MAKE UP ●場地：Hurray for Play （tel: 2103 1378）
