37歲生日收大禮 熊黛林 有老公送名車
廣告
10月10號是熊黛林(Lynn)的37歲生日，老公郭可頌豪花成百萬訂咗部「R」字頭新車送畀佢做生日禮物，雖然熊黛林嬲爆喺微博話俾完錢先發現好多配置都唔包，兼夾話車行職員態度差，但重點是畀錢同車行職員交涉都由老公一手包辦，而日前熊黛林出席活動，有記者問架車係咪老公送嘅生日禮物，佢甜笑話﹕「唔知算唔算係，總之係老公畀錢。」閃到眼盲！
撰文：Sunday Kiss
圖片來源：新傳媒圖片庫、熊黛林微博
熊黛林 生日收大禮
熊黛林嫁咗郭可盈細佬郭可頌之後幸福滿載，阿Lynn婚後話過希望今年可以生B，雖然肚皮暫未有聲氣，但老公一樣錫到佢燶！今個月37歲生日嘅Lynn，自爆老公一早訂咗百萬新車當生日禮物送畀自己，但臨收車經紀至畀話好多配置都唔包要佢哋補錢、態度又欠佳，於是po文上微博訴苦。不過重點係出錢嘅係郭可頌，出力同對方交涉都係老公包辦，熊黛林條氣梗係順番啲啦！
孭Hermès出巡
生日前夕Lynn孖埋助手去銅鑼灣行街shopping買電器，雖然買車買到一肚氣，不過出錢係老公，繁複交涉都係靠老公，Lynn出街都心情靚靚，見佢一袋二袋戰利品又孭住個貴氣Hermès袋，留意番佢件T-shirt上嘅句子「I have a beautiful life」，幸福到呢⋯⋯
低調簽紙結婚
熊黛林去年10月同郭可盈胞弟、男友郭可頌低調簽紙結婚，當日榮升大姑奶的郭可盈直言十分開心，見到一對新人終於有情人終成眷屬，希望兩人可以白頭到老，組織幸福家庭，又大讚熊黛林係一個好賢良淑德的女仔，好乖，唔物質主義！Lynn透露與老公努力造人中，希望可以今年內「中奬」，因為早生的話可以考慮再生第二胎。希望佢哋早日達成願望啦！
雖然老公家族生意億億聲，不過婚後嘅Lynn依然好勤力，啱啱同Orlando Bloom拍完西片，又搞網店生意樣樣親力親為。
