8大美肌 養顏 湯水 靚媽啱飲！

編輯：Sunday kiss
撰文：小小豬的成長日誌
圖片：小小豬的成長日誌

1.印度椰子栗子瘦肉湯

早係幾個月前煲過印度椰子清潤湯之後，真心覺得係好飲，所以成日都想買嚟再煲過。終於買到又平又靚嘅印度椰子，所以就即刻去買材料，煲依個印度椰子栗子瘦肉湯啦！

印度椰子有助清燥熱、止咳功效、滋陰補腎、潤肺 養顏 、強壯身體機能嘅作用。栗子就有助補脾健胃，再加埋果皮同百合一齊煲，對潤肺止咳係好好呀！

材料包括有，印度椰子一粒、栗子半斤、紅蘿蔔一絛半、豬肉眼約$40、鮮百合兩粒、果皮兩小塊~

先將印度椰子切片，可以的話就切薄啲，咁就煲時就可以出味啲~

栗子去殼，浸熱水去衣備用~

果皮浸透去囊，百合洗乾淨，紅蘿蔔去皮切塊，瘦肉洗淨汆水備用~

煲內放約1.5L水(約有15個飯碗左右啦)，然後加入果皮~

利用大火煲一陣，待水滾後加入所有材料~

再一次滾起後，後轉用慢火煲約2小時~

最後加少少鹽調味就飲得啦~

既有超香嘅椰子味之餘，又有少少栗子味，所以真係啱晒椰子控的我同埋栗子控嘅小小豬。就連老公都大讚啖湯好清甜，今次真係一次過滿足晒我地三口子嘅口味，小小豬飲左兩碗，我地大人就飲左三大碗，真係超飽呀呀！

2.蘋果桂圓燉桃膠

其實「桃膠」乃桃樹嘅天然分泌物，於樹上結成琥珀色晶體，蘊含豐富植物膠原，具美顏、滋補功效，最重要是價錢較傳統花膠、燕窩便宜，絕對是平民養顏恩物，而且其功效近似燕窩，冬天用來煲糖水相當滋潤~

由於都係第一次煮，所以都唔敢煮太多，同埋係咩味道，所以今次就冇預小小豬份，只係煮兩人份量先啦！

蘋果一個、桃膠一湯匙、桂圓約六粒、紅棗六粒、南北杏半湯匙、冰糖少少(視乎個人喜愛嘅甜度啦)~

桃膠用水浸6-8小時至發大，途中最好換幾次水~

要留意桃膠都係啲天然食材，難免有啲雜質，所以要細心咁除去啲黑色雜質呀~

浸好左啲桃膠又真係比初時大好多倍，亮晶晶咁又幾靚哦~

蘋果去皮去芯切粗粒~

桂圓、紅棗及南北杏就浸洗備用~

將蘋果、桂圓、紅棗及南北杏連用兩飯碗水放入燉盅內~

放入電子燉盅內先燉45分鐘~

其後再將冰糖及桃膠加入燉盅內，再燉30分鐘~

食得啦…記得要趁熱食呀~

第一次燉蘋果，連埋啲果肉一齊食，甜得嚟又有點酒香味(哈哈哈…我都冇落酒，應該係個蘋果發出嚟嘅)，估唔到又幾好食。

之前睇網友講話桃膠囗感似雪蛤膏，算我一向少食貴嘢，唔知雪蛤膏係咩味。不過我就覺得有啲似啫喱，加埋啲糖水一齊食，口感同味道都唔錯呀~

桃膠其實仲有好多配搭，我買左成一大盒，今次都只係用左少少，所以….真係可以慢慢整多啲唔同花款，等自己滋一滋先得！

3.清甜滋潤 海底椰蘋果雞腳湯

突然間口痕痕，好想食煲湯雞腳，所以就煲返個清甜滋潤嘅 海底椰 蘋果雞腳湯滿足一下自己先！今次其實主要係用上新鮮 海底椰 ，佢除左有潤肺功效之外，仲可以養顏滋潤，對皮膚好好添。特別係由朝到晚都開冷氣，皮膚都一定會乾乾的，所以返個 海底椰 靚湯滋潤下。而且加埋蘋果一齊煲，咁啖湯就真係既滋潤又清甜，仲唔係十個GOOD！

由於今次我地又嚟八人大餐，所以材料就多少少，包括：新鮮海底椰四粒、蜜棗四粒、南北杏一湯匙、果皮三片、蘋果四個、雞腳約二十隻及豬骨約$60~

果皮浸透去囊；豬骨及雞腳洗淨汆水~

我之前次次煲雞腳都一定會剪好晒啲腳趾，諗住好似會方便啲。但今次爸爸教路話唔好剪，因為一剪左就會係煲湯過程漏左啲雞油出嚟，咁成煲湯就一定會好油淋淋呀。所以我今次就洗乾淨晒之後，原腳一齊煲，睇下係咪真係冇乜油先。

