Bob嫂 布公仔教囡囡 性教育

撰文：Sunday Kiss
圖片：Bob Facebook、新傳媒資料庫

用布公仔教性教育 網民大讚好老婆

Bob林盛斌喺Facebook 上載咗一張老婆用布公仔教囡囡性教育嘅相，佢話老婆已經進階到搵人設計布公仔，用遊戲方式教幾個女「性教育」。仲話：「到底………………….我娶咗個咩女人？」好多網民就表示Bob 嫂係個好太太好女人，教女好有心機，仲有網民話如果Bob 嫂第日推依個布公仔出市場賣一定會幫襯添！Bob屋企有三個囡囡，性教育同學識如何保護自己，對佢哋嚟講非常重要，網民大讚Bob娶咗個好老婆！

太太陀第四胎

Bob 4月嘅時候喺FB宣布喜訊，留言話：「各位，我正式宣佈：『我又做爸爸呀！』霏霏、熹熹、機機，你哋有細佬嘞！」

生夠四個一定會封肚

其實Bob早前接受Sunday Kiss訪問時，坦言和太太正努力追多個仔，不過無論追唔追到，Pearl話生夠四個一定會封肚，四個已經好完美。原來嗰陣已經有咗細佬B啦！Bob幫細佬B改咗個乳名叫「大兜仔」，仲話囝囝似足自己！

太太去年曾經歷小產

其實Pearl喺上年11月曾經歷小產，Bob話當時只陀咗2個月，可能陀得唔穩。直至12月Pearl再次懷孕，當時兩夫婦有共識過咗五個月，等陀穩啲先講！囝囝預產期是今年9月。

養六個女人要過億

N年前「風之后」李麗珊話生一個要400萬，現在連通脹計算就不止此數目，Bob要養三個，嚟緊仲有第四個B，還租住加多利山大屋，Bob的開支十分巨大，坦言要再努力搵錢養家。佢早前接受訪問時講過：「仔都話求其俾啲嘢佢食、俾啲嘢佢玩，但女唔得，女仔啲嘢精緻啲，又貴啲、巴閉啲，你諗吓一個女朋友使你幾多錢？我依家屋企有三個女朋友，加埋我老婆，仲有兩個工人，佢兩個都要氹㗎喎，唔止千幾萬，億幾先啱呀！」