3大特色 露營 大搜查

編輯：sunday kiss

露營 車玩到攰 塘福Caravans Hong Kong

可能講出嚟會嚇親大家！真係差唔多一年前就book定呢次 露營 Camping(當然平日就未必Full)

首先要成為會員, 填好負責人email給你的registration form, 及ATM過數$100會員費, 選定你要的車輛後再ATM過全數(連入數紙whatsapp給他)!

如遇著天氣不穩定, 大家只有一次改期Quota, 但係需要於入營前兩星期(兩個星期前咁早都唔會預測到天氣係點, 所以多數如期出發, 聽天由命, 碰碰運氣!!)

小型 露營 車 Small Caravan x 2

(可容納2-4成人,包括一張雙人床 及 一張可伸延梳化雙人床)

$1100(日至四; 假期前夕除外)

$1800(五,六或假期前夕)

中型 露營 車MediumCaravan x 4

(比小型露營車大30平方尺, 同樣可容納2-4成人,包括一張雙人床 及 一張可伸延梳化雙人床)

$1200(日至四; 假期前夕除外)

$2000(五,六或假期前夕)

大型 露營 車LargeCaravan x 2

(可容納4-6成人, 包括四張單人床 及 一張可伸延梳化雙人床)

$1500(日至四; 假期前夕除外)

$2500(五,六或假期前夕)

(A) 入住時間: 下午四時, 退車時間昱日二時 (2小型車, 1中型車及1大型車)

(B) 入住時間: 下午三時, 退車時間昱日一時 (3中型車及1大型車)

*提提大家需要預備的物品

✦盥洗用品

✦毛巾拖鞋

✦調味料(如食用油、豉油、糖等)

✦風筒(營地只有3個, 先到先得)

✦ BBQ用品(如炭, 炭精, 火機等; 營地有二手燒烤叉及燒烤網)

大家可以在東薈城買定糧食才入去，不過營地附近有士多茶餐廳, 所以我打算入到營先買碳! 燒烤叉同網我決定環保D, 用營內二手的!

展開 露營 之旅

攪掂之後就全員出發到11號巴士站搭車入塘福了….11, 11A 及 23號巴士都可以到塘福村, 11A條龍短D但係每班巴士都疏D

搭咗15-20分鐘就到達塘福村啦! 一落車就會見到 露營 車個指示牌

斑馬線對面係「偉光士多」, 大家有咩兵糧短缺都可以嚟呢度補給, 夜晚10點先收檔

落車後一直行(唔駛過對面馬路)就會見到停車場, 其實樓梯口就喺圖中旅遊巴車尾及停車場中間

之後就會再見到指示牌(不過好高同好細塊, 差D見唔到)

有陣時停車場比較多車, 可能會遮住咗條樓梯口! 沿住樓梯行落去就會見到一大片草地

(唔好轉左)只要一直跟住石塊路行到尾就會見到間綠色鐵皮屋, 嗰度就係 露營 車營地啦!

塘福 露營 車個招牌都甩哂色，繞過個招牌行幾步就有個木欄，入到去就係營地範圍！

營地成(反轉)”L”字型，三架中型車在一邊，另外三架大型車同兩架小型車併列一起

門口旁邊有間太陽能屋，接受到嘅能量作供應晚上嘅電燈用

太陽能屋裡面發現到D二手燒烤叉，不過有好多都幾污糟，我搵咗幾支乾淨的去用

每一架 露營 車外都有木枱櫈同埋燒烤爐

露營 車入口左手邊的梳化，拉出支架可以變成一張雙人床！足足有6呎夠哂2個大男人瞓，而且車內好多櫃同暗格，包你一定夠位放嘢！

車內嘅窗全部有蚊網同遮光簾任意調交，望出窗外嘅樹景真係好舒服好寫意！
望上去仲有個天窗，如果好天夜晚可以坐喺度睇星星！(不過我哋呢晚就見得唔太多)

室內全部傢私都係用木製造，感覺充滿太自然氣息！下圖見有收音機同喇叭，聲音收得好清！仲有CD播放器(但係我覺得今時今日俾個USB頭駁電話播歌仲好囉)
門口的右手邊就係一張雙人床同洗手間，同樣有一個天窗同埋多個櫃

枕頭全係成人用, 如果有小朋友的話就只好唔瞓枕頭, 如果唔係就要自己DIY或者自備了!