我平日都係鐘意用蛇果，點知今日行晒成個街市都冇，所以都照用富士蘋果頂住先啦。蘋果刮去那層果蠟之後，洗淨去芯切塊；新鮮海底椰洗淨，記得唔好除去嗰層薄皮，因為止咳都係靠佢呀；蜜棗及南北杏浸10分鐘沖淨~

煲內放約5L水，放入果皮，待水滾後放入蜜棗及南北杏~

待再次滾起時，可以加入蘋果、海底椰及豬骨，用大火加蓋煲約30分鐘~

然後加入雞腳，再轉慢火加蓋煲多1.5小時~

最後加入少少鹽調味，就可以飲啦~

啖湯真係好清甜，而且真係一啲都唔油，第一次煲雞腳湯係冇唔洗好勤力咁邊煲邊隔油，真係既好味又方便(仲要係好好食，煲湯雞腳真係特別好食呀)，睇嚟下次都要用返爸爸呢個方法，煲湯時唔好剪走啲腳甲，最多叫大家食湯渣嘅時候小心啲啦…哈哈哈！

4.海星紅蘿蔔瘦肉湯

早前試過用海星煲雪梨湯，味道都唔錯小小豬都好鐘意飲，見都開左包海星，再加上搵到肥媽之前食平DD個食譜，所以就嚟海星紅蘿蔔瘦肉湯啦。海星係好有藥用價值，對滋肺養顏、化痰止咳、生津潤燥同埋可以滋養強身，真係啱晒依排成日喉嚨痕引起咳嘅我飲呀！

材料：

海星一隻、 豬肉眼$40、南北杏一湯匙、鮮百合兩球、玉竹兩湯匙、果皮一片、粟米及紅蘿蔔各一條~

海星先用熱水浸約五分鐘，然後將海星肚內清洗乾淨，一定要小心啲清洗，所有內臟都一定要清走，如果唔係成煲湯就會勁腥啦~

海星放入加了薑煲汆水~

果皮浸透去囊；鮮百合切去頭尾啡黑色部分，逐塊剝開洗淨；玉竹及南北杏洗淨備用~

瘦肉洗淨汆水；紅蘿蔔及粟米去皮切塊~

煲內放約3L水，然後加入果皮~

水滾後放入所有材料~

待水滾後再放入其他材料，先用大火煲約半小時~

然後轉慢火加蓋煲兩小時~

最後加少少鹽就飲得啦~

上次只用雪梨都已經覺得唔錯，不過加左粟米、紅蘿蔔同鮮百合一齊煲，就多多一份甜味，所以就更加好飲，小小豬都大讚好飲呀！(緊係啦…依個粟米怪一見到條粟米已經不停話正啦！)

5.桃膠雪蓮子煲黃耳

桃膠含有豐富植物膠源，可補充皮膚膠原蛋白、增加皮膚彈性、減少皺紋。雪蓮子營養成份豐富，屬高能量、高碳水化合物、低蛋白，低脂肪食物。而且可以補充膠原蛋白，可以滋養皮膚及養肝滋腎。所以三者加埋一齊煲，可以話係補充膠原蛋白最佳組合，仲唔係勁啱女仕們飲用！

雪蓮子約20粒、桃膠半湯匙、黃耳2朵、圓肉3-4粒、冰糖少少~

將雪蓮子、桃膠及黃耳用水浸發十小時間或以上至軟身~

然後雪蓮子及桃膠就要洗淨後把黑色部分剪走。黃耳就去蒂切細細舊~

黃耳所含膠質亦非常豐富，可促進肝脂肪代謝，亦可滋潤養顏及延緩衰老。
將兩飯碗清水加入煲內，然後再將所有材料，以中火煮半小時~

話咁快就食得啦…最好就要趁熱食~

基本上所有材料都食得，食落又真係幾好味，而且仲好飽肚添…哈哈哈~

簡單得嚟又真係超滋潤，膠質仲好重，所以得閒都要煲俾自己食，女仕都要愛下自己先得呀！

6.【美肌 養顏】黑豆紅棗圓肉茶

見有朋友仔介紹煲依個好啱女仕飲嘅黑豆紅棗圓肉茶，見材料簡單又唔難整，所以又嚟試下係好唔好飲先！

當然我都有上網睇過啲資料，原來黑豆係好有益，因為佢黑豆不含膽固醇，只含植物固醇，而植物固醇不被人體吸收利用，又有抑制人體吸收膽固醇、降低膽固醇在血液中含量的作用。經常食用黑豆就可以軟化血管，滋潤皮膚，延緩衰老。另外仲可以有美容養顏功效，而且佢鐵質成份好重，所以月事過後可以飲用嚟調理身體呀！

