黃翠如36歲 陸永一家同「翠兒姐姐」慶生

撰文：Sunday Kiss
圖片：wongtsuiyu，missussix@Instagram

「翠如姐姐」變「翠兒姐姐」？

有留意開陸永兩個愛女嘅讀者應該知道SimSim向來古靈精怪，而Hannah則較溫文乖巧！今次嘅笑料源於SimSim仲未清楚讀到所有發音，於是佢就誤將「翠如」讀成「翠兒」！大家都紛紛留言話聽到「翠兒」就諗起兒時那隻黃色金絲雀卡通人物！

有兩位心肝為自己慶生，相信翠如未食蛋糕都已經甜到入心啦！唔知翠如今年嘅願望係咪快啲拉埋天窗，生返一個屬於自己嘅心肝寶貝？

每次見到翠如，大囡Hannah都會話當日係「女人日」，當正爸爸陸永冇到！呢張相再次見到SimSim古靈精怪嘅一面！大家都話SimSim永遠都唔「啱Channel」，但永遠最搶鏡嗰個都係佢！

其實陸永當日都在場，但有「翠兒姐姐」在場，SimSim同Hannah連爸爸都冇面俾啦！

同大夥兒慶祝又點少得農夫同好姐妹唐詩詠呢！翠如自拍攝劇集《幕後玩家》之後就當正陸永係細佬，加上同陸永老婆Reina甚是投契，牛一當然要預埋佢哋啦！

誤以為爸爸用「種子」生BB

每晚臨睡前，陸永母女會在枕頭邊傾密偈，增加親子關係，估唔到今次又鬧出笑料。Hannah問媽媽再生BB會改咩名，仲話想爸爸擺「種子」入媽媽度，睇嚟好想再做家姐！

Hannah之所以咁講，原來源於媽媽早前向佢解釋嘅由來。話說陸永嫂向Hannah講：「爸爸放咗啲『種子』喺媽咪個肚入面，粒種子會慢慢變成一個BB……住到媽咪個肚唔夠位就要拎出嚟」，呢個解釋連Reina自己都話唔係幾好，難怪做成一個可愛嘅誤會啦！

人細鬼大 深得網民歡喜

一眾網民亦對是次母女對答表示「好搞笑」！其實為人父母的，應該都曾經頭痛如何回答呢條世紀難題。好多網民都大讚Reina說：「我覺得解釋得唔錯」、「描述得唔錯，不過可以借機會講下性教育 」、「解釋得好好，我get到啦」。

網民期待陸永囡囡再做家姐

另一派理性網民則非常支持Reina再生多個，更期待做慣妹妹的二女Sim Sim做家姐，向Reina留言說：「咁就生個細佬比佢啦！又唔係養唔起！」、「都好喎睇下simsim做人家姐係點既」。不知陸永大女的「種子論」有無令陸永心郁郁，想生多個呢？！