洗手間都好簡單乾淨！不過室內所有水都係由揼機控制，所以水力唔係想像中咁大，同時開住水嚨頭仲會分薄咗水力，但係都足夠應付洗澡洗碗！其一不太理想係開水時揼機會發出摩打聲音有D嘈！

厠所會有一卷全新厠紙同埋上手用剩的! 如果真係驚自己當晚一卷都唔夠用, 就最好預先問負責人拎多卷後備, 因為佢七點就放工架啦!

門口正前方就係廚房，所有餐具飯煲都準備齊全，針板菜刀都有，足夠應付日常煮食

唯獨是大家一定要記得預備食用油，如果唔係就煮唔到嘢食㗎啦！(大家可以到士多買或者用牛油代替)

明火煮食爐有3個，電爐有1個，但係火力唔係太猛(舉例，煲水要大約10分鐘先滾)
星盆下面就係雪櫃同焗爐，雪櫃內設有冰格，但係同樣雪嘢唔夠凍！如果雪肉類飲品要用冰格先夠凍，冰格係唔會雪到結冰！不過如果大家接受程度較高的話，其實雪下層都足夠的！

門口側邊有微波爐同電視

其實入營之前一直都有擔心露營車經營咗兩年幾，架車一定有損耗又污糟，但係估唔到架車保養得好新淨(其他大型及小型車就唔清楚)

由營地行去塘福海灘都係5分鐘，當你見到個海灘即刻有四個字出咗嚟…「水清沙幼」

喺我哋架車出邊啱啱好有個水喉可以望佢哋沖沖身

差唔多六點我喺士多買咗兩包炭同埋火機炭精，喺呢度買果然貴好多，成$48一包炭，真係自殺都唔夠錢！

轉眼間就入黑啦，幾個媽咪就負責喺廚房煮意粉！

小朋友舒舒服服咁坐喺車裡面開餐

佢哋兩個食完意粉出嚟幫我一齊燒雞翼！好感動噢

咁悠閒咁燒嘢食真係好耐都未試過！攪掂哂小朋友瞓覺，我哋終於鬆一口氣
「焗谷唂角…」又到第二朝，每架露營車外面都有一個掠衫架，幸好今朝天氣特別好，尋日濕哂嘅衫好快就乾番哂！

媽咪煮早餐俾大家食！幾靚…我影得

仲有一樣嘢幾得意唔記得講，就係露營車個門口係可以分開上下開，可以只可上半門！

當小朋友喺出面玩緊，然後媽咪伸個頭出嚟大嗌「食早餐啦！」個種感覺好有日劇Feel

我哋食完早餐之後就再去多次海灘玩，然後就番嚟沖涼，執好行裝離開露營車啦！最後搭番11號巴士出番去東薈城食Lunch

如果想睇足版就要Click以下連結啦！

http://bit.ly/28Pwb3l

呀劍評語:一個好好的體驗之旅，同小朋友享受大自然，從互相幫助中促進親子關係！同陽光玩遊戲有一個特點，就係一定小朋友之間唔會爭玩具，因為大自然係無限同免費人人有份！同露營及渡假屋宿營嘅分別就係休息時侯舒服D同埋唔會好似喺渡假屋咁困喺間屋度嘛！