材料就有：黑豆50g、圓肉15g及紅棗6粒~

黑豆先用水浸大約20分鐘；紅棗去核同圓肉一齊洗淨~

煲內加入4碗水~

然後加入所有材料

待水滾後，轉用慢火加蓋煲30分鐘~

熄火後再焗多15-20分鐘，隔楂後就可以飲啦~

初時見到黑卒卒都有點驚唔知係咩味，不過原來都同平時嘅紅棗茶味道差唔多，暖暖地咁飲都唔錯呀！

既然味道唔差又有營養啲，所以下以就紅棗茶時都加埋黑豆入去，要愛鍚自己多啲嘛！

7.潤肺養膚 雪耳螺片瘦肉湯

病好左就自然係要好好保養下自己，所以就煲返個潤肺養膚嘅 雪耳螺片瘦肉湯 ，等兩位老細潤一潤之餘，我又可以滋返下啲皮膚(其實….今次都係為自己著想多啲…哈哈哈)！

雪耳係滋潤相信大家都知，有助潤肺、潤膚同埋養顏嘅功效。螺片乾滋陰嘅同時又可以提升湯嘅鮮味。玉竹同埋沙蔘就可以潤肺，所以食雪耳同飲湯水就可以潤肺養膚！

材料包括：雪耳約1両、螺片乾2両(約兩片)、玉竹1両、沙蔘1両，陳皮1小塊，蜜棗4粒及瘦肉約$35~

做法：

螺片先浸至軟身，然後就切成小塊；雪耳浸軟剪切塊；陳皮浸軟刮去皮瓤~

瘦肉洗淨汆水；其他藥材浸洗一陣~

煲內放約3L水，然後隨水加入陳皮~

待水滾後加入所有材料~

繼續用大火加蓋煲約15分鐘~

之後轉慢火加蓋煲多1.5小時~

最後加鹽調味，就可以飲得~

有雪耳嘅湯就啱晒小小豬，因為我話過食雪耳變靚仔嘛(哈哈哈…人仔細細就咁貪靚)。不過其實啖湯都好清甜，飲完都覺得特別滋潤呀！

溫馨提示：
– 這個湯的材料非常溫和，但由於個別人仕體質不同，所以大家記得煲之前了解下自己，如有疑問，最好先諮詢醫生或醫師的意見。！

– 雖然雪耳係好味又有益，不過都要再提多大家煲過嘅雪耳一定要即日食/飲晒，如果隔夜，經過一夜嘅浸透，佢就會放出一啲有害物，到時就有益變有害啦！

8.排毒養顏 猴頭菇螺片滋補湯

經常大吃大喝，係時候要食返清啲，等腸胃回復健康。所以我就煲左既可以既滋補又清腸胃嘅 猴頭菇螺片滋補湯 俾兩位老細飲啦！猴頭菇益腸和胃；螺片滋陰養肝，再加埋黨參、北芪同圓肉一齊煲，對腸胃好之餘，對滋補養陰及潤膚養顏有顯著幫助呀。

材料：

我就係三人份量，煲出嚟約有六至七碗左右。

材料就需要：瘦肉約$40；猴頭菇、螺片、黨參、北芪、圓肉，你同藥材鋪店員講大約幾多人飲，佢就會幫你執份量啦~

做法：

猴頭菇及螺片先浸至軟身(大約兩小時左右)，然後就切成小塊~

瘦肉洗淨汆水備用，其餘嘅藥材就浸洗一陣~瘦肉洗淨汆水備用，其餘嘅藥材就浸洗一陣~

將2L清水燒熱，然後放入所有材料~

待水再滾後轉慢火煲一個半小時~

最後加少少鹽就可以飲得啦~

之前我都有煲過猴頭菇湯，不過就只限飲佢啲湯，真係冇諗過係可以食。原來佢嘅味道又真係唔錯，而且仲係好有益，食左猴頭菇之後就好似食左個清道夫，幫你掃走晒啲唔健康嘅嘢排出體外呀~

雖然都係用藥材嚟煲，不過完全冇嗰啲藥材品，入口反而係甜甜地，我家兩位老細都讚好飲呀！

哈哈哈…佢地鐘意就好，咁我就可以多啲煲，清下體內嘅唔健康嘅嘢，又可以滋潤一下，飲多啲….對身體都好啲呀！