Caravans Hong Kong簡介

位於大嶼山塘福村對出的塘福 露營 車營，設有七架從英國進口的 露營 車，分為小（2-4人）、中（2-4人）、大（4-6人）三個大小，每輛 露營 車均備有冷氣、雪櫃、煮食爐、微波爐、洗手間及浴室等，此外，營地亦設有燒烤爐，可供BBQ之用。由於塘福 露營 車營遠離市區，參加者可以一邊觀星，一邊進食，十分寫意，是香港小有的郊外親子好去處。

地址

香港大嶼山嶼南道270號塘福村

交通

東涌乘搭 11, 11A 或 23 號巴士至塘福站下車 (車程約 20 分鐘)，下車後步行 5 分鐘

電話

6296 8220/6371 1211

電郵

[email protected]

網頁

http://caravans.com.hk

露營第2個選擇 浪高長岸 Long Coast Seasports

由東涌出發，先到超巿入貨！其實長沙下村有多家餐廳，亦有士多(只營業至6時)

班次20分鐘一班都算密！如果唔想等可以搭23號又得，不過車費就貴少少
11號巴士平日車費$11.8，但係星期日及公眾假期就成$19.2，唔會有中途優惠，無論你搭到邊都要呢個價錢，搭咗接近20分鐘，去到長沙下村(長沙警署下一個站)落車

落咗車行前兩步就見到長沙下村個牌，然後沿住斜路行落去停車場就會見到營舍Office

(*條斜路超斜，我非專業估計都有30度，大家要切記小心)

Checkin後跟住職員入去我哋今次要住嘅南非營(特別感謝印巴職員單手抬起我哋個喼帶我哋行入Site)

呢度係Zone A總共有4個南非營，沿路再入仲有3個Zone，剛好我哋被安排在Zone A，最近沙灘同Office，所以非常方便！

這個是六人營，營地環境比我想像中簡陋，營外只有枱兩張枱幾張櫈，營內就得兩張吹氣床墊同埋兩張單人床褥，床舖要外收費$50一套枕頭連被，加埋部分體式冷氣，就係得咁多！

個南非營幾安全，有兩重拉鏈開關，營裡四面都有手捲窗簾連蚊網

行番出嚟沙灘我先去Office開番個Locker鎖番鎖匙銀包，始終南非營都冇門鎖，所以最好大家都將隨身貴重物品放入Locker

(其實營地都有提供渡假屋住宿，如果覺得南非營太過Wild都可以住番渡假屋)

一出營地就係海灘，最啱小朋友可以即刻衝出去玩！

其實營地有提供BBQ，包括炭、爐及一客燒烤包，不過$200一位我覺得太貴了！我見隔離營都有幫襯，基本上都好夠食！不過我就選擇喺長沙下村嘅餐廳食
長沙下村有幾家餐廳，都係以西式或Fusion為主！最近營地的這家叫”The Beach House”

呢間叫”Long Island”，幾家餐廳都喺隔離，可以一次過睇哂想食邊間！

再隔離有個雜貨店，如果入唔夠貨嚟玩，可以喺度補給㗎！一般零食汽水甚至游水滑浪用品樣樣都有！

如果同一班大朋友嚟都可以去再隔離呢兩個bar，呢家好有中國古典味道！

過咗呢條小橋有另一間叫”Stoep”

再行前就有個原住民開的士多仔，一個老婆婆睇檔，不過佢六點幾就會閂！所以有咩買要早少少啦

最後我哋揀番第一間”The Beach House”，玩完水一於食番餐豐富晚餐同埋食浪漫情調，坐喺沙灘邊的梳化位，吹住海風食嘢真係好舒服

我哋Order咗…
$338 Mixed Grill Platter

$158 Eggplant and Spinach Lasagna

$68 Little Fish and Chips

$188 Seafood Linguine

不設加一Total $752，如果我BBQ的話就4x$200(我當哥哥芊芊計一個)＝$800

不過見人見致，因為在營地BBQ又有另一種感受

不過呢餐實在超好食！所有食材質素超班，意粉彈牙爽口，海鮮鮮甜又大隻

呢碟Fish and Chips話係兒童Size，但係都好大碟同埋超好食

呢碟雜錦燒烤併盤，好好好味X100！最好食係燒豬肉，Juicy又香肉質爽！

因為都想叫D蔬菜俾小朋友食，所以呢碟芝士茄子菠菜係我推介，好有特色仲好好味！

大家睇到每一碟個比例嗎，真係好大碟㗎！所以食嘢唔怕貴，最怕又貴又難食，呢一餐真係食得超開心！大家有機會嚟都可以參考吓我叫的餐

入番房大約9點鐘，本來小朋友都要瞓㗎啦，不過今日咁開心就俾佢哋放肆一下，我哋一齊玩咗陣UNO，食月餅同士多啤梨，跟住差唔多11點就覺覺豬lu

當然叫佢哋瞓覺仲難過，張吹氣床墊咁好玩，點捨得瞓呀！唉～

第二朝自然醒真係好爽噢～而且仲…陽光普照，好嘢！！！可以同陽光玩遊戲啦

(註：留意最後「呀劍評語」講述瞓覺唔好的經歷)

直行穿過瀡滑梯就係洗手間同浴室位置

兩格浴室兩格厠所供四個營嘅朋友用，唔算太污糟，不過就細咗D，用得唔太方便，仲有垃圾筒冇人更換，直至到下一日入營前先會有職員清潔，所以有D污糟！

Office隔離間餐廳仲未開門(營業時間係10:00，之後知道老闆娘佢今朝去咗買餸所以遲咗少少)

全部小食價錢偏貴，一碗餐蛋麵都成$45蚊！其他餐廳又未開，又唔想走番出去東涌食再入番嚟，唯有谷住俾佢賺啦！(其實Office都有杯麵汽水啤酒供應)

個餐蛋麵唔係太掂有D求其，所以大家記住入定貨先入嚟Camp

小食店內仲有其他嘢賣！

我番去Office借咗兩塊Body Board俾佢哋玩(無須另收費，營租已包)

唔同季節包唔同設施，大家訂營前最好先問清楚！

兩個都係第一次接觸Body Board，哥哥起初一路話唔敢行好出，只係在岸邊玩，但唔夠大浪！

但直至我掉佢出去深D試過一次之後，佢就上咗癮咁玩唔停

相反，妹妹就…

玩完Boby Board我再去Office借獨木舟Kayak！
記住所有設施都係冇教練陪住㗎，玩緊嗰陣自己一定要特別小心！出海前影番張有型相先

乘風破浪幾有型！但係…唔夠5秒又俾個浪沖番上岸

我哋差唔多12點Checkout，就番去營地執嘢沖涼，但係我記得呢度仲有個超大嘅彈床可以跳，所以我哋穿過營地向Zone B進發跳彈床

要同南非營講拜拜啦，雖然營地設施簡單，但係卻係一個好好嘅體驗！拜拜長沙，We’ll be BACK!!

呀劍評語:起初見到個南非營咁簡陋係有少少失望，不過原來簡簡單單反而令我哋冇咁多嘢要預備，多咗時間相處！最開心興奮就係第朝早上嘅天氣咁好同埋可以玩到咁多水上活動。

唯一扣分係夜晚瞓覺真係唔太舒服，瞓吹氣床墊好唔舒服，同埋咁啱隔離班後生仔營友太嘈，到夜晚12點仲唱生日歌～始終南非營冇隔音設備，所以如果撞啱遇着班唔好嘅營友，咁就唔好彩啦！

浪高長岸簡介

我們的宗旨是為賓客提供一個只有於海外才可體驗到的優閒臨海度假享受，以及為一眾水上活動及大自然愛好者提供不同形形式式的水上活動。

地點

香港大嶼山長沙下村29號

開放時間

星期一至五：上午十時至日落

星期六、日及公眾假期：上午九時半至日落

交通

可乘坐11號巴士於長沙下村站落車，其他途徑請參考官方網頁

一般查詢、私人派對、預約課程、廣告及合作事宜

+852 8104 6222 (星期一至五 上午十時至下午六時)

查詢有關風浪情況

+852 2980 3222 (上午十時至下午五時)

網頁

longcoast.hk

露營 選擇3 YHA昂坪戴維斯青年旅舍 Hassle-free camping

兩手Fing Fing去露營，自年頭聽過之後就好有興趣，但係對於一家大細嘅我哋，絕對唔係兩手Fing Fing囉！

我哋由東涌出發，坐昂坪360纜車入巿集！

今次仲可以坐到水晶車廂，開心到佢哋兩個！指定動作，坐喺玻璃地下睇住車廂下底嘅風景

到咗巿集順便去埋360舞臺同埋360影院，同埋….扮吓遊客影吓3D相

經過大佛之後就會見到指示牌，沿住小路一直行見到分叉路，再有指示牌轉右繼續行多大約10分鐘

見到呢個大金元寶就大約到達營地

轉埋上斜路就到啦！

跟住呢條好似迷宮咁嘅斜路樓梯就到啦

營地唔大一眼睇哂！在草地上只有幾個中小型的帳幕，最大的就係我哋個Bell Tent，隔離有辦公室及另外一面有燒烤場及宿營舍

趁小朋友未開始走出去玩，點都要佢哋影咗張相先！如果唔係一陣真係捉都捉唔住

我哋第一個節目就係幫個營佈置，佢哋幾個又好乖咁一齊幫手！我哋喺12蚊店度買咗D旗仔，雖然係Halloween款式，但係都冇乜所謂！

營出入口原來都已經吊有小小LED燈，全用太陽能發電！

大人去睇吓周圍設備，預備今日晚嗰餐啦！營舍裡面有足夠設施及煮食餐具，廚房內有4個電煮食爐，而且有冷熱水機！

沙煲冷撐都齊全應有盡有，起初我仲擔心咁多人一齊Camping，夜晚煮起嘢食上嚟咪會爭爐用！首先今日追月晚上居然唔太多人入Camp，而且我哋6點幾就開始煮，都冇話同其他後生仔撞時間(就算7點後都係得兩三個人準備晚餐)，所以都冇咩問題！

開始預備晚餐，呢班小朋友點可以俾佢哋做大食懶！一於叫佢哋嚟幫手洗吓菜同蕃茄

今晚我親自下廚，俾老婆同朋友仔傾吓計！我預備喺東薈城超巿買定餸，溫馨提示：營舍其實都有油鹽豉油等調味料，不過都係上手營友留低嘅，營舍職員講明唔會負責呢D用品嘅食用期，一切後果自負！所以我都買咗支細細嘅橄欖油同細支裝豉油

話咁快就開餐！大家都食到飽飽…個什菜湯真係甜到漏！連自己都要讚自己

如果各位想BBQ都可以㗎，大家可以自己買食物用具入嚟，碳最好自備一包，因為營舍都有後備(又係上手留下的)，但係燒烤爐就得4個，營舍職員話如果真係太多人同時燒而唔夠爐的話，佢會安排大家坐逼D或者限時分先後等方法，務求大家都有機會享用！

仲有提醒各位，呢個Bell Tent真係除咗吹氣床墊同寢具就乜都冇㗎啦，所以要自備營燈，不過大家可以放心，我喺鴨寮街買一支$50唔駛，USB叉滿電都可以用足成晚！

仲有最緊要預備蚊香…在營外點上幾個，包你夜晚瞓得舒服！

另外可能對於比較少甚至冇試過Wild Camp的家庭嚟講，冇風扇冷氣會唔知點算，其實你只要揀啱少少秋涼天氣嚟，即使早上真係成33度咁熱，夜晚入夜後真係好凍…到凌晨時分仲覺得好凍要瞌被㖭呀！如果真係擔心的話自備個芭蕉扇都夠哂

到咗夜晚我哋佈置嘅舍地仲顯得特別靚，好多其他Camp友同職員都走過影相呃Like

話明追月，梗係帶哂燈籠嚟，小朋友喺草地操場跑嚟跑去，大人喺營度密密傾！

成個壇Set好啦！又生果又月餅…再嚟下一餐啦！我哋食埋月餅賞埋月(個月亮好大)玩吓UNO捉吓棋，跟住就去沖涼瞓覺啦(營舍分別有兩個厠所兩個沖涼室)

到咗第二朝，真係一覺瞓天光！只係臨瞓嘅時侯因為隔離營D年青人比較嘈難入睡D，要我走出去叫佢哋細聲D，不過班後生仔都幾合作！知道有小朋友喺度，佢哋都有禮貌地將音量收細(其實嗰陣成12點喇…不過我都明年青人去Camping係鍾意玩通頂嘅)

我先入廚房烚蛋！跟住同小朋友刷牙洗面，攪掂哂佢哋又繼續佢哋嘅小天地

早餐同樣咁豐富！食到大家都飽飽(又有溫馨提示：其實營舍有提供$35一位嘅DIY早餐，都係多士炒蛋火腿＋即食麵/麥片＋咖啡／茶)，不過一場嚟到我都希望可以大家一齊自己預備，而且自己買仲會平D！

攪咗成個朝早，執好行李放喺Camp Site，然後真係兩手Fing Fing去行山，我哋行去最近嘅心經簡林打個轉！

嚟到鳳凰山腳轉右就係心經簡林！

望去遠處嘅山覺得好靚好遼闊，其實有時間真係要多D去親親大自然，感覺真係好舒服！

然後我哋番去營地攞埋行李就Check-out啦！

最後番去巿集嘆番碗山水豆腐花同小食就當lunch(因為今朝個早餐太飽)

我哋就離開昂坪巿集，坐360纜車番東涌啦

呀劍評語:去Camping去得多, 去Wild Camp都係第一次, 雖然唔係完全Wild, 隔離有個營舍設有廚房等設備, 但係對於年紀細既小朋友嚟講都幾適合!

YHA昂坪戴維斯青年旅舍簡介

旅舍遠離鬧市繁囂，被天壇大佛、寶蓮寺及心經簡林等充滿中國文化色彩的旅遊景點環抱，是喜愛大自然和享受寧靜的旅客的必然之選。鄰近昂坪棧道及彌勒山等多條熱門登山徑，你更可挑戰自己，登上全港第二高峰鳳凰山，觀賞絕美日出。

自2015年2月推出「昂坪旅舍：兩手fing-fing去露營」計劃起，反應非常熱烈，吸引不少年青朋友、情侶、一家大小，來到大嶼山昂坪出走郊野，享受悠閒假期。有見及此，我們決定詢眾要求，將計劃加推至位處香港島的賽馬會摩星嶺青年旅舍。計劃為沒有露營經驗的你而設，讓你無需一包二包，只需兩手fing-fing便可體驗野外露營的樂趣，親親大自然，享受天倫之樂。

地址

大嶼山昂坪

營業時間

開放時間 :上午7:00-晚上11:00

入住時間 :下午3:00 退房時間 :中午12:00

電話

(852) 2985 5610

電郵

[email protected]
[email protected]

地圖

http://g.co/maps/sh2es

網頁

www.yha.org.hk

Photo byCANON 5D Mark III,Len|EF 24-70mm f/2.8L USM

想跟我去體驗其他活動，快D報名親子團，同埋留意專頁公佈詳情啦！

http://goo.gl/forms/CNZMEPoMIWkouK8o2

呀劍評分:10分

呀劍評語: 秋風起，一家大細去露營就最好不過，小朋友難得的體驗，一起親親大自然！

(以上資料更新至文章當日)

Facebook專頁:呀劍萬帥 kimfamilytravel
Blog網誌 :kimfamilytravel.blogspot.